Sakna bóluefnapassanna

Ég eyddi nokkrum klukkutímum í verslunarmiðstöð í dag með krökkunum, verslaði gjafir og annað, borðaði á vinsælum fjölskyldustað, stóð í þéttum röðum og andaði að mér sama loftinu og þúsundir annarra. Ég sá fólk með nefrennsli og heyrði nokkra hósta og hnerra. Það er jú hávetur og mikið af umgangspestum í gangi, jafnvel fleiri en á venjulegu ári.

Á einum tímapunkti leit ég í kringum mig og hugleiddi hvað mikið af fólki á miðjum aldri og neðar væri þrísprautað (varla fjórsprautað í Danmörku þar sem fjórða sprautan er ekki í boði fyrir fólk undir fimmtugu nema að ákveðnum skilyrðum uppfylltum). Ég var forvitinn að vita þetta. Létu allir í kringum mig sannfærast? Helmingurinn? Þriðjungur? Hver lét sprauta sig þrisvar af ótta við veiru fyrir ári síðan en hættir sér í dag í troðfulla verslunarmiðstöð á hápunkti vetrarveikindatímabilsins? Hvernig þora þeir í dag sem þorðu ekki í fyrra að lifa eðlilegu lífi? 

Manneskja gekk fyrir ári síðan með grímu á andliti og sprautu í handlegg, virti allar sóttvarnartakmarkanir og fylgdist vel með smittölum. Í dag er gríman farin, sprautan útrunnin og horið aftur velkomið sem sjálfsagður hlutur á köldum tímum.

Ég er forvitinn. Hvað fer fram í höfði þeirra sem voru logandi hræddir fyrir ári en eru nánast of kærulausir í dag án þess að hinn líkamlegi veiruleiki hafi breyst að ráði? Kannski einhver geti útskýrt slíkt hugarfar fyrir mér.

Á vinnustað mínum þarf ég ekkert að velta vöngum yfir þessu. Þar var í boði fyrir um ári síðan að fá sérstakan límmiða á aðgangskort sitt gegn framvísun á staðfestum sprautum, ella sæta prófi á um þriggja daga fresti. Flestir hafa leyft þessum límmiða að standa og ég veit því alveg hvaða fólk undir miðjum aldri er þrísprautað í kringum mig (allir nema ég, að mér skilst). 

En hvað með afgang samfélagsins? Væri ráð að setja límmiða á enni hinna þrísprautuðu til að hjálpa mér að skilja? 

Athugasemdir

[Guðmundur Örn Ragnarsson (IP-tala skráð) 17.12.2022 kl. 16:29]

Í Opinberunarbókinni 13. Kafla stendur: Og dýrið lætur alla, smáa og stóra, auðuga og fátæka og frjálsa og ófrjálsa, setja merki á hægri hönd sér eða á enni sín og kemur því til leiðar að enginn geti keypt eða selt nema hann hafi merkið, nafn dýrsins, eða tölu nafns þess.

Dýrið krefst ekki enn að við förum í flensusprautur. En við máttum ekki fara til útlanda án merkis þess um þrjár sprautur. 

[Geir Ágústsson, 17.12.2022 kl. 17:38]

Guðmundur,

Evrópskur sprautupassi er búinn að vera á döfinni lengur en veira en fékk býr undir báða vængi og nú eru alvarlegar hugmyndir í gangi um að bæta við þann passa, svo sem kolefnislosun. Kannski með tíð og tíma að hafa réttar skoðanir. Þetta verður í formi forrits eða örgjörva sem græddur er í fólk.

Opinberunarbókin á svo sannarlega titill sinn skilinn!

[Þorsteinn Siglaugsson, 17.12.2022 kl. 21:23]

Líklega trúir blessað fólkið því að sprauturnar verndi það svona vel gegn smitum, nei, afsakið, gegn veikingum, nei afsakið, gegn gjörgæslu og öndunarvél, nei, afsakið, gegn dauðsföllum ... nei, afsakið: það eru bóluefnapassar í himnaríki.

[Geir Ágústsson, 17.12.2022 kl. 22:21]

Þorsteinn,

Gömul nálgun á syndaaflausn er að segja Maríubænina í nokkur skipti og þá er synd þín fyrirgefin. Hversu oft er ákveðið af prestinum.