Bretar að vakna

Á meðan Íslendingar eru nú að taka upp allskyns hindranir í venjulegu lífi fólks eru önnur ríki að afnema slíkar, hafi þær á annað borð verið teknar upp. Á föstudaginn gufaði seinasta innlenda hindrunin í Danmörku upp: Staðfesting á sprautu, fyrra smiti eða nýlegu neikvæðu prófi til að komast á næturklúbb. Bretar hættir við að flokka þegna sína eftir sprautufjölda. Ýmis ríki Bandaríkjanna fyrir löngu hætt þessu umstangi og farin að einbeita sér að lýðheilsu fólks (almennri vellíðan, ekki veiruleysi).

En svona gott er þetta ekki allstaðar og enn er ferðalöngum víðast hvar gert erfitt fyrir. Einkennalaust fólk er sent í endalausar skimanir til að komast að því hvort það er lasið eða ekki. Á meðan labba sprautaðir um og blása veiru á saklaus dýr og veikja þau. Enn er talað um að sprauta krakka sem eru í engri hættu vegna veiru en þeim mun meiri hættu vegna sprautunnar. Þetta er ekki búið. Enn er víða hræðsla. Stjórnmálamenn hafa fundið upp ný völd sem þeir sleppa ekki svo auðveldlega. 

Annars er alveg við hæfi að spyrja sig hvers vegna Bretar eru hættir við að flokka þegna sína eftir fjölda sprauta. Fóru einhver mótmæli fram og annað slíkt sem enginn fjölmiðill sagði frá?

Englendingar taka ekki upp bólusetningarvottorð

Hálf frétt

Joe Biden, forseti Bandaríkjanna, hyggst beita valdi sínu og sjá til þess að tveir þriðju hlutar bandarísks vinnuafls verði bólusettir gegn kórónuveirunni. 

„Við ætl­um að vernda bólu­setta starfs­menn fyr­ir óbólu­sett­um sam­starfs­fé­lög­um,“ sagði Biden.

Er þá öll sagan sögð? Engu nær. Nú þegar eru ríkisstjórar og aðrir á bandarískum stjórnmálavettvangi að undirbúa lögsóknir til að hnekkja mögulegri sprautuskyldu Bidens. Um þetta er ekki fjallað í fréttum. Hvers vegna? Jú, því það gæti tekið aðeins glansinn af sprautuskyldunni. Blaðamaður talar bara um að Biden ætli að beita valdi sem hann hefur sennilega ekki. Punktur.

Ég er auðvitað búinn að gefast upp á því fyrir löngu að bíða eftir heiðarlegri umfjöllun fjölmiðla um sprautur, smit, takmarkanir, óbeinar afleiðingar sóttvarnaraðgerða og þennan þrönga fókus á eina veiru á meðan allt annað skal í askana látið.

En að ætla matreiða frétt ofan í neytendur frétta í þá áttina að Biden ætli að bjarga málunum, skylda fólk í sprautur og málið dautt? Glatað.

Biden skyldar ríkisstarfsmenn í bólusetningu

Já hvers vegna ekki?

Viðreisn ætlar á fyrstu 100 dögum komandi kjörtímabils að lýsa yfir neyðarástandi í loftslagsmálum. Þar að auki vill flokkurinn leiða í lög 60% samdrátt í losun gróðurhúsalofttegunda fyrir árið 2030.

Vatnsgufa væntanlega undanskilin.

Og hvers vegna ekki að lýsa yfir neyðarástandi (yfir einhverju)? Sumir kjósendur eru æstir í neyðarástand. Þeir vona að vísu að einhver annar þurfi að éta reikninginn en að hafa sem mestar áhyggjur þegar ástæðan er hvað minnst er kannski bara í tísku.

En er ekki neyðarástand víða annars staðar? Fjöldi vinnandi fólks sér fram á að verða óvinnufærir öryrkjar vegna biðlista í ýmsar aðgerðir, þar á meðal liðskiptiaðgerðir. Nei, það er ekki neyðarástand. Fullt af fólki er að bugast undan skattheimtu (sem meðal annars kemur fram í háu vöruverði). Nei, það er ekki neyðarástand. Hvað með fátækt? Nei, það er ekki neyðaástand. Hvað með óbeinar afleiðingar sóttvarnaraðgerða? Nei, það er ekki neyðarástand.

