Pyntingarpinnarnir á Íslandi

Síðan fálkaorðum var dreift á þríeyki sumarið 2020 er eins og þríeykið hafi hætt að kunna lesa. Þetta má rökstyðja með dæmi: Notkun á sýnatökupinnum.

Þeir eru óþægilegir, valda sársauka, geta valdið áverkum (blóðnösum, rofi á himnum í nefgöngunum) og það tekur langan tíma að taka sýni með þeim með tilheyrandi biðraðamyndun þar sem hóstandi og heilbrigðir standa þétt saman eins og rollur í bás í roki og rigningu.

Í marga mánuði og jafnvel í heilt ár hafa verið til vísindalegar rannsóknir þar sem borin eru saman sýni úr hálsi, munni og nefi og ítrekað verið sýnt fram á að kok- og munnvatnssýni eru alveg jafngóð og nefsýnin. Í Danmörku lásu yfirvöld þessar niðurstöður fyrir löngu síðan og hentu pinnunum í ruslið. Á Íslandi er ennþá verið að reka pinnana inn í fullorðna og börn. Að óþörfu.

Þetta er eitt sýnidæmið af mörgum um hversu óupplýst, illa lesin og stöðnuð sóttvarnaryfirvöld eru. Þau hjakka einfaldlega í sama farinu og einhvern veginn vona það besta: Þakka sér fyrir fækkun hinna hræðilegu smita og skammast út í ungt fólk þegar smitum fjölgar. En í raun bara að fálma um í myrkri að leita að rofanum til að kveikja ljósið.

Opnaðu nasirnar á þér, krakki!

Ingi­björg Salóme Stein­dórs­dótt­ir, verk­efna­stjóri sýna­töku á Kefla­vík­ur­flug­velli, fær svolítið pláss í blaðadálki til að segja frá hræddum börnum, fólki með fælni og einhverja með sjálfstæða hugsun og hvernig gengur að troða pinna upp í nefið á þeim (þegar koksýni er alveg jafngott og mun þægilegra). Hún segja að sýnatakan sé einfaldlega hluti af því að ferðast og margt annað furðulegt.

Það er rétt að sýnataka er víða krafa en þá sífellt víðar krafa við brottför, ekki komu. 

Það er ekki rétt að sýnataka sé sjálfsagður hlutur. Man einhver eftir því þegar yfirvöld fóru að rífa af okkur beltin og skóna í öryggishliðinu og henda rakspírum og vatnsbrúsum í ruslið? Einu sinni var hægt að ferðast með vökvana sína. Það var jafnvel hluti af því að ferðast. Núna er beltið tekið og rakspíranum henti í ruslið og því fylgt eftir með pinna í nefið. Á ekki að biðja fólk um að syngja þjóðsönginn við landamærin næst eða svara nokkrum spurningum um heilsufar sitt og fjölskylduhagi? 

Síðan kemur romsan:

„Það hef­ur komið fyr­ir að börn taki sér tíma í að vilja að leyfa manni að taka sýnið. En það hef­ur ekki gerst oft. Það er aldrei betra að bíða of lengi með þetta, það eyk­ur bara á kvíðann. Það er lang­best að þeir sem eru kvíðnir fyr­ir þessu láti okk­ur vita af því, sama hvort þeir séu stór­ir eða smá­ir. Þá reyn­um við að um­gang­ast þá með öðrum hætti. Marg­ir hafa fób­í­ur fyr­ir hinu og þessu, eru hrædd­ir við blóðpruf­ur eða eitt­hvað svo­leiðis. Sýna­tak­an get­ur al­veg eins verið þannig fyr­ir ein­hverja. En ég vil koma því á fram­færi að heil­brigðis­starfs­fólk er ekki þekkt fyr­ir það að vilja fólki mein held­ur þvert á móti. Við erum að þessu að því okk­ur er annt um fólk. Það er ekk­ert að ótt­ast og ég held að fólk viti það. Alla vega er ekki að sjá að Íslend­ing­ar séu að neita sér um ferðalög vegna sýna­tök­unn­ar.“

Ég hef margar athugasemdir við þessi orð.

