Sjálfkrýndi samfélagssérfræðingurinn

Geir Ágústsson

Faðir.
Skattgreiðandi í Danmörku (í bili).
Verkfræðingur.
Höfundur tveggja bóka um skilvirkni og einnar um allt annað sem er undir dulnefni.
Pistlahöfundur með óreglulegu millibili. 

Netfang: geirag@gmail.com

********************************

Orðabók síðuhöfundar

Ég nota mörg orð sem ég set mjög ákveðna merkingu við, og til að forðast allan misskilning á orðavali mínu kemur hér örlítil "orðabók" með skilgreiningum mínum á nokkrum orðum (sem ég nota samt ekki alltaf í strangasta skilningi skilgreininganna, en ég reyni):

Vinstrimaður: Einstaklingur sem er gjarn á að tortryggja hinn frjálsa markað og stækkun hans, líta jákvæðum augum á núverandi og vaxandi umsvif hins opinbera, og mótmæla sjaldan eða aldrei þegar ríkisvaldið eykur umsvif sín á kostnað hins frjálsa framtaks.

Jafnaðarmaður: Einstaklingur sem fer sér hægt í að boða ríkisafskipti af atvinnulífi og markaði, en lítur jákvæðum augum á ríkisafskipti af mennta- og heilbrigðiskerfi (þar sem skattgreiðslur eru notaðar til fjármögnunar) og vill að vill að ríkið haldi úti almannatryggingakerfi sem m.a. nær til atvinnuleysis-, ellilífeyris- og sjúkratrygginga. Talar gjarnan fyrir ríkiseinokun í þessu samhengi, en það er ekki algilt. Sjaldgæft orð í mínum orðaforða því "jafnaðarmenn" eru yfirleitt vinstrimenn - þeir eru a.m.k. yfirleitt mun mótfallnari því að láta flokka sig til hægri frekar en vinstri.

Hægrimaður: Einstaklingur sem tortryggir ríkisrekstur og skattlagningu, en lítur jákvæðum augum á frjáls viðskipti á frjálsum markaði. Hægrimaðurinn fagnar og styður útvíkkun hins frjálsa markaðars á kostnað ríkisumsvifanna. 

Íhaldsmaður: Íslenskur íhaldsmaður lítur yfirleitt jákvæðum augum á aukin umsvif hins frjálsa markaðar og minnkandi ríkisumsvif, en tortryggir samt gjarnan of mikla "opnun" Íslands, t.d. fyrir erlendu fólki, og er gjarn á að líta jákvæðum augum á ýmsar "menningarlegar" stofnanir sem ríkið stjórnar með beinum eða óbeinum hætti, t.d. Þjóðkirkjan og ýmisleg (há)menningarstarfsemi.

Sósíalisti: Sósíalisti er einstaklingur sem felur ekki vinstrieðli sitt (ólíkt mörgum vinstrimönnum sem kalla sig frjálslynda og markaðsvelviljaða), og boðar með beinum hætti aðgerðir gegn hinu frjálsa framtaki með notkun ríkisvaldsins.

Ríkissinni: Léleg þýðing á enska orðinu "statist" - sá sem er hlynntur ríkisvaldinu sem hugmynd. 

Bannsinni: Sá sem er hlynntur afskiptum ríkisvaldsins af eignum og líkömum einstaklinga. Bannsinni getur vel viljað að ríkið banni sumt en leyfi annað, en ef viðkomandi er hlynntur því að ríkið eigi að geta hlutast til með eigur og líkama einstaklinga þá er viðkomandi í strangasta skilningi bannsinni í mínum augum.

Frjálsyndi: Það að vilja að sem flest sé sem frjálsast, þ.e. laust við afskipti ríkisins og fái að þróast af sjálfu sér í frjálsum samskiptum og viðskiptum einstaklinga og fyrirtækja þeirra. Fellur að mínu mati vel saman við hugtakið "hægri" sem boðar sem mest umsvif hins frjálsa framtaks og sem minnst umsvif hins opinbera.