En loftslagið? Já, það er neyðarástand.

En svo ég leyfi mér að spyrja: Hvaða vísbendingar eru um þetta meinta neyðarástand?

Ætla að lýsa yfir neyðarástandi í loftslagsmálum

Mjög áríðandi ábending áður en sprauta 2 er sett í börnin

ÞETTA KYNNI AÐ VERA MIKILVÆGASTA SPURNINGIN SEM ÞÚ SEM FORELDRI ÁTT EFTIR AÐ ÞURFA AÐ SVARA

 

Það er búið að bólusetja 11.000 börn. Sex alvarlegar aukaverkanir er ein á hver sautján hundruð börn. Það kemur ekki fram hverjar aukaverkanirnar eru, en miðað við reynsluna má reikna með að þetta sé hjartavöðvabólga. Hún dregur allt að helming þeirra sem greinast með hana til dauða innan fimm ára. https://www.ncbi.nlm.nih.gov/books/NBK459259/

 

Þetta merkir þá eitt dauðsfall á hver 3.400 börn. Hvað með Covid? Er það hættulegra? Nei, því fer víðsfjarri. Rannsóknir sýna dánarhlutfallið 0,00004% meðal heilbrigðs fólks undir tvítugu. Það er eitt barn af tveimur milljónum. https://kofid.is/danartidni/

 

Síðari sprautan veldur miklu alvarlegri aukaverkunum en sú fyrri, samkvæmt grein tveggja hjartalækna í Morgunblaðinu nýverið.

 

Nú er spurningin til þín sem foreldris þessi:

Nú hefur þú gögnin og getur lagt mat á áhættuna. Þú veist að áhættan fyrir barnið þitt er margfalt meiri en hugsanlegur ávinningur. Ætlar þú að taka áhættuna, eða ætlar þú að láta barnið þitt njóta vafans?

 

Höfundur: Þorsteinn Siglaugsson. Áherslur mínar.

Tilkynnt um alvarlegar aukaverkanir hjá sex börnum

Eilífðarvélin

Því var ákaft fagnað í ákveðnum hópum þegar það tókst loksins að hrista "the Vietman syndrome" úr Bandaríkjamönnum. Bandaríkjamenn höfðu þá í töluverðan tíma verið á móti stríðsbrölti erlendis eftir mistökin í Víetnam og vildu ekki styðja við umfangsmiklar hernaðaraðgerðir á erlendri jörð. En það tókst að lækna almenning af þessu eins og öðru. Áróður og sérstaklega hræðsluáróður dugar þar vel eins og í öðru.

Síðan þá hafa Bandaríkjamenn ráðist inn í fjölmörg ríki og steypt af stóli mörgum forsetum og einræðisherrum og eru enn að. Þetta skapar vitaskuld vítahring. Í hvert skipti sem ungur drengur sér móður sína og systkini sprengd í loft upp eða aflimuð þá græða samtök andspyrnumanna nýjan liðsmann. Í hvert skipti sem spítali er brenndur til grunna eða þorp stráfellt með vélbyssum þá eflist mótstaðan. 

Ógleymt er svo hvað mikið innstreymi manna, vopna og peninga gerir við innfædda. Þeir reyna auðvitað að græða á þessu. Ein sagan segir af þeirri aðferð Afgana að reisa svolitlar tjaldbúðir og siga svo bandarískum herþotum á þær. Sprengjur falla og tjaldbúðirnar eru þurrkaðar upp. Innfæddir koma svo og safna verðmætum málmum og selja. Win-win, eða hvað?

Bandaríkjamenn ætluðu sér nú ekki að vera svona lengi í Afganistan til að byrja með, en eins og þeir sem hafa séð Rambo III vita þá vilja innfæddir frekar deyja en vera þrælar og eru þar með ósigrandi. Bandaríkjamenn eru í 20 ár búnir að reyna byggja upp innlendan her til að verja stjórnvöldin sem þeir settu á laggirnar, með gjörspilltan og óvinsælan forseta í brúnni. Margir innfæddir hafa skráð sig í þennan her og fengið sinn riffil og sjást svo aldrei aftur. Menn sem eru ekki til hafa verið skráðir og þeim borgað. Kostnaðurinn við að reka þennan her er slíkur að hann myndi sliga efnahag Afganistan ef innfæddur ætluðu sjálfir að standa undir honum, og dugði svo auðvitað ekki í korter til að verja sín svæði.