Í fyrsta lagi eru börn hrædd því það er búið að hræða þau og búið að gera það svo þau hlýði. Þau vilja ekki láta loka sig inni svo dögum skiptir. Þau heyra um öll hræðilegu og banvænu smitin. Þau vilja ekki láta reka pinna í nefið á sér og geta heldur ekki skilið það öðruvísi en eitthvað sem fullorðna fólkið skipar þeim að gera.

Í öðru lagi hefur enginn ásakað heilbrigðisstarfsfólk um að vilja fólki mein en um leið er heilbrigðisstarfsfólk að valda fólki meinum. Sá hluti þess sem er gagnrýninn á hinar ýmsu aðgerðir steinþegir af ótta við atvinnumissi. Læknar reyna ekki að róa almenning með því að útskýra fyrir honum hvað er búið að lærast mikið á seinustu misserum og þögn þeirra um meðferðir og lyf sem við vitum að þeir beita og nota er ærandi. Skoðanakannanir sýna að almenningur telur innlagnir vegna COVID-19 vera margfeldi af raunverulegu hlutfalli. Dauði í öndunarvél er sviðsmynd sem margir telja raunhæfa fyrir sig, jafnvel óháð aldri og heilsu. Heilbrigðisstarfsfólk svíkur hér einfaldlega almenning í skiptum fyrir atvinnuöryggi og þjónkun við yfirvöld.

Í þriðja lagi er gert lítið úr þeim sem finnst virkilega óþægilegt að láta reka pinna djúpt upp í nefið á sér (sem hefur meira að segja valdið alvarlegum áverkum). Iss, þú ert bara hræddur við pinnann eins og sumir við kóngulær! Þessir pinnar eru algjör óþarfi. Danir hafa tekið koksýni vegna PCR-prófa í langan tíma og þau eru alveg jafngóð og taka brotabrot af tímanum og eru töluvert þægilegri. Nú fyrir utan að pinnafólkið á Keflavíkurflugvelli er töluvert harðhentara en það sem ég hef komist í tæri við í Danmörku: Greinilega að flýta sér og skítt með fórnarlambið.

Í fjórða lagi er gjörsamlega óábyrgt að bera á borð svona einhliða umfjöllun um ágæti sýnatökunnar á komufarþegum. Eins og á hefur verið bent er Ísland hér frávik meðal Norðurlandanna og skiljanlegt að færri flugfélög en ella séu að spá í að setja Ísland á kortið með tilheyrandi tugmilljarða skerðingu á gjaldeyrisöflun íslenska hagkerfisins. 

Í fimmta lagi er allt þetta hringleikahús eitt stórt brot á stjórnarskrárvörðum rétti Íslendinga til að koma til Íslands. Dómarar eru sennilega undir miklum þrýstingi að túlka texta á annan veg og bera við allskyns vá og hamförum en þurfa hér að treysta á gervi-vísindin sem Vesturlönd fluttu inn frá Kína í upphafi seinasta árs, ekki raunveruleg vísindi og þaðan af síður mikla, aðgengilega og auðskiljanlega tölfræði um líkur á dauðsföllum, fyrir utan að það er búið að sprauta nánast alla með glundri sem enginn hefur trú á þegar á hólminn á komið.

Blaðamenn á Íslandi ættu allir sem einn að líta í spegil og hugsa: Er ég strengjabrúða eða sjálfstætt hugsandi vera? Þegar flestir hafa valið fyrri kostinn ættu þeir að segja upp. Viðtalið við Ingi­björgu Salóme Stein­dórs­dótt­ur, verk­efna­stjóra sýna­töku á Kefla­vík­ur­flug­velli, er sönnun þess.

(Mynd tekin af observerid.com.)

