Til hvers?

Lyfjaframleiðendurnir BioNTech og Pfizer stefna á að veita 12 til 15 ára gömlum börnum í Evrópu bóluefni í júnímánuði.

Til hvers?

Meira að segja hörðustu klappstýrur yfirgengilegra sóttvarnaraðgerða hljóta að setja spurningamerki við þetta.

Hér er t.d. fjöldi dauðsfalla deilt upp í aldurshópa í Svíþjóð:

Dauðsföll undir 29 árum (þar með taldir allir með undirliggjandi sjúkdóma, í slæmu líkamlegu ástandi og bælt ónæmiskerfi): 0

Og Danmörk:

Dauðsföll undir 29 árum (þar með taldir allir með undirliggjandi sjúkdóma, í slæmu líkamlegu ástandi og bælt ónæmiskerfi): 1

Bóluefnin eru e.t.v. áhættunnar virði fyrir þá sem eru mjög viðkvæmir fyrir veiru. En fyrir aðra? Ekki. Og alls ekki krakka. Bara alls ekki.

Stefna á bóluefni fyrir börn í júní

Alið á útlendingahatri

Á Íslandi starfa og búa mörg þúsund útlendingar. Þeir eru ekki að ferðast að gamni sínu. Sennilega eru einhverjir að sækja pappíra frá heimalandinu og aðrir að fara í jarðarfarir. Ferðalög eru dýr og kosta líka marga daga í sóttkví. Þetta eru nauðsynleg ferðalög.

En þetta helvítis útlendingapakk smitar, ekki satt?

Að vísu er ekki talað um helvítis útlendingapakk heldur fólk að koma frá útlöndum sem er með heimili og atvinnu á Íslandi, eða álíka. 

Það er búið að hræða líftóruna út úr mörgum landanum og óbeint stuðla að útlendingahatri. Í boði yfirvalda.

Öfgafull skilaboð vegna hópsmita

Arðræningjar!

Í svolítilli frétt um risastóran þorsk kemur fram að örfáir menn mali nú gull úr sameiginlegri auðlind þjóðarinnar með því að gerast nánast ekki neitt, nema eiga veiðiheimildir! 

Já, þessir kvótaeigendur. Þeir borga alls ekki nógu mikið í skatt og sitja bara á rassgatinu og kaupa og selja í gegnum netið. Fiskurinn syndir svo sjálfviljugur upp í körin hjá þeim sem eru seld fyrir uppsprengt verð á uppboðum örvæntingarfullra neytenda og veitingastaða sem hafa varla efni á fiskbitanum.

Nei, væri þá ekki betra ef duglegir borgarbúar, kennarar og háskólaprófessorar gætu eignast hlut í öllum þessum verðmætum. Þeir vita hvar bestu miðin eru fyrir hverja fisktegund og á hvaða árstímum þær eru gjöfulastar. Þeir vita hvar markaðurinn borgar best og hvernig má koma hráefninu á hann á sem skilvirkastan hátt. Þeir kunna að haga seglum eftir vindi, safna í sjóði þegar vel veiðir til að eiga fyrir stærri útgjöldum seinna. 

Arðræningjar með risaþorsk ættu að skammast sín og reyna að setja sig inn í þarfir annarra landsmanna sem fá enga risaþorska til að selja.

(Fyrir óinnvígða er ég auðvitað ekki að meina orð af þessu. Mér finnst að sjómenn eigi að fá að eiga sín atvinnutæki eins og bændur og halda reykvískum Excel-skjölum eins langt frá daglegum rekstri þeirra og mögulegt er.)

Veiddu 51 kílós þorsk

Ávinningurinn hefur ekki skilað sér enn

Líkurnar á að smitast af Covid-19 minnka verulega eftir fyrri bólusetningu með bóluefnum AstraZeneca og Pfizer að því er fram kemur í niðurstöðum nýrrar breskrar rannsóknar. En mun það gera það að verkum að yfirvöld afnemi sóttvarnaraðgerðir? Það á eftir að koma í ljós.

Í dag er áherslan á Íslandi og víðar (síður í Danmörku) á smit.

Hópsmit!

Smit í samfélaginu!

Smit á landamærunum!

Smit í leikskóla!

Smit í togara!

Markmiðið er að útrýma veirunni. Útrýma smitum. 

