Ef ég væri Sóttólfur

Í stað eins minnisblaðs legg ég til annað: 

Kæri stjórnmálamaður, sem þorir á engan hátt að skoða heildarmyndina,

Einhver maður lagði nú til að veiran væri skárri ef 20 manns hittast miðað við 50 manns og að hún ferðist ekki lengur yfir tvo metra heldur einn. Ég legg til að enginn fái að hittast og að einn eða tveir metrar verði að hundrað metrum.

Ég hef séð yfirlýsingar þess efnis að nú sveimi gjörsamlega ný veira um loftið, gjörólík þeirri fyrri. Ég legg því til að sprauta margfalt meira með efnum sem voru hönnuð gegn annarri veiru en nú sveimar um.

Svo virðist sem heilbrigðiskerfið sé alltaf á vonarvöl þótt þar sé álagið svipað og jafnvel minna en áður. Til að verja það legg ég því til að banna eiginlega allt, gegn fjársektum.

Ég legg til að banna óþolandi smásmuguhátt í þýðingu á erlendum rannsóknum. Lítið er að marka þær. Aðgerðir miðist við agnarsmá úrtök þar sem hvert einasta tilvik af einhverju fær öll línurit til að líta út eins og rússíbana á hraðri upp- eða niðurleið. Og sé eitthvað á uppleið má innleiða skerðingar í samfélagi manna. Ekki öfugt, auðvitað.

Mér finnst frábært að öll andmæli við holótta visku mína séu kölluð samsæriskenningar. Fyrir utan baráttu samfélagsmiðlanna gegn slíkum andmælum legg ég til að blaðamenn, í auknum mæli, úthúði öllum sem fallast ekki á skoðanir eins manns. Og þegar ég segi skoðanir þá meina ég hinn eina sanna sannleika.

Það er einlæg von mín að tillögum mínum verði veitt brautargengi í gegnum einfalda reglugerðasmíði eins ráðherra. Ég er jú með afborganir og útgjöld og má ekki við því að gerast eitthvað möppudýr, aftur.

Virðingarfyllst,

Æðstistrumpur

Leggur til 20 manna samkomutakmarkanir

Sóttvarnalæknir vill sprauta börnin þín en segir það tilgangslaust

 „En tvær sprautur vernda lítið sem ekkert,“ segir Þórólfur Guðnason, svokallaður sóttvarnalæknir Íslands.

Með öðrum orðum:

Fyrsta sprautan rennur hratt út og virkar lítið sem ekkert.

Önnur sprautan rennur hratt út og virkar lítið sem ekkert.

Á hvaða tilgangslausu sprautu er barnið þitt?

Mun þriðja sprautan virka?

Hvenær kemur hún? 

Hvað bendir til að hún endist betur?

Hvaða áhrif getur sprauta 1, 2 eða 3 haft á barnið þitt? 

Núna þarf þetta glórulausa kjaftæði að stoppa.

Samsæriskenningar!

Hart var tekist á um bólusetningar og frelsi fólks í heimsfaraldi í þættinum Sprengisandi á Bylgjunni í morgunn þar sem Tómas Guðbjartsson læknir og Arnar Þór Jónsson [lögfræðingur,varaþingmaður og fyrrverandi dómari] mættu og ræddu ábyrgð í faraldrinum. 

Loksins er tekist á! Umræðan er búin að vera svo skelfilega einsleit að það jafnast á við alla svokallaða umræðu um ágæti þess að gera orku óaðgengilega og dýra fyrir fátæka Jarðarbúa (það sem sumir kalla baráttu gegn loftslagsbreytingum).

Kannski þáttarstjórnandi Sprengisands hafi tekið stærra og mikilvægara skref en hann grunar.

Auðvitað eru öll andmæli á hina séríslensku nálgun á veiruvarnir kölluð samsæriskenningar. Munið að ekki er verið að tala um vísindi. Vísindin er mismunandi í hverju ríki. Samkvæmt sumum vísindum á að sprauta krakka með nýjum og lítið rannsökuðum efnum til að verja þá gegn veiru sem er þeim frekar skaðlaus. Samkvæmt öðrum vísindum er þetta áhættusamt glapræði. Á Íslandi er einn maður sem er frekar ólæs á enskan texta og frekar illa að sér í því sem er að gerast meðal vísindamanna erlendis sem hefur fengið nánast einokunarrétt til að tala í nafni vísinda. Kannski það sé loksins að breytast.