Íslendingar óhræddir við sýnatöku á Keflavíkurflugvelli

Tökin hert

Sprautur áttu að bjarga málunum og enda veirutíma. Allir í sprautu og höftum má aflétta! Svo fór þó ekki. Sprauturnar verja ekki gegn því að smita eða smitast. Í besta falli verja sprauturnar þá sem fá þær gegn alvarlegum veikindum, rétt eins og fæðubótarefni, heilsusamlegur lífsstíll, ýmis lyf og gott mataræði. Að því sögðu er sjálfsagt að þeir sem vilji fái sprautu en ekki í nafni heimsfaraldurs heldur sem tæki til að verja eigin líkama gegn alvarlegum veikindum. Og þrátt fyrir sprauturnar eru ennþá margir áhættuhópar sem þarf að huga sérstaklega að, eða eins og nýleg rannsókn kemst að:

Several clinical risk factors for severe covid-19 outcomes despite vaccination have been identified: Down’s syndrome, kidney transplantation, sickle cell disease, care home residency, chemotherapy, recent bone marrow transplantation or a solid organ transplantation ever, HIV/AIDS, dementia, Parkinson’s disease, neurological conditions, and liver cirrhosis

Og hvernig hugar maður sérstaklega að áhættuhópum? Jú, með markvissri vernd sem svo er skilgreind (í hinni svokölluðu Great Barrington yfirlýsingu):

Mannúðlegasta nálgunin, þar sem jafnvægi ríkir milli áhættu og ávinnings meðan hjarðónæmi næst, er að þeir sem eru í lágmarkshættu fái að lifa eðlilegu lífi í því skyni að byggja upp náttúrulegt ónæmi gagnvart veirunni, meðan þeir sem í mestri hættu eru njóta betri verndar en nú er. 

Þessi orð voru gefin út 4. október 2020 og eru smátt og smátt að verða að veirunálgun margra ríkja á meðan önnur sigla dýpra í fen alræðis.

Veirur geta allar verið einhverjum hættulegar. Margir áhættuþættir eru rækilega kortlagðir og þekktir, svo sem offita. Sprauturnar eru í boði fyrir þá sem vilja (en er víða þröngvað upp á þá sem vilja ekki). Læknar eru seinustu 18 mánuði búnir að finna lyf, meðferðir og aðferðir til að takast á við alvarleg veikindi. Lífum margra er búið að rústa í nafni sóttvarna og skuldafjallið verður sennilega aldrei borgað til baka. 

Þess vegna er dapurlegt að lesa fréttir frá ríkjum sem færa sig óðum í átt að fasisma en að sama skapi gleðilegt að norrænu ríkin og mörg önnur eru að færast frá almennu kverkataki á samfélaginu og í átt að markvissri vernd og opnu samfélagi.

Spurningin sem eftir stendur: Hvora leiðina ætla Íslendingar að velja?

Framlínustarfsfólki án bólusetningar sagt upp

Stofufangelsi barna

Tæplega 200 krakkar eru nú í stofufangelsi á Íslandi, þar af 4 ungabörn undir 1 árs aldri og 24 börn á aldrinum 1-5 ára.

"Nei þú mátt ekki leika við krakkana á leikskólanum. Hérna er spjaldtölvan og eftir nokkra daga verður pinna rekið upp í nefið á þér af manneskju með bæði grímu og andlitsskjöld. Vertu hræddur, krakki!"

Þetta er auðvitað ekki í lagi. Ég þekki feðga sem voru látnir dúsa inni í heila 14 daga, "smitaðir", einkennalausir, hraustir og auðvitað einangraðir enda faðirinn þessi samviskusama týpa sem vill þar að auki ekki láta fólk úti á götu kalla fúkyrði á eftir sér og syni hans. 

Starfsfólk leik- og grunnskóla með allar sínar sprautur og örvunarskammta sem enga verja og hafa ekki stuðlað að opnun samfélagsins er kannski bara alsælt með þetta og nýtur frídaganna heima með Netflix í gangi allan sólarhringinn. Að minnsta kosti kvartar þetta fólk ekki.

Annars heyrði ég mjög hughreystandi sögu í gær um vaxandi borgaralega óhlýðni við hin ýmsu fyrirmæli þríeykja og annarra ókjörinna embættismanna. Kannski er von. Kannski finna Íslendingar, sem hreykja sér af víkingaeðli og "þetta reddast" hugarfari, bráðum hugrekkið sitt.

Haldið þessum sprautum langt frá saklausum börnum!