Það er markmið sem sóttvarnarlæknir Íslands sagði að væri ómögulegt en er núna markmiðið. Markmiðið er sem sagt ómögulegt.

Gildir þá einu að aldraðir og þeir með undirliggjandi sjúkdóma hafi fengið bólusetningu og að sú bólusetning sé talin veita góða vörn.

Gildir þá einu að flest smita eru meðal ungs fólks sem veit oft ekki að það er að breiða út veiru og hvað þá að það verði lasið og ónáði hið ofurviðkvæma heilbrigðiskerfi sem allt í einu er ófært um að rækta hlutverk sitt.

Svo já, bóluefni eru útbreidd, komin í flesta sem eru viðkvæmir fyrir veiru og þau talin veita góða vernd. En Þjóðhátíð í Eyjum fær samt ekki að fara fram árið 2021. Það er mín spá.

Umtalsverður ávinningur af bólusetningu

Hvenær fer veiran að sofa?

Í nafni sóttvarna hafa mörg ríki og ýmsar smærri stjórnunareiningar brugðið á það ráð að loka öllum veitingastöðum á sama tíma á stóru svæði.

Hugsunin er væntanlega sú að þar með segi allir góða nótt og fari heim til sín, þá helst án þess að rekast á þúsundir einstaklinga á sömu vegferð.

En hver hefur raunin verið? Jú, sú sama og þegar öllu var lokað á sama tíma á Íslandi þegar ég var unglingur: Götuhátíð! Þúsundir einstaklinga hrökklast út þaðan sem þeir voru dreifðir á fjölda staða og út á götu, og þjappast saman í stórt mannhaf.

Var engin athugasemd í Excel-skjölunum um að þetta gæti gerst?

Vilja að ölið flæði fram á rauða nótt

Sóttvarnarlæknirinn sem missti bæði heyrn og sjón

Í Bandaríkjunum var sóttvarnarlæknir alríkisins, Dr. Fauci, nýlega í yfirheyrslu hjá bandarískri þingnefnd. Þar átti Dr. Fauci að gera grein fyrir yfirlýsingum sínum og hvernig þær hafa ræst.

Í stuttu máli varð sóttvarnarlæknirinn bæði blindur og heyrnalaus þegar kom að því að svara.

Svona lagað getur jú alltaf gerst.

Hvenær kemur að því að eitthvað svipað komi fyrir þann íslenska?

Blaðmaður og fréttaskrif

Fulltrúadeild Bandaríkjaþings samþykkti í dag frumvarp um að gera höfuðborgina, Washington, að 51. ríki Bandaríkjanna.

Já, þetta er áætlunin. Blaðamaður byrjar vel. En svo rúllar hann meðvitundarlaus niður brekku. 

Ákveðin áætlun er í gangi í Bandaríkjunum til að tryggja að Demókrataflokkurinn þurfi ekki lengur að eiga við Repúblikana. Hún er einföld.

Í fyrsta lagi að bæta District of Columbia (stjórnmálaelítan og fjölskyldur þeirra) og síðar Puerto Rico (velferðarþegnar sem vilja bætur) í hóp fullgildra ríkja. Bæði kjósa yfirgnæfandi Demókrata. Þar með er meirihluti þeirra á þingunum tryggður.

Í öðru lagi að fjölga dómurum í Hæstarétt Bandaríkjanna með því að bæta við Demókraka-hlynntum dómurum við réttinn. "Pack the court" ef einhver vill slá inn í leitarvél (aðra eða Google ef nothæfar niðurstöður eiga að koma fram).

Þetta heitir lýðræði og tryggir að rödd almennings heyrist.

Ekki satt?

Frumvarp um 51. ríkið komið til öldungadeildar

Nokkrir vel þekktir fyrirvarar (við alla löggjöf)

Einstaka þingmenn innan þingflokks Sjálfstæðisflokksins settu fyrirvara við afgreiðslu frumvarps Svandísar Svavarsdóttur heilbrigðisráðherra, um breytingar á sóttvarnalögum.

Ekki þarf að vera mjög frumlegur til þess. Það er nóg að lesa stjórnarskrá íslenska lýðveldisins. Þar eru margir fyrirvarar sem gilda um alla löggjöf.