Ég stend með Joe Biden í þessu máli og finnst hann sýna hugrekki að standa á sínu og ætla koma Bandaríkjamönnum út. Kannski útfærslan hefði mátt vera önnur og allt það en aðalatriðið er að komast út. Og núna þarf að hætta að sprengja konur og börn í loft upp. Þá geta Afganir byrjað að taka á eigin vandamálum, og þeir mega alveg biðja um hjálp.

22 þúsund látist í loftárásum Bandaríkjanna

Þörf á nýjum hugtökum

Sagt er að tæplega 250 þús. Íslendingar séu bólusettir að fullu, þ.e. hafa fengið hinn upphaflega fjölda af sprautum af hinum ýmsu sprautuefnum (yfirleitt tvær).

Eitthvað þurfa yfirvöld að byrja hugleiða ný hugtök og venja almenning á að sprautunum mun fjölga. Nú er bara talað um örvunarsprautu og bráðum örvunarsprautur en senn kemur að því að upphaflegu sprauturnar verða ekki taldar nóg og menn fara að missa dýrmætu frelsisvegabréfin sín - bólusetningarvottorðið eða hvað það nú heitir.

Kannski yfirvöld ættu að byrja tala upp "upphaflega bólusetningu" og síðan "framhaldsbólusetningu". Heiðarlegast væri að telja fjölda sprauta án allra þessara nýyrða. Fyrsta sprautan, önnur, þriðja og fjórða.

Já, ég segi fjórða því Ísrael er komið þangað.

Í Ástralíu er talað um endurteknar sprautur "forever".

Í Danmörku, Íslandi og víðar er enn notað varfærnara orðalag en sífellt gefið til kynna að sprauturnar fjara mjög hratt út. Svolítil örvun núna fyrir þá öldruðu (þriðja sprautan). Næst kemur að þér. Síðan þarf aðeins að örva þá eldri (fjórða sprautan). Næst kemur að þér. Þetta tungutak mun smátt og smátt koma upp á yfirborðið eins og litlar loftbólur í vatni og síðan kemur sprengjan: Þú ert óbólusettur!

En ég stóð í minni röð og bauð minn handlegg!

Já, en það er ekki nóg lengur. Þú þarft þriðju sprautuna og þá fjórðu og svo framvegis!

Sóttkví!

Ferðatakmarkanir!

Uppsögn úr vinnu!

Nema þú fáir fleiri sprautur auðvitað.

Er ekki komið nóg?

25 smit innanlands

Fjórða sprautan og annað gott

Fullbólusettur? Með þínar tvær sprautur og jafnvel þrjár og vottaður af yfirvöldum? Engar takmarkanir fyrir þig lengur?

"Think again", eins og sagt er. Í Ísrael er búið að sprauta þrisvar í marga og nú er talað um fjórðu sprautuna og því bætt við að ný sprauta á 5-6 mánaða fresti sé sennilega nauðsynleg. Í Bandaríkjunum er talað á svipuðum nótum. Íslendingar mega búast við að fjórðu sprautunni verði smátt og smátt laumað inn í opinbera umræðu, tröppuð upp og loks gerð að hinu nýja viðmiði. 

Á sama tíma er talað um meinta hættu vegna nýrra afbrigða á unga krakka og pressa á að sprauta þá líka. 

Heldur þú að þetta hætti einhvern tímann? 