Lyfjaframleiðandinn Pfizer hefur formlega óskað eftir neyðarleyfi fyrir notkun bóluefnis síns gegn Covid-19 fyrir börn á aldrinum 5 til 11 ára.

Svona byrjar þetta. Næst byrja að berast fréttir um frábæran árangur, mikla vörn og fáar aukaverkanir. Þá verður byrjað að tala um tímaramma og hvenær kemur að börnunum. Samhliða verður auðvitað haldið áfram að tala um smit og skólar lokaðir og opnaðir til skiptis. Þannig tæmist þolinmæði foreldra og þeir verða spenntir fyrir því að hleypa sprautu inn í börnin sín. Og svo verður sprautað.

ERTU Á MÓTI BÓLUSETNINGUM! MISLINGAR OG MÆNUSÓTT! 

Nei, hér þarf að gera greinarmun á. Til eru tvenns konar bóluefni. Annars vegar þau öruggu, vel þekktu og vel rannsökuðu, eða með orðum Þórólfs Guðnasonar áður en hann fékk frægðarsólina í augun:

...alvarlegar aukaverkanir bóluefna sem notuð eru hjá börnum í almennum bólusetningum eru mjög fátíðar, eða um ein aukaverkun á hverjar 500.000-1.000.000 bólusetningar.

Hins vegar þau óöruggu, lítið rannsökuðu og byggð á tækni sem hingað til hefur dugað best til að drepa tilraunarottur á rannsóknarstofu:

... um 9/100.000 bólusettum börnum fær alvarlega aukaverkun, þ.e. aukaverkun sem krefst læknisskoðunar.

Raunverulegt hlutfall er hærra. 

EN BÓLUEFNIN MUNU STÖÐVA FARALDURINN!

Nei, því sprautaðir smita og smitast. Veiti efnin vernd gegn alvarlegum sjúkdómi þá er það auðvitað bara frábært fyrir viðkomandi en börnin þurfa ekki vernd gegn COVID-19. Áhættan af sprautunni er margföld á við áhættuna af veirunni, sérstaklega fyrir börn. Lýsi, D-vítamín, fjölvítamín, góð heilsa og öflugt ónæmiskerfi veita líka vernd og hægt að efla hana án þess að sprauta börnin þar sem þau sitja skíthrædd í fangi foreldris á meðan heilbrigðisstarfsfólk vaktar þau eftir sprautuna og bíður eftir yfirliði, lömun, blindu, hjartabilun eða jafnvel dauða. 

Látið börnin í friði, í guðanna bænum! Þau eru ekki meindýr sem eru að reyna drepa þig. Þau eru ekki rottur sem bera í feldi sínum flær fullar af lífshættulegum veirum. Þau eru ekki ógn við líf ömmu þinnar. Þau eru ekki flækingshundar með hundaæði sem þarf að sprauta niður. Þau eiga að fá að vera í friði, mæta í skólann og eiga eðlilegt félagslíf!

Ef þú kærir þig ekki um ósprautuð börn og vinnur sem leikskólakennari þá ert það þú sem átt að skipta um starf í stað þess að krefja aðra um að setja allskyns glundur í líkama sinn. Nú eða treysta á að glundrið verji þig, en það gerir þú kannski ekki þegar á hólminn er komið.

Sótt um neyðarleyfi fyrir bólusetningu 5 til 11 ára

Spurning um lyf

Um daginn benti læknirinn Dr. Guðmundur Karl Snæbjörnsson, eða Kalli Snæ eins og hann kallar sig oftast, á að Ivermectin er nú komið á sérlyfjaskrá á Íslandi, undir heitinu "Ivermectin Medical Valley", og læknar geta því gefið út lyfseðla á lyfið, sem Kalli Snæ gerir sem bæði fyrirbyggjandi og læknandi meðferð við COVID-19. Að vísu kosta skammtarnir svimandi fjárhæðir en nú er möguleikinn a.m.k. til staðar.

