Æxli á skrokk skattgreiðandans

RÚV er að mörgu leyti miklu stærra og verra æxli á skrokk skattgreiðandans en margar aðrar ríkisstofnanir (ohf. eða eitthvað annað). RÚV fær peninga fyrir að predika og útvarpa og senda út og nýtir oft aðstæður sínar til að predika eigin hagsmuni, og þeir hagsmunir eru yfirleitt andsnúnir hagsmunum skattgreiðenda sem RÚV þrífst á.

Þannig nýtur RÚV mikils trausts sem það notfærir sér til að mála sjálft sig eins og dýrðling og alla sem gagnrýna stofnunina sem andstæðinga. Aðrar opinberar stofnanir þurfa að láta sér nægja að senda menn í einstaka viðtöl og koma frá sér opinberum yfirlýsingum. RÚV getur raðað heppilegum álitsgjöfum í þætti sína og flutt fréttir um sjálft sig allan sólarhringinn.

RÚV er ígildi sovésku ríkisfjölmiðlanna sem sjá einn sannleik en ekki mismunandi sjónarmið.

RÚV ber að koma af spena skattgreiðenda og ýmsum lögbundnum hlutverkum þess, svo sem að senda út táknmálsfréttir sem enginn horfir á lengur og varðveita gamlar upptökur af Stundinni okkar sem enginn hefur áhuga á eftir að allt fjölmiðlaefni varð stafrænt, á að bjóða út eða hreinlega koma í lóg. 

Dýrt fyrir RÚV að spara ekki

Nýtt byggingaland að opnast

Þeir gleðjast eflaust margir sem sjá fram á að nýtt byggingaland sé að opnast í Straumsvík ef álverinu þar verður lokað. Það vill jú enginn búa nálægt þessu ferlíki, er það nokkuð? Það var a.m.k. viðkvæðið á árum áður.

Að vísu getur sveitarstjórnin þá ekki eytt eins miklu fé enda mjólkar hún álverið rækilega og hefur alla tíð gert.

Að vísu verður eitthvað minna um atvinnu á svæðinu en menn eru jú allir komnir út í að týna fjallagrös og brugga töfraseyði heima og hafa af því ljómandi gott lifibrauð.

Að vísu verða þá einhverjir af meðlimum verkalýðsfélaganna atvinnulausir og minna aflögufærir um himinhá félagsgjöld og það takmarkar eflaust byggingavinnu við sumarbúðstaði og niðurgreiðslur á gleraugum, en þannig er það bara.

En segjum sem svo að verkalýðsfélög hefðu ekki meintan verkfallsrétt og að álverið gæti ráðið fólk með gagnkvæmu samkomulagi við hvern og einn væntanlegan starfsmann. Væri það svo hræðilegt? Af hverju þurfa að gilda önnur lögmál um suma en aðra? Ég sé fyrir mér að ef ég færi í verkfall þá væri uppsagnarbréfið u.þ.b. tvo daga að berast mér, kannski meira ef ég fæ einhverja samúð. Mér finnst það bara mjög skiljanlegt. 

Megi verkalýðsfélög starfsmanna álversins í Straumsvík vera sem skilvirkust í að moka félagsmönnum sínum á atvinnuleysisskrá, og sjáum svo hvað fólk verður ánægt með niðurstöðuna og allt nýja byggingalandið. 

Verkfall aftur boðað í Straumsvík

En eru þetta ekki bara 'hefðir' annarra menningarheima?

Til eru þeir sem aðhyllast það sem kallast "polylogism", svo skilgreind á einum stað:

Polylogism is the notion that different groups of people have different and incompatible modes of logic.

Með öðrum orðum sú hugsun að telja að mismunandi hópar fólks aðhyllist mismunandi og ósættanlegar tegundir af rökhugsun. 

Samkvæmt þessari hugsun þá er rökhugsun manna í Evrópu önnur en þeirra í miðausturlöndum, og þeirra í Afríku frábrugðin þeirra í Norður-Ameríku, svo dæmi séu tekin.

Samkvæmt þessari hugsun er ekki hægt að heimfæra rökfræði eins upp á aðra og ekki má fordæma hugsunarhátt annarra því það er ekkert til að fordæma - við hugsum bara öðruvísi en þeir og ekkert við það að athuga!