Úr 66. grein:

Íslenskum ríkisborgara verður ekki meinað að koma til landsins né verður honum vísað úr landi.

Allir, sem dveljast löglega í landinu, skulu ráða búsetu sinni og vera frjálsir ferða sinna með þeim takmörkunum sem eru settar með lögum.

Úr 67. grein:

Hver sá sem er af öðrum ástæðum sviptur frelsi á rétt á að dómstóll kveði á um lögmæti þess svo fljótt sem verða má. Reynist frelsissvipting ólögmæt skal hann þegar látinn laus.

Úr 71. grein:

Allir skulu njóta friðhelgi einkalífs, heimilis og fjölskyldu.

Fyrirvarar við sóttvarnalög hjá Sjálfstæðisflokki

Loksins! Loksins! Eða hvað?

Árið er 2020 og það er sumar. Þríeyki fá fálkaorðu, landamæri opnast 14. júní og júlíveðrið er gott. Íslendingar ferðast innanlands og bjartsýni ríkir. Í Vestmannaeyjum undirbúa menn Þjóðhátið. Þetta er búið!

En hvað gerist þá? Franska afbrigðið kemur til landsins! Smitum fjölgar úr nánast engu í eitthvað smá.

2. bylgja! Franska afbrigðið! Öllu er skellt í lás á ný, grímuskylda Kínverjanna dregin upp úr hattinum, Þjóðhátíð blásin af og framundan er mikil fjölgun smita sem mótefnalaus þjóðin hefur engan hemil á og veiran nær því að lokum inn á ganga Landakots (Landakotsklúðrið) og fólk týnir lífi (en hvorki fyrr né síðar). 

Síðan þá er liðinn langur tími, vægast sagt, og nú í lok apríl 2021 er loksins lögð fram áætlun eftir mikinn þrýsting frá bæði þeim örfáu þingmönnum sem þora að tjá sig og fjölda annarra aðila svo vikum skiptir.

En trúir því einhver að bólusetningar muni leiða til þess að Þjóðhátíð 2021 verði haldin? Að menn hætti að einblína á smit (unga fólksins)? 

Nei, smit verða áfram miðpunktur athyglinnar, óháð því hver er smitaður og hver er bólusettur.

Ég veðja á að Þjóðhátíð 2021 verði blásin af þegar 6. eða 7. svokallaða bylgjan skellur á í lok júlí. Déjà vu.

Öllu aflétt innanlands fyrir 1. júlí

Margur gerist sóttvarnarlæknirinn

Landamærin! Já, það er orsökin! Uppruninn!

Eða hvað? Nýlega sagði sóttvarnarlæknir Íslands að veiran væri í samfélaginu. Sem sagt, lægi í laumi og blossaði upp, og rakningarteymi standa á gati.

Þarna hitti sóttvarnarlæknir auðvitað naglann á höfuðið, ótrúlegt en satt. Veiran er orðin landlæg. Hún fer ekkert. Þar til nýlega var þetta alveg vitað en núna er talað um að hægt sé að útrýma henni með margföldum skimunum og innilokun á fólki og hvaðeina, jafnvel í trássi við lög og alþjóðlega samninga um mannréttindi.

Kannski Herra Hnetusmjör verði nú hluti af fimmeykinu (Fálkaorðu-þríeykið + heilbrigðisráðherra + Kári Stefánsson). Sexeykið skal það heita. Þetta fer að nálgast fjöldann sem fylgdi hringnum úr hlaði áleiðis að Mordor. Það var skáldsaga sem endaði vel. Við lifum í raunveruleikanum. Held ég.

Í öðrum fréttum er það helst að Danir opna barina á morgun, ætla að rýmka takmarkanir á landamærum og telja sig, með allar sínar tengingar við umheiminn, í lofti og á láði, hafa náð tökum á ástandinu þökk sé takmörkunum og skimunum. Enda búið að vera veðurblíða, fólk mikið úti og vor í lofti. Sennilega eintóm tilviljun eins og sú sem rambar í hendur íslenskra yfirvalda í lok maí, eins og í fyrra.

En úbbs, þarna gerðist ég enn einn sóttvarnarlæknirinn! Því fleiri því betra. Herra doktor Sviðasulta, góðan daginn.

Smit hjá leikskólabörnum fyllti mælinn