Gott og vel, enn eitt tækið í vopnabúr lækna sem þeir geta svo nýtt sér ef þeir telja slíkt vera gagnlegt fyrir skjólstæðinga sína. Læknar vita t.d. að þótt það standi á pakkningunni á ákveðnu lyfi að það sé gegn einhverju einu þá eru mörg lyf þannig gerð að þau virka gegn einhverju öðru líka.

Þess má geta að sama lyf er á lyfjaskrá í Danmörku og víðar og því ekki um einhverja íslenska sérvisku að ræða.

Ég ákvað að spyrja Kalla Snæ á fjésbókinni hvort hvort valkostir við nákvæmlega vöruheitið "Ivermectin Medical Valley" væru til (með þann ásetning að kaupa ódýrari valkost á netinu). 

Fjésbókin var ekki sátt:

Ég sem sagt vísa í sérlyfjaskrá Íslands (spam!) og spyr um valkosti við skráð lyf (spam!) og bendi á að samskonar lyf fáist í Danmörku (spam!). Ég spyr íslenskan lækni um valkost við lyf (spam!) og í stað þess að læknir fái að tjá sig um lyf er einhver unglingur í útlöndum búinn að ákveða að skera á þau samskipti.

Ekki nenni ég að kvarta í fjésbókinni yfir þessari ritskoðun. Ég vil bara benda á hana hér og vona að innlegg mitt fái jafnvel enn meiri athygli fyrir vikið.

Loftslagsvá í ríkisfjármálunum

Loftslagsumræðan undanfarin ár breyttist á tímabili í veiruumræðu en báðar umræður eru keimlíkar og ganga nú yfir á sama tíma. Í báðum tilvikum er reynt að hræða almenning alveg upp úr skónum. Til þess finnast óendanlegir fjármunir. Hagsmunahópar spretta upp og sækja um fé í óendanlega sjóði. Venjulegt samfélag er talað niður og einhvers konar aðgerðir sem takmarka, hamla og loka talaðar upp. Gagnrýnisraddir eru að hluta eða í heild þaggaðar niður eða jafnvel kallaðar samsæriskenningar. Sífellt er hamrað á því að við þurfum að treysta vísindunum og ákveðnir aðilar útnefndir til að tala í nafni þeirra. Aðrar raddir eru kallaðar andsnúnar vísindum.

Sögur herma að í núverandi stjórnarmyndunarviðræðum sé einn flokkanna við borðið að heimta að lýst verði yfir loftslagsvá og milljarðar settir í baráttu gegn loftslagsbreytingum. Enginn veit samt hvað loftslagsmilljarðarnir í dag eru að áorka. Sennilega engu. Þess vegna þarf að bæta í.

Ekki þýðir þetta að heimsfaraldri verði aflýst. Margir aðilar hafa mikla hagsmuni af því að viðhalda honum. Lyfjaframleiðendur græða á tá og fingri. Athyglissjúkir embættismenn njóta áheyrnar fjölmiðla og ráðherra. Fólk sem almennt er hrætt við allt þrífst á hræðslunni og finnur ákveðna huggun í að aðrir eru líka hræddir. 

Hið opinbera lætur sjaldan góða krísu fara til spillis. Og þú ert fórnarlambið.

Segir ríkið ekki hafa grænan grun

Gríðarlega íþyngjandi sóttvarnaraðgerðir

Á Akureyri eru 990 einstaklingar í sóttkví og 223 á Húsavík segir í frétt. Alls eru nálægt 2500 einstaklingar í sóttkví og einangrun á Íslandi. Á Norðausturlandi er óskað eftir því að viðburðum, æfingum og félagsstarfi barna og unglinga á grunnskólaaldri sé frestað fram yfir næstu helgi.

Þetta þykir sóttvarnarlækni Íslands ekki vera íþyngjandi. Heilu bæjarfélögin eru í lamasessi af ótta. Einkennalaus og heilbrigð börn eru kölluð smituð og sennilega búið að hræða þau vel og rækilega svo þau sætti sig við innilokun og einangrun. Þau gætu jú smitað ömmu sína og drepið, ekki satt?