Nú eru fyrstu fregnir af alvarlegum aukaverkunum meðal 5-11 ára barna byrjaðar að seytla upp á yfirborðið frá ríkjum sem byrjuðu snemma að sprauta. Ekki veit ég hvað þarf til að fólki byrji að hugleiða kosti og galla í þessu samhengi. Vonandi þarf ekki að svipta mörg ung börn heilsunni til að fá foreldra til að slíta sig frá sjónvarpsfréttunum og kynna sér málin. Mikið traust á hin vel þekktu, vel rannsökuðu og þrautreyndu bóluefni er ranglega að smitast yfir á hin nýstárlegu, lítið prófuðu og stórhættulegu efni. Þarf eitthvað barn að deyja áður en það traust er farið?

Tekist á um bólusetningar og frelsi fólks

Ekkert vitað - lokum öllu

Hið svokallaða ómíkron-afbrigði SARS-CoV-2 veirunnar ferðast nú með ógnarhraða um heiminn. Smitmet eru slegin víða og eins og allir vita eru smit og sprautufjöldi einu mælikvarðar yfirvalda víðast hvar.

Að sjálfsögðu er ekkert vitað um veikindi og hættuna á alvarlegri sýkingu enda of skammur tími liðinn síðan hið nýja afbrigði fór á sjá. Þess vegna þarf að loka öllu.

Ekki er vitað hversu vel sprauturnar virka á þetta afbrigði enda of skammur tími liðinn. Þess vegna þarf að sprauta meira.

Hættan á spítalavist og dauðsföllum er óþekkt enda of skammur tími liðinn. Þess vegna þarf að herða takmarkanir.

Áhættuhópar (aldur, kyn) eru með öllu óþekktir og þess vegna þurfa takmarkanir að ná til allra, líka ungs fólks. Það gæti jú verið í hættu en ekki vitað enn enda of skammur tími liðinn. Þess vegna þarf að takmarka næturlífið og loka snemma.

En þarf ekki að styðjast við rannsóknir? Það má jú ekki gefa fyrirbyggjandi lyf eða veita snemmmeðferðir því alltaf er talinn með vera mikill skortur á rannsóknum. Nei, þegar kemur að því að rökstyðja lokanir og sprautur þá þarf engar rannsóknir. Þegar kemur að því að selja sprautur og lokanir þá duga litlar og ófullnægjandi rannsóknir. Þegar kemur að því að meðhöndla sjúklinga og aðstoða lækna þá þarf margra ára rannsóknir. Annars ertu samsæriskenningasmiður, sjáðu til.

Annars geta ég glatt lesendur með því að fyrstu rannsóknir á hinu nýja afbrigði gefa tilefni til bjartsýni. Ekki hefur verið tilkynnt um dauðsfall vegna ómíkron á heimsvísu (einn Breti dó með ómíkrón, en úr einhverju öðru). Í Suður-Afríku hrundi álagið á heilbrigðiskerfið þegar afbrigðið gekk þar yfir. Afbrigðið verður ekki stöðvað og fólk kemur alveg af fjöllum þegar það fær það og getur ekki rakið til neins, fær svolítið kvef og hlakkar til að fá uppfært leyfi til að taka þátt í samfélagi manna.

En kannski þetta sé ekki nóg. Kannski dugar að loka öllu og sprauta meira. Vísindin hafa yfirgefið bygginguna.

Ómíkron breiðist út „á ljóshraða“

Svíar að tapa geðheilsunni?

Í Svíþjóð er einhver nýr skipstjóri kominn í brúna og manni finnst tónninn frá Svíþjóð vera að hljóma sífellt meira af geðshræringu. En er ekki tilefni til? Veiran á fullu, ekki satt?

En auðvitað er allt afstætt. Það sem áður var kallað vísindi og var samþykkt meira og minna um allan heim heita nú heimavísindi. Hvert ríki er með eigin vísindi. Samkvæmt sumum slíkum vísindum er manni óhætt á veitingastað á meðan maður situr en í hættu þegar maður labbar á klósettið. Sum vísindin brennimerkja börnin sem óhreina smitbera en önnur síður. Sum vísindi hampa þeim sprautuðu og sleppa þeim við skimanir og próf á meðan aðrir þurfa að láta pota endalaust í sig ef þeir vilja borða á kaffihúsi eða mæta í vinnuna en sum vísindi skima líka þá sprautuðu og telja sprauturnar aðallega vera gott tæki til að kenna almenningi hlýðni og fylgispekt. Sum vísindi boða hættulegar sprautur í hrausta krakka en önnur ekki. Sum vísindi byggjast á tölfræði með agnarsmá úrtök en önnur reiða sig á stærri rannsóknir.