Nú tilheyri ég vissulega ekki þeim hópi einstaklinga sem hugsa svona. Fyrir mér er þjófnaður bara það - þjófnaður. Fyrir mér er ofbeldi bara það - ofbeldi. Ég ætla því að fordæma þessar viðurstyggilegu og andstyggilegu aðferðir sem margar greinar af íslam boða að eigi að beita á ótrúa, gifta einstaklinga. 

Það skiptir í raun litlu máli hvað stendur í Kóraninum þegar kemur að hegðun og atferli margra múslíma og jafnvel flestra svo ég leyfi mér að alhæfa. Rit múslíma eru uppfull af réttlætingum fyrir voðaverkum, ofbeldi og hreinni villimennsku, og þótt hið sama sé hægt að segja um kristin trúarrit þá fer nú eitthvað aðeins minna fyrir framkvæmd voðaverkanna hjá kristnum svo vægt sé til orða tekið.

Á yfirráðasvæðum múslíma eru konur kúgaðar, jafnvel af sínum eigin sonum, og listinn yfir réttdræpa er langur. Þar sem múslímar eru í meirihluta innan ákveðinna borga eða hverfa eru þeir fljótir að söðla undir sig skólakerfið og úthýsa nákvæmlega því umburðarlyndi og virðingu og varð til þess að þeir fengu að flytja inn á viðkomandi svæði. Þeir hafa meira að segja gert arabísku að fyrsta tungumáli skólakrakka þar sem þeir hafa náð tökum á sveitar- eða bæjarstjórnum, t.d. á sumum stöðum í Bretlandi þar sem börn hafa ekki séð orð í ensku þegar þau byrja í skóla (dæmi). 

Hérna í Danmörku eru sagðar margar sögur af ungum stúlkum sem hafa hafið sambönd með múslímum og margar hafa þurft að flýja land til að losna við líkamlegt ofbeldi og af ótta við hefndarverk, þar á meðal ein íslensk stúlka sem bjó í sama hverfi og ég. Er það tilviljun?

Maður sem ég ræddi mikið við á tímabili bjó í næsta bæ við Luton á Englandi og sagði að enginn færi í þann bæ nema í hóp og aldrei nema í dagsbirtu, því hvítir og ótrúaðir menn væru ekki vel séðir þar. Hann kallaði Luton múslímabæ þar sem börn lærðu arabísku á undan ensku, bæði heima og í skólanum. 

Á Arabíuskaga þrifust á sínum tíma fjölmörg trúarbrögð áður en múslímar náðu vopnum sínum og gerðu allt nema eigin siði útlæga. 

Listinn er endalaus og það fer í taugarnar á mér að við sýnum svo mikið umburðarlyndi og virðingu fyrir hugsunarhætti sem boðar ofbeldi, kúgun og okkar eigin kvalarfulla dauða. 

Áður en ég flutti til Danmerkur fyrir 11 árum vissi ég ekki mikið um múslíma og hvað þá múslíma á Vesturlöndum. Ég er reynslunni ríkari í dag. 

Mér er persónulega alveg sama hvaða trúarbrögð fólk aðhyllist, ef einhver. Ég ætla hins vegar ekki að eyða öllu mínu umburðarlyndi í fólk með hugsunarhátt sem snýst um það að eyða eða útrýma umburðarlyndi og boða þess í stað ofbeldi og kúgun sem aðgöngumiða í þeirra eigin Paradís. 

Ung kona grýtt til bana

Búið mál eða er nýtt fyllerí að hefjast?

Ríkisstjórnin virðist vera að nálgast uppgjör vegna föllnu bankanna sem leiðir ekki til lögsókna né hruns í hagkerfinu. Það er gott. 

Ríkisvaldið ætlar að soga til sín yfir 500 milljarða króna. Ef þær fara í að greiða niður skuldir sem lækka vaxtagreiðslur úr vösum skattgreiðenda og skapa myndarlegt svigrúm fyrir miklar skattalækkanir á allt og alla þá er það gott. Hins vegar er mikil hætta á að þessir peningar verði notaðir til að fjármagna draumóra og kosningabaráttu í kjördæmum þingmanna: Göng grafin, brýr reistar og stofnanir settar á fót. Þá verða þessir peningar að bölvun og bagga fyrir íslenskan almenning.

Í hvert skipti sem ríkisvaldið reisir byggingu eða grefur göng er það nefnilega ekki bara að nota peninga núna, heldur um alla framtíð í formi viðhalds og starfsmanna. 

Það má alveg vona að þetta fé verði nýtt til að greiða niður skuldir og að eyðsluglaðir stjórnmálamenn (sem vilja taka heiðurinn af öllu nema eigin verkum) verði settir út í horn. 