Forstjóra BYKO var nóg boðið um daginn og skrifaði reiðipistil sem á skilið að birtast sem víðast (úr frétt DV):

Stífar sóttvarnarreglur sem byggja á smitrakningu, smitgát, sóttkví og einangrun eru svo íþyngjandi að leggja þarf mat á kosti þess og galla, ófyrirséðar afleiðingar hafa fengið lítið sjónarhorn innan þeirra umræðu. Nú er mál að linni og tími til kominn að endurhugsa hlutina upp á nýtt. Við horfum svo oft til nágrannaþjóða okkar sem góðar fyrirmyndir. Við kjósum hins vegar að gera það þegar okkur hentar best eða þegar það hentar okkar málstað. Orð og röksemdarfærsla sóttvarnarlæknis lúta enn að því að fara verður varlega í öllum afléttingum þrátt fyrir að þjóðin er meira eða minna öll bólusett. Hversu lengi getum við haft þau varnaðarorð fyrir framan okkur. Orð eins og „við skulum sjá hvað gerist næstu daga, það á nú eftir að koma í ljós“ dagarnir og mánuðirnir hafa liðið. Skrefið þarf að taka rétt eins og nágrannaþjóðir okkar hafa tekið. Aflétta þessum íþyngjandi takmörkunum sen snúa að sóttkví og einangrun. Ef skoðaðar eru eldri tilkynningar frá sóttvarnarnefnd Landsspítalans t.d. frá árunum 2011, 2012 og 2013 í október og janúar, þá hljóðuðu þær þannig: „28 liggja inni vegna inflúensu, þar af 6 á gjörgæslu, útskrifaður voru 4.

Og hann bætir við um nýlega einangrun hans og fjölskyldu hans:

Hafandi þessar staðreyndir fyrir framan sig, að í 17 daga hafa allir verið hressir án veikinda en þurft að beygja sig undir þessi lög sóttvarna. Að mínu vitu getur þetta ekki gengið mikið lengur með þessum hætti.

Kjarni málsins svo sannarlega og í raun algjör sorgarsaga. Það er kominn tími til að leyfa læknum að vinna vinnuna sína með þeim lyfjum sem þeir telja árangursríkust og hætta að treysta á sprauturnar og grímurnar og lokanirnar sem bitna á heilsu og menntun barna, atvinnu fullorðinna og geðheilsu allra. 

Eða með öðrum orðum: Leyfa fólki að ráða. Sértu logandi hræddur einstaklingur, rækilega mataður af fjölmiðlum, er þér vitaskuld í lófa lagt að sleppa tónleikum, bera grímu, fá þriðju og fjórðu sprautuna, versla á netinu og aflýsa öllum ferðalögum. En aðrir eiga að fá að lifa lífinu - lifandi!

Fylgist með hverju?

Á Norðurlöndum hefur víða verið slakað alveg á veiruaðgerðum. Þórólfur Guðnason sóttvarnarlæknir segist í frétt fylgjast vel með því hvernig gangi þar og bendir á að ekki virðist hafa orðið afturför hjá Dönum, hvar eru um þrjár vikur síðan takmörkunum var aflétt, eins og varð hér á landi þegar öllu var aflétt í sumar.

Hann bætir við: „Ég hef sagt það undanfarið að ég telji að við þurfum að fara hægt í sakirnar og tel raunar sjálfur að við séum ekki með mjög íþyngjandi aðgerðir.“

Þórólfur ætti kannski að fylgjast aðeins betur með. Nýlega var heilum skóla lokað vegna smita. Þetta þykir varla fréttnæmt lengur en er það. Fjöldi krakka hangir nú hver fyrir sig fyrir framan tölvuskjá og reynir að halda sér vakandi yfir fjarkennslu. Þeim er bannað að mæta í skólann. Þeim er bannað að umgangast jafnaldra sína. Þeim er sagt að ógurlega mörg smit séu að stofna öllu í hættu. Það er reynt að hræða þá og tekst sennilega vel. 

En þetta þykir sóttvarnarlækni ekki vera mjög merkilegt. Ekki íþyngjandi aðgerðir. 

Veruleikafirring er eina orðið til að lýsa slíku hugarfari.

En aftur að manninum sem segist fylgjast með en gerir það ekki: 

Hann segist vona að fólk sé ekki búið að gleyma því að álagið hafi aukist mjög á Landspítalanum í þeirri bylgju.