Sem betur fer ákvað þessi blessaða veira og hið nýja afbrigði að taka svolítið stökk yfir jólin og minnka þannig efnahagslegar hörmungar vegna aðgerða yfirvalda. Danir blása sennilega í harðar aðgerðir í dag en ætla ekki að loka verslunarmiðstöðvum eins og svo oft áður. Það er jú svo dýrt að bæta fyrirtækjum upp tapaða jólavertíð. Veiran bíður fyrir utan á meðan.

Eru Ísraelsbúar búnir að fá nóg af sprautum?

Í Ísrael ertu talinn óbólusettur einstaklingur ef meira en 6 mánuðir eru liðnir frá seinustu sprautu. Þar er verið að sprauta í þriðja skipti (og bráðum fjórða) og krakka niður í 5 ár. En nú er eins og Ísraelsbúar séu margir hverjir búnir að fá nóg. Margir ætla ekki að fara í þriðju sprautuna og eingöngu hefur tekist að stinga í um 10% 5-11 ára barnanna sem er lægra hlutfall en í t.d. Bandaríkjunum og Kanada. 

Þetta eru góðar fréttir og merki um að sprautuæðið taki kannski dag einn enda í Ísrael. Kannski dregur það eitthvað úr svimandi hagnaði sprautuframleiðenda en þeir hljóta að jafna sig.

Ég þekki persónulega nokkra sem hafa látið sprauta sig tvisvar en ætla ekki að láta sprauta sig í þriðja skipti. 

Hvað ætla yfirvöld að gera ef þeim tekst ekki að sprauta alla á hálfs árs fresti? Innleiða aðskilnaðarsamfélag? Mögulega og því miður ekki fjarstæðukennd hugmynd lengur. Sýndu heilsufarspappírana þína eða haltu þig heima! 

Annars er ég með spurningu:

Nú kom nýjasta afbrigðið upp í Suður-Afríku og vísindamenn þar í landi segja að hápunktinum sé jafnvel náð. Færri lögðust inn á spítala en í fyrri bylgjum. Eingöngu um 25% íbúanna eru það sem kallast fullbólusettir. Hvernig getur BBC þá þakkað bóluefnum fyrir að Suður-Afríka hafi sloppið betur en á horfðist?

Although either two doses of vaccine or a previous infection appear much less effective at stopping people catching the Omicron variant, they still seem to provide protection against severe illness.

Voru sprauturnar eins og fyrir mikla tilviljun nákvæmlega í þeim sem hið nýja afbrigði réðist á? Er kannski nóg að sprauta áhættuhópa til að koma í veg fyrir að samfélagið fari á hliðina? 

Málpípur meginstefsins, eruð þið hérna til að stinga upp á svari?

Er draumaafbrigðið loksins fætt?

Veirur eins og SARS-CoV-2 eru sífellt að stökkbreytast. Nú þegar eru nokkrar kórónuveirur á sveimi sem þú færð reglulega að rekast á og ýmist tekur ekki eftir því eða færð svolítið kvef. Veirurnar hafa gert sig eins smitandi og þær geta á kostnað þess hversu miklum veikindum þær valda. Þannig tryggja þær eigið framhaldslíf.

Spurningin hefur bara verið hvenær SARS-CoV-2 færi á þá vegferð.

Kannski er nýjasta afbrigðið, hvers nafn minnir mig svo mikið á skúrka í teiknimyndum að ég vil helst ekki skrifa það, slíkt afbrigði.

Svona hefur afbrigðið til dæmis farið með Suður-Afríku (heimild):

Læknar í Suður-Afríku voru alveg hissa þegar Vesturlönd aflýstu öllum flugum og innleiddu enn eina umferð takmarkana á frekar fátækt ríki sem má ekki við slíku. Allt bendir til að þeir hafi haft rétt fyrir sér og í raun og veru haft hjá sér lítið veikt fólk með hið hræðilega afbrigði en ekki verið að ímynda sér eitthvað. Já afrískir læknar eru kannski ekki jafnmiklir vitleysingar og fordómafullir Vesturlandabúar halda margir hverjir.