Getur svo einhver vinsamlegast útskýrt fyrir mér afstöðu stjórnarandstöðunnar til samkomulags ríkisins við kröfuhafa? Mér sýnist þau í stjórnarandstöðunni bæði vera að hrósa sér fyrir samkomulagið (þ.e. að eitthvað hafi orðið að samkomulagi) en um leið bölva því (því ríkisvaldið hefði, að þeirra mati, átt að sjúga meira fé í hirslur sínar). Ætla þingmenn fráfarandi ríkisstjórnar virkilega að halda því fram að þeir hefðu geta gert eitthvað betur ef þeir hefðu bara fengið fleiri tækifæri? Það er tal sem ég heyri frá 10-11 ára strákum sem vilja vera stórir en eru ekki orðnir það enn. 

Næsta skref ríkisstjórnarinnar er svo vonandi að leggja niður Seðlabanka Íslands, selja allar fjármálastofnanir sínar, leggja niður megnið að ríkisregluverkinu sem gefur út heilbrigðisvottorð til fjármálafyrirtækja og aftengja alveg ríkisreksturinn og rekstur fjármálastofnana og einangra þannig skattgreiðendur alveg frá áhættusækni fyrirtækja og einstaklinga. 

Ríkissjóður fær 500 milljarða

Kjaftaklúbbur á kostnað skattgreiðenda

Nú á að stofna enn einn kjaftaklúbbinn á kostnað skattgreiðenda. Er engin leið til að fá opinbera starfsmenn til að tala um áhugamál sín í sínum eigin frítíma? Nú eiga umræður um framtíð Íslands sér stað í öllum heitapottum Íslands, daglega, svo dæmi sé tekið. Væri ekki ódýrara að koma bara fyrir upptökutækjum þar og láta tölvu færa tal yfir í texta og prenta sjálfkrafa út í prentara ráðherra?

Ég legg til að ráðherra láti það verða sitt fyrsta verk í framtíðinni að leggja niður Framtíðarsetur Íslands. 

Framtíðarsetur Íslands stofnað

Starfsmenn einkafyrirtækja starfa áfram

Flest verkföll eru hjá fólki sem hefur ekki í önnur hús að venda en hið opinbera. Ríkisvaldið er svo umsvifamikið að það gefur víða ekkert svigrúm fyrir einkafyrirtæki sem gætu viljað spreyta sig í að veita ýmsa þjónustu. 

Á Íslandi er t.d. lítið pláss fyrir einkaaðila í heilbrigðisþjónustu þótt eitthvað sé nú sem betur fer að rætast úr því á takmörkuðum sviðum. Vissulega geta sjóndaprir eins og ég flakkað á milli ógrynni einkafyrirtækja sem keppast um að veita bestu fáanlegu tækni, góða þjónustu og gott úrval, en hið sama er ekki hægt að segja um marga heilbrigðisþjónustu á Íslandi.

Verkalýðsfélögin vita þetta og vita að þau geta beitt löggjöf í kringum starfssemi þeirra eins og kylfu á öllum sem standa í vegi þeirra. Að hugsa sér að stéttarfélag geti lamað áfengissölu í landinu! Vonandi verður þess ekki lengi að bíða að slíkt heyri sögunni til með frjálsri sölu áfengis á Íslandi að hætti Dana og Þjóðverja (svo einhverjar frumstæðar og drykkfelldar barbaraþjóðir séu notaðar sem dæmi).

Starfsmenn einkafyrirtækja halda áfram að mæta í vinnuna og leysa sínar launadeilur innanhúss og á friðsælan hátt sem bitnar ekki á sjúklingum eða neytendum. Vonandi er ríkisstjórnin að hugsa til þess á meðan verkalýðsfélög herja á skattgreiðendur og almenning. 

Þegar búin að fara fram yfir

Græðgi

Að sögn páfa er hag­kerfi heims­ins óhæft eins og það er í dag. Hann seg­ir að kapí­tal­ismi og hagnaður sé ekk­ert djöf­ul­legt svo lengi sem við ger­um þá ekki að átrúnaðargoðum held­ur leyf­um þeim að vera tæki til aðstoðar. 

Páfinn er e.t.v. ekki menntaður hagfræðingur en stundum hittir hann naglann á höfuðið. Ætli hann sé hérna að vísa í útbreidda starfsemi seðlabanka í heiminum sem prenta peninga ofan í vasa hinna ríku og vel tengdu og auðvitað ríkissjóða á meðan aðrir sitja eftir með verðbólguna og skuldirnar? Hver veit!