Þú fékkst þínar sprautur gegn mænusótt, mislingum og hvaðeina. Þú ert fylgjandi bólusetningum! En hafðu í huga að þú fékkst þá efni sem er búið að þróa og prófa í áratugi og líkurnar á alvarlegri aukaverkum einn á móti hálfri til heilli milljón (ein á 40 ára fresti í íslensku samhengi). Þessar nýju sprautur eru víðsfjarri slíkum viðmiðum. Bara á Íslandi eru um 2200 kvenmenn, niður í 12 ára aldur, í lokuðum hópi fyrir þær sem hafa orðið fyrir röskunum á tíðarhringnum í kjölfar sprautu. Fyrir um 3 vikum lamaðist ung stúlka fyrir neðan mitti í kjölfar sprautu og hefur horfið af radar fjölmiðla í kjölfarið, enda enn lömuð, kannski og kannski ekki til lífstíðar. Ungir karlmenn eru að upplifa hjartabilanir. Erlendis er talað um týndar kynslóðir skólabarna og raðnauðganir á ungum stúlkum sem óbeinar afleiðingar sóttvarnaraðgerða. Sprauturnar eru jafnvel sendar til vanþróaðri ríkja til að koma starfsfólki aftur á færiböndin til að framleiða fyrir þá ríku. Á meðan er Alþjóðaheilbrigðismálastofnunin (WHO) hunsuð þegar hún biðlar til þeirra ríku að sprauta minna af börnum og láta þess í stað veikburða í fátækari ríkjum fá sínar sprautur. 

Hjarðónæmi leysir vandann! Ekki satt? Jú, vissulega. En hvað er hjarðónæmi? Sumir tala um slíkt þegar er búið að sprauta 70% alla yfir 16 ára aldri. Sumir tala um að slíkt ónæmi muni aldrei nást því dýr geta hýst veiruna og hún fer svo af stað við gott tækifæri. Þess í stað sé betra að tala um "praktískt" hjarðónæmi. Á Íslandi er búið að sprauta og sprauta og mun fleiri en í flestum öðrum ríkjum en umræðan um hjarðónæmi er varla til staðar. Hraðpróf er nýjasta nýtt í endalausri framlengingu á takmörkunum og jafnvel ekki óumdeilt því menn eru nú að tala um að skipta út tilviljanakenndum sóttvarnaraðgerðum út fyrir aðrar tilviljanakenndar aðgerðir. Allir í stuði að boða sína stjörnuspá. 

Þetta hættir aldrei nema við lærum að lifa með veirunni og treysta læknum, og leyfa þeim auðvitað að ræða og prófa meðhöndlanir. Læknar eru ekki hópur hauslausra hæna og vitleysinga sem læra ekkert nema fá skilaboð frá skriffinnum, og það er slæm hugmynd að setja öll eggin í körfu yfirvalda sem hlaupa eins og naut á eftir lituðu flaggi (næsta minnisblaði). 

Treysta vísindunum? Auðvitað.

Treysta stjórnmála-, embættis- og blaðamönnum? Ástæður til að gera það verða færri og færri, dag frá degi.

Veira og trúarbrögð

Baráttan gegn veiru er í síauknum mæli farin að taka á sig búning trúarbragðs.

Vísindin eru útkljáð! Rangt. Alltaf. 

Grímur virka! Kannski, í ákveðnum aðstæðum.

Bóluefnin verja! Nema þegar þau gera það ekki.

Fjarvera veirusmita er mikilvægari en skólahald! Eða ekki.

Hárgreiðslustofur smita! Þær þurfa að loka! Sagði engin gagnaruna.

Þegar trúarbrögð og tilvísanir í vísindi sem finnast ekki verða eitt og hið sama þá læðist á mann bros. Úr frétt (Google Translate):

Slovakia lifted bans on non-vaccinated for Pope visit

Upprunaleg frétt.

Já, rétt: Í Slóvakíu átti að meina ósprautuðum að hitta páfann. Þessu var mótmælt (ég gef mér það þótt fréttin beri á borð aðrar útskýringar). Núna mega ósprautaðir hitta páfann.

Eru yfirvöld gengin af göflunum? Á að hætta á nýja flóðbylgju smitaðra? Er Slóvakía ekki að bugast undan smitum og dauðsföllum? 

Róleg! Páfinn er að koma. 

Vísindi? Trúarsetningar? Skilin eru orðin svo óljós að það má óhætt blanda báðu saman.

Löngu hætt að snúast rannsóknir og vísindi

Í flestum tilvikum er ekki brýn þörf á örvunarskammti af bóluefni gegn Covid-19 hjá fullbólusettu fólki. Þetta er mat Sóttvarnastofnunar Evrópu og Lyfjastofnunar Evrópu.