Sé draumaafbrigðið loksins komið á stjá er málið einfaldlega að húrra því í gegnum alla sem þola almennt haustpestirnar, byggja upp traust hjarðónæmi án aðkomu lyfjafyrirtækjanna og strengjabrúða þeirra og aflýsa þessu fáránlega ástandi örvinglunar sem er núna byrjað að snúast um að eitra fyrir ungum börnum með notkun afbökunar á tölfræði.

Ómíkron líklega í flestum löndum að sögn WHO

Týndist eitthvað í þýðingunni?

Nú þegar má sprauta krakka gegn veiru þá kemur allt í einu í ljós að veiran er krökkum svo hættuleg að það þarf að sprauta þá. En týndi sóttvarnalæknir einhverju í þýðingunni? Hann vísar í skýrslu og í útdrætti hennar segir (áhersla mín):

Severe COVID-19 remains rare among children (of 65 800 notified symptomatic COVID-19 cases in children aged 5-11 years, reported from 10 EU/EEA countries during the period of B.1.617.2 (Delta) variant of concern (VOC) dominance, 0.61% were hospitalised and 0.06% needed intensive care unit (ICU)/respiratory support).

Grípum niður í bloggfærslu sóttvarnalæknis:

Í samantekt Sóttvarnastofnunar Evrópusambandsins (ECDC) frá 1. desember sl. (https://www.ecdc.europa.eu/en/publications-data/interim-public-health-considerations-covid-19-vaccination-children-aged-5-11) kemur fram að 0,6% barna sem smitast af COVID-19 þurfa á spítalainnlögn að halda, 10% þeirra þurfa að leggjast inn á gjörgæslu og 0,006% smitaðra barna látast. ... Ef ofangreindar tölur eru yfirfærðar á íslensk börn á aldrinum 5-11 ára og öll börn á þeim aldri myndu smitast (32.000), þá gætum við búist við að 100-200 börn þyrftu að leggjast inn á sjúkrahús, 16 legðust inn á gjörgæsludeild og 1-2 börn myndu látast vegna COVID-19. 

Við þessa framsetningu er ótalmargt að athuga.

Í fyrsta lagi talar skýrsla ECDC um einkennasmit meðal barna. Sama skýrsla segir:

50% of positive cases among children aged 5-11 years were asymptomatic, as compared to 12% for adults.

Það má því strax helminga 0,6% töluna. Síðan má ekki gleyma því að ekki greinast öll smit ("notified" eins og segir að ofan). Enn lækkar því talan.

Og bætum því svo við að spítalinn á Íslandi hefur varla séð eitt einasta barn vegna Covid-19 nema ef vera skyldi að móðursjúkir foreldrar séu að draga heilbrigð og einkennalaus börn þangað eftir einhverja smitmælingu. 

Meira að segja öftustu vagnar í halarófunni sem eltir rassgatið á sóttvarnalækni hljóta að sjá að hér er verið að moða og mauka til að búa til neyðarástand sem þarf að laga með sprautu.

Án sprautunnar mun hin íslenska tölfræðin líta svona út fyrir 5-11 ára:

• Spítalainnlagnir vegna veiru: 0-1
• Gjörgæsluinnlagnir vegna veiru: 0
• Spítalainnlagnir vegna alvarlegra aukaverkana sprautu: 0
• Endurhæfingarmeðferðir vegna alvarlegra aukaverkana sprautu: 0

Með sprautunni mun hún líta svona út:

• Spítalainnlagnir vegna veiru: 0-1
• Gjörgæsluinnlagnir vegna veiru: 0
• Spítalainnlagnir vegna alvarlegra aukaverkana sprautu: >0 
• Endurhæfingarmeðferðir vegna alvarlegra aukaverkana sprautu: >0

Ef þú vilt fylla tölfræði spítalainnlagna og endurhæfingameðferða í kjölfar sprautu þá býst ég við að það sé þitt mál, þín ákvörðun og þín börn. En mínum börnum verður hlíft.

90% virkni fyrir 5-11 ára börn

Hringvísindi

Þessi blessuðu vísindi. Hvað segja þau okkur?

Stundum ekki neitt nothæft.

Tökum dæmi.

Hér er rannsókn um áhrif grímunotkunar á smit. Niðurstaðan: Engin áhrif. Hvað á þá að gera? Jú, láta sprauta sig:

We did not observe association between mask mandates or use and reduced COVID-19 spread in US states. COVID-19 mitigation requires further research and use of existing efficacious strategies, most notably vaccination.