Ég ætla að leyfa mér að mæla með þessari litlu grein á Deiglan.com fyrir þá sem vilja lesa yfirvegaðar hugleiðingar um græðgi annars vegar og heiðarlegan hagnað hins vegar. Svolítil tilvitnun:

Græðgi er hugtak sem á fyrst og fremst við um það þegar menn verða svo helteknir af efnislegum gæðum og stöðutáknum, að þeir stytta sér leið til þess að njóta uppskeru sem þeir hafa ekki sáð til, eða sem einhver annar hefur sáð til.

Njótið!

Græðgi að rústa heiminum

Báknið vindur upp á sig

Alþingi væri sómi í að breyta strax lögum sem þvinga sveitarfélög til að fjölga fulltrúum í sveitastjórnum. Það er engin ástæða til að raða fleiri stjórnmálamönnum á spena skattgreiðenda.

Þegar Davíð Oddsson var borgarstjóri á sínum tíma fækkaði hann borgarfulltrúum úr 21 í 15 og var það hluti af viðleitni til að minnka báknið. Nú á að synda í hina áttina.

Það er athyglisvert að lesa gömul ummæli um þá fækkun borgarfulltrúa. Á einum stað er t.d. bent á að ef það hefði ekki verið gert þá hefði Sjálfstæðisflokkurinn fengið fleiri menn kjörna í borgarstjórn. Ætli sveitarstjórnarmenn séu þess vegna ekki að andmæla hinum nýju lögum frá Alþingi - því þeir sjá fram á fjölmennari flokksfundi í borgarstjórn?

Miklu nær væri að fækka borgarfulltrúum enn meira svo þeir hafi ekki undan vinnuálaginu og nái síður að skipta sér af öllum sköpuðum hlutum og hvað þá keppast um að koma með nýjar hugmyndir um útgjöld fyrir hönd skattgreiðenda. 

Borgarfulltrúar verða 23 árið 2018

Flott aðgerð sem kennir okkur ýmislegt

Verkfall lögreglu og skyndileg bylgja veikinda meðal lögreglumanna kennir okkur ýmislegt. Enn starfar samfélagið og ekki hafa enn borist fréttir af stórkostlegri aukningu ofbeldisglæpa og þjófnaða. Það sýnir okkur að þeir lögreglumenn sem þó mæta í vinnuna og halda heilsu eru að gera eitthvað, t.d. forgangsraða í þágu ofbeldisglæpa og þjófnaða.

Þetta byggi ég að vísu bara á tilfinningu en látum okkur sjá. Á Íslandi er bannað að gera alveg ótrúlega mikið og á könnu lögreglu er að framfylgja svo mörgum lögum, reglum, boðum og bönnum að það er ótrúlegt. Auðvitað sleppa mörg brot í gegn en nú má ætla að allskyns fórnalambalaus brot fái enn minni forgang. Lögreglan brýst inn á færri heimili til að gera plöntur upptækar, hellir úr brúsum færri unglinga, áreitir færri nektardansara og fjárhættuspilara og lætur þá í friði sem keyra um bílbeltalausir.

Lögreglan er hérna ómeðvitað að gefa skilaboð til stjórnmálamanna: Fækkið í lagasafninu og löggæslan hættir að krefjast meiri og meiri fjármuna. 

Mikil veikindi meðal lögreglumanna

Nú stendur ríkissjóður vel og þá skal eyða!

Í ár stefnir í að ríkissjóðir verði rekinn með einhverjum afgangi og að byrjað verði að ganga á skuldahítina. Þá er hætt við að allskyns útgjaldahugmyndir skjóti upp kollinum og sýnist mér það vera raunin hér. Í stað þess að áhugamenn um tiltekið áhugamál standi straum af kostnaði áhugamáls síns þá er leitað í vasa skattgreiðenda.

Nú er Laxnesssetur ekki verri hugmynd en hver önnur til að eyða fé skattgreiðenda en það þýðir ekki að hún sé góð heldur að margar hugmyndir eru enn verri. 

Alþingi ætti að sýna sóma sinn í að loka á þessa hugmynd og beina þess í stað tilmælum til áhugamanna um Nóbelsverðlaun og bókmenntir að hér megi eyða eigin fé en ekki annarra. Ég er líka viss um að niðurstaðan verði betri þótt eyðslan verði minni. 

Vilja Laxnesssetur á Gljúfrasteini