Niður­stöður nýrr­ar rann­sókn­ar benda til þess að Delta-af­brigði kór­ónu­veirunn­ar valdi ekki al­var­legri veik­ind­um hjá börn­um en önn­ur af­brigði veirunn­ar. Rann­sókn­in var unn­in af banda­rísku sótt­varna­stofn­unni (CDC), að sögn mbl.is.

Ráðgjafarnefnd breskra stjórnvalda hafnar almennri bólusetningu 12-15 ára barna. Ákvörðunin grundvallast á því að áhætta vegna hjartavöðvabólgu sé of mikil til að það réttlæti bólusetninguna, í ljósi þess hversu lítil hætta unglingum stafar af pestinni. Einungis er mælt með henni fyrir unglinga sem eru í áhættuhópum. Þetta er skv. frétt BBC.

Og hvað gera yfirvöld víðast hvar, engu að síður? Jú, sprauta þrisvar (til að byrja með) og allt niður í unga krakka.

Vísindi og rannsóknir eru fyrir löngu aftengd sóttvarnaraðgerðum og sprautuherferðum víðast hvar. Það sem yfirvöld í hverju ríki kalla vísindi eru lítið annað en staðbundnar uppfinningar og inngrip stjórnvalda i nafni vísinda. Þegar stjórnmálamenn bjóða vísindamönnum til umræðu og viðræðurnar falla ekki að meginstefinu er þeim úthýst frá helstu samfélagsmiðum (og þurfa að fá skjól á öðrum miðlum). 

Það sem vantar, og sárvantar, er gagnrýnin hugsun sem stuðlar að opinskárri og opinberri umræðu.

Kannski verður niðurstaðan sú að skólagöngu og félagslífi barna eigi að fórna til að níræður verði tíræður. Kannski verður samstaða um að það þurfi að fórna lífinu til að halda lífi. Kannski er best til lengri tíma að taka á sig fátækt, þunglyndi, áfengissýki og einhver sjálfsmorð til skemmri tíma og fá í staðinn regnbogalitaða og veirufría framtíð.

Kannski. En sú umræða hefur ekki farið fram. Því miður.

Telja oftast ekki brýna þörf á örvunarskammti

Predikað úr fílabeinsturninum

Frambjóðendur Vinstri grænna og Samfylkingar segja að draga þurfi úr neyslu til þess að bregðast við loftslagsvá. Sennilega er hér átt við að nota gagnslaus pappírsrör í staðinn fyrir plaströr, nota hjólið til að hjóla á milli hverfa til að kaupa áfengi og gleyma vinum og ættingjum erlendis og hvað þá að kynnast erlendum menningarheimum í sama mæli.

Til að berjast við loftslagsvá, auðvitað.

Á meðan ætla Asíuríki, og þá aðallega Kína, að byggja 600 ný kolaorkuver á næstu árum. Og hafa góðar ástæður til að gera það.

Á meðan Kínverjar byggja undir hagvöxt sinn og ferðast í auknum mæli um heiminn þá ætla Vesturlandabúar að skjóta sig í fótinn og binda sig við túnfótinn. 

Ríkidæmi er ein besta umhverfisvernd sem til er. Þegar fólk kemst út úr sárustu fátæktinni hættir það að líta á skóginn sem eldivið og fer að sjá hann sem hluta af verðmætri náttúru. Þess vegna gengur skóglendi nú víða fram þar sem það var áður hoggið niður. Skóglendi á stærð við Frakkland hefur vaxið með náttúrulegum hætti síðan árið 2020 skv. einni rannsókn. Heimur batnandi fer og það allt.

En auðvitað má rekja talið í fílabeinsturninum til einnar trúarsetningar sem er sú að losun manna á koltvísýring í andrúmsloftið hafi afgerandi áhrif á loftslagið. Þeir sem trúa þessari trúarsetningu gera sig fátækari, viljandi, og aðrir sjá tækifæri í því.

Vonandi kjósa sem fæstir stjórnmálamenn sem vilja nota ríkisvaldið til að skerða lífskjör almennings.

Vilja að almenningur dragi úr neyslu