Hér er rannsókn um áhrif sprautunnar á smit. Niðurstaða: Engin áhrif. Hvað á þá að gera? Jú, halda áfram öllum sóttvarnaraðgerðunum samhliða því að fólk er sprautað.

The sole reliance on vaccination as a primary strategy to mitigate COVID-19 and its adverse consequences needs to be re-examined, especially considering the Delta (B.1.617.2) variant and the likelihood of future variants. Other pharmacological and non-pharmacological interventions may need to be put in place alongside increasing vaccination rates.

Grímur og sprautur og málið er dautt? Aldeilis ekki.

Þrísprauta og málið er dautt? Varla.

Sprauta, grímur, loka alla inni, loka öllu og innleiða bólusetningarvottorð - það hlýtur að virka! Eða hvað?

Hvað virkar þá? Kannski bara það að verja þá viðkvæmu á meðan aðrir byggja upp nægt ónæmi í samfélaginu til að veiran komist ekki að viðkvæmum hópum. Og auðvitað að leyfa læknum að vinna vinnuna sína án þess að taka af þeim úrræði, hvort sem þau úrræði hafa verið sannreynd samkvæmt öllum kúnstarinnar reglum eða eru tiltölulega lítið prófuð, eins og sprauturnar.

Auðvitað verða litlu börnin sprautuð

Munu yfirvöld á Íslandi boða 6-11 ára krakka í sprautur gegn veiru sem hefur engin áhrif á þá? Auðvitað, en fyndið að sjá hvernig hinar ýmsu málpípur sprautunnar tala eins og enn sé verið að hugleiða málið.

Nú fari síðan mesta púðrið í að út­færa hvernig bólu­setn­ingu sex til 11 ára barna skuli háttað, fari hún á annað borð fram.

Fari hún fram á annað borð? Einmitt. Maður fær það næstum því á tilfinninguna að fjöldi sérfræðinga sé að rýna rækilega í gögn og rannsóknir til að taka sjálfstæða afstöðu frekar en bara gúmmístimpla allt sem kemur að utan. „Sóttvarnalæknir á eftir að taka þá ákvörðun“ er okkur sagt, en búið að panta efnin og skipulagning á framkvæmd hafin. 

Það er með ólíkindum að fólk sætti sig við þetta. Af hverju að taka áhættuna? Áður fyrr var okkur sagt að „öruggt“ bóluefni leiddi ekki til alvarlega aukaverkana nema fyrir hverja hálfa milljón sprautur eða meira - ein á 40 ára fresti í tilviki barna. Núna er líkurnar vel undir einn á móti tíu þúsund, jafnvel enn minni fyrir ákveðnar samsetningar aldurs, kyns og efnis. Hrædda, sprautaða miðaldra fólkið skellir skuldinni fyrir öllu (sprautum, aðgerðum) á örlítinn hluta fólks sem hefur ekki látið sprauta sig. Voru þá sprauturnar í alla hina sóun á fé, heilsu og jafnvel lífum þeirra sem mættu í gleðina? Átti ekki að vera nóg að sprauta 50% almennings? 70%? 80%? Áhættuhópa og aldraða? 

Þetta hættir aldrei og ýjað að því að nú þurfi að þrísprauta hvorki meira né minna en hverja einustu hræðu óháð veiru. Lækningin og sjúkdómurinn aftengd með öllu.

Nú fyrir utan að sífellt er verið að læra á gagnsleysi efnanna sem fóru lítið prófuð í umferð, virka verr en hefðbundin bóluefni, koma ekki í veg fyrir að fólk smitist eða smiti frá sér (og af ýmsum ástæðum leiða jafnvel til fjölgunar smita), valda álagi á heilbrigðiskerfið í formi alvarlegra aukaverkana og þola illa stökkbreytingar sem eru þó alltaf í gangi í veirum. 

Nú þegar embættismenn eru að gúmmístimpla loforðalista sprautuframleiðenda er sviðljósinu beint að börnunum. Allt þeim að kenna! Sprautum þau! Vonum að hjartavöðvar þeirra þoli álagið. Vonum að þau lamist ekki. Vonum að þau fái ekki heilablóðfall. Vonum að þau lifi af meðferð sem er þeim margfalt hættulegri en sjúkdómurinn.

Því hrædda miðaldra þrísprautaða fólkið þorir ekki út úr dyrum lengur nú þegar veira heldur upp á 2 ára afmælið sitt og samfélagið aldrei verið hræddara. 

Bólusetningin færist úr höllinni