Lygarnar bráðna hver af annarri

Þær endurnýjast í sífellu, þessar lygar sem dynja á okkur úr helstu fjölmiðlum og úr munni stjórnmálamanna og borgaðra blaðamannafulltrúa þeirra (sem kalla sig stundum blaðamenn). En þær bráðna líka margar hverjar jafnóðum (apabóla, einhver?).

Flestum þessara lyga trúum við enda varla stætt á öðru. Þeir sem gleypa lygarnar aðeins of hægt eru stimplaðir samsæriskenningasmiðir, það er lokað á aðgang þeirra á samfélagsmiðlum og þeir fá ekki birtingar á greinum né boð á fundi. Hver vill vera kallaður Pútín-sleikja og stuðningsmaður þess að gamalt fólk deyi úr veiru? Fáir hafa bein í slíkt. 

En mögulega voru veirutímar of mikið. Lygarnar voru keyrðar fast og hratt og fylgt eftir með sektum og reglugerðum. Við fengum engan tíma til að ræða hlutina og ákvarðanir voru teknar á bak við lokaðar dyr. Þetta virkaði á tímabili en að lokum fékk fólk nóg og yfirvöld fóru að draga í land. 

Margir áttuðu sig á þessu og sáu í gegnum þvæluna og spyrntu við fótum. En það gerðist eitthvað annað og meira hjá mörgum sem vöknuðu úr værum blundi á veirutímum. Það myndast vantraust á yfirvöld almennt. Hvaða fleiri lygar er verið að segja okkur? Standast þær einhverja skoðun? Eru mögulega einhver stærri hagsmunaöfl þar að baki, sem koma lýðræðislegu stjórnarfyrirkomulagi ekkert við?

Hvað með loftslagsumræðuna?

Stríðsleiðangra vestrænna ríkja víða um heim?

Ákall til barna um að afneita líffræðilegu kyni sínu, en til vara að efast um að það sé rétt skráð?

Fyrirkomulag peningaútgáfu?

Aðförina að hagkvæmum bílum almennings?

Endalausar kröfur um að flokka rusl niður í smæstu frumeindir?

Ágæti þess að gera einstæða feður að fátækum þunglyndissjúklingum?

Þann valkost við réttarríkið að það sé einfaldlega nóg að ásaka einhvern um eitthvað til að koma viðkomandi úr starfi?

Mögulega leynast sannleikskorn hér og þar en í öllum tilvikum - þeim sem hér hafa verið talin upp meðal annarra - er áróðurinn keyrður svo fast með einróma rödd úr öllum áttum að það má þykja furðuleg einsleitni í samfélagi sem að nafninu til á að virða frelsi af ýmsu tagi.

Margir eru að vakna úr dáinu, sem betur fer, og byrjaðir að hugsa málin upp á nýtt. Sérstaklega fagna ég þessu í tilviki loftslagsumræðu, en sífellt er verið að skerða lífskjör okkar í nafni hennar, og mögulega verður hreinlega ómögulegt fyrir venjulegt fólk að ferðast í bílum og flugvélum í náinni framtíð.

Nema auðvitað að nógu margir spyrni við fótum.

Um helgina var ég viðstaddur Stúdentafögnuð Menntaskólans í Reykjavík og sat þar með 25 ára útskriftarárgangi mínum í sal með stúdentum frá unglingsaldri til hárrar elli. Ég var viðstaddur nákvæmlega eins viðburð fyrir 25 árum (þó í öðrum sal), þá nýstúdent, og bæði skiptin alveg geggjuð. Það rann upp fyrir mér að stundum er best að breyta engu. Ef það er ekki bilað, ekki reyna að laga það. Kannski þetta hugarfar sé nothæft í baráttunni gegn nýjustu þvælu yfirvalda.

Athugasemdir

[Trausti (IP-tala skráð) 29.5.2023 kl. 02:32]

Sæll Geir,

Þú segir "en að lokum fékk fólk nóg og yfirvöld fóru að draga í land."

Ég held ekki... Covid byrjaði eins snöggt og það hætti.. Það er á hreinu að Elítan getur ekki haldið úti tvær áróðursherferðir á sama tíma og þegar stríðið byrjaði í Úkraníu þá þurfti það að velja og það valdi það síðara þessvegna hætti Covid. Sauðheimskur almenningurinn var tilbúin að stökkva fram af hengibrún ef það hefði fengið fyrirskipun um það frá strengjabrúðunni sóttvarnalækninum. Þvílík var dáleiðslan á landanum á þeim tíma.

[Geir Ágústsson, 29.5.2023 kl. 05:59]

Trausti,

Þetta er ágæt kenning í tilviki Íslendinga. Í Kína voru það götumótmæli almennings sem gerðu veiruna bærilegri og takmarkanir óþarfi.

[Kristinn Bjarnason, 29.5.2023 kl. 13:21]

Hversu skrítið er að yfirvöld á vesturlöndum neiti að rannsaka afleiðingar af covid sprautunum. Þessu fólki er ekki lengur treystandi.

Almenningur er í stríði við yfirvöld án þess að vita af því og tapar því stríði hratt og örugglega. Yfirvöldum á vesturlöndum virðist vera stýrt af einhverjum öflum sem við vitum ekki hver eru. Þetta hljómar mjög geggjað en ég hef verulegar áhyggjur af því að raunveruleikinn sé enn verri. Hver tilgangurinn er með þessu er mér hulin ráðgáta. En ég á ekki von á því að niðurstaðan verði góð fyrir almenning. Leyfum okkur samt að vona það besta.😎