„Það er það sem málið snýst um að við förum mjög hægt og varlega í það að aflétta.“

Hér er um afbökun að ræða. Landspítalinn lenti í vandræðum eftir að hafa fylgt sóttvarnaraðgerðum og sent stóran hluta starfsfólksins heim til sín í launað frí. Í Danmörku er brjálað að gera í heilbrigðiskerfinu vegna haustpestanna, eins og svo oft áður. COVID-19 smitin eru söm við sig. Gleymum því ekki að ýmsar aðrar veirur eru yngra fólki hættulegri en kórónuveiran. Til dæmis er flensan oft erfið fyrir krakka. En það skiptir ekki máli þegar kemur að því að loka skólum og vinnustöðum, sem betur fer. Heilbrigðiskerfið er til þess að grípa fólk þegar það veikist, ekki til að standa autt á meðan starfsfólkið spilar borðspil eins og einn Daninn sagði mér að hefði verið raunin vorið 2020 (a.m.k. í Álaborg). 

Það er brjálað að gera hjá dönskum spítölum vegna allskyns veira en enginn að tala um að loka samfélaginu af því veirunum fylgja ekki leiðbeiningar frá Kína um hvernig eigi að berjast við þær.

Sóttvarnarlæknir fylgist ekki með neinu. Hann er þvert á móti að vonast til að allt fari á hliðina á Norðurlöndunum og getur svo sagt þegar haustið heldur áfram að herða tök sín og skapa veirum góðar aðstæður: Sko! Vissi það! Gott að ég lét loka skóla!

Hin mörgu orð fyrir stofufangelsi

Eitt má sóttvarnarlæknir Íslands (sá eini) eiga: Hann er afskaplega lipur nýyrðasmiður.

Smitgát og skimunarsóttkví eru samheiti stofufangelsis án þess að vekja sömu hughrif. 

Örvunarskammtur hljómar eins og svolítið kitl í tærnar og manni dettur ekki strax í hug þriðja eða fjórða sprautan full af lítið rannsökuðum tilraunaefnum sem hafa valdið fjölda manns alvarlegum skaða og jafnvel örorku og dauða, meðal annars ungu og heilbrigðu fólki sem stafaði aldrei ógn af veiru.

Að tala um sóttvarnir höfðar til hins varfærna og tillitssama borgara sem vill alls ekki blása veiru inn á Landakot eins og starfsfólkið þar gerði. Engum dettur í hug að sóttvarnir fyrir mars 2020 snérust um að vernda viðkvæma og auðvitað halda sig heima ef maður er með hor og hósta en að samfélagið gengi að öðru leyti áfram. Orðinu var haldið óbreyttu en merking þess er gjörólík. Í raun má kalla slíkt nýyrðasmíði eða endurskilgreiningu í hið minnsta.

Toppurinn er svo orðið bólusetning. Áður fyrr var það orð notað um bóluefni, þ.e. 

efni (óvirkir sýklar eða veira) sem framkallar ónæmi gegn smitsjúkdómi með því að örva myndun mótefnis í líkamanum (Íslensk nútímamálsorðabók)

Orðið vísar til þess að fyrsta bóluefnið var fundið upp í tengslum við bólusótt.  

Þessi skilgreining passar ekki við mRNA-efnin frá Pfizer, Moderna og fleirum. Raunar gildir þessi skilgreining um mjög fá af þeim efnum sem notuð eru til að laða fram ónæmi í fólki. Það vantar einfaldlega viðurkennt orð fyrir efnin frá Pfizer, Moderna og fleirum. Um leið á ekki að tala um bólusetningar því þetta eru ekki bóluefni. Þetta eru efni á tilraunastigi. Tilraunasprautur er því kannski gott heiti. 

Annars vil ég óska forseta Íslands góðs bata í sóttkví sinni og vona að hann jafni sig án þess að draga allt heimilishaldið í bólið.

Eða nei, bíddu nú við, hann er ekki lasinn! Hann er bara í stofufangelsi.

Forsetinn í smitgát næstu daga