Ríkisstjórnin: Icesave-stjórnin?

Ríkisstjórnir á Íslandi fá oft nöfn, t.d. Viðeyjarstjórnin. Þetta eru auðvitað ekki "opinber" nöfn, en þau nöfn sem fólk notar sín á milli til að ræða ákveðnar ríkisstjórnir án hættu á ruglingi.

Núverandi ríkisstjórn hefur sjálf reynt að kalla sig norræna velferðarstjórn. Betra nafn er samt sennilega Icesave-stjórnin. Þetta nafn minnir okkur á svo mörg af afrekum ríkisstjórnarinnar, til dæmis:

 

• Tilraun hennar til að klína skuldbindingum einkaaðila á íslenska skattgreiðendur án þess að láta reyna á rétt sinn fyrir dómstólum (hvernig hefðu þorskastríðin svokölluðu farið ef sama viðhorf hefði ráðið ríkjum þá?)
• Algjörlega misheppnaða endurreisn hagkerfisins, þar sem skuldugir Íslendingar voru t.d. afhentir erlendum vogunarsjóðum, verðbólgubálinu var haldið gangandi auk verðtryggingarinnar, höft sett á val einstaklinga og fyrirtækja á viðskiptum með peninga, og svona mætti lengi telja.
• Ofurtrú íslensku ríkisstjórnarinnar á áliti "erlendra sérfræðinga" sem um leið voru á launaskrá hjá sömu ríkisstjórn.

 

Að vísu minnir þetta nafn, Icesave-stjórnin, eitthvað minna á afrek eins og aðförina að sjávarútvegnum, lokun landsbyggðarsjúkrahúsa á meðan tónlistarhöll er reist fyrir reykvísku elítuna, og endalausan söng um að hallarekstur ríkissjóðs árið 2012 sé ríkisstjórn frá árinu 2008 að kenna. Kannski ætti frekar að kalla ríkisstjórnina Ábyrgðarflótta-stjórnina, Ekkiméraðkenna-stjórnina, Síminnkandi-stjórnina eða Lofasvíka-stjórnina.

En mér líkar ágætlega við heitið Icesave-stjórnin. 

Athugasemdir

[Ívar Pálsson, 30.1.2013 kl. 00:31]

Rétt hjá þér Geir, Icesave- stjórnin. En aðför hennar að lýðveldinu, sjávarútvegi, atvinnuvegunum, stjórnskipan og fólkinu í landinu yfirlett er slík að Aðfarar- stjórnin gæti líka átt við.

Nú þarf að stöðva aðför stjórnarinnar að stjórnskipuninni og framsal hennar á fullveldinu. Fljótlegast er að fella hana strax, því að skaðinn síðustu mánuðina getur annars orðið töluverður.

[Geir Ágústsson, 30.1.2013 kl. 09:59]

"Aðfarar-stjórnin" er alveg prýðilegt nafn! Það gæti hins vegar valdið ruglingi. Ríkisstjórn gæti t.d. farið í aðför að tollum, háum sköttum, ríkiseinokun (á menntun, heilbrigðisgæslu, peningaútgáfu osfrv.) og reglugerðarfrumskóginum og þá er orðið "aðför" jákvætt. Og það má fyrir enga muni ruglast á einhverju jákvæðu og þessari ríkisstjórn.

Annars er nú ekkert sjálfgefið að ný eða betri ríkisstjórn taki við. Skv. seinasta Þjóðarpúlsi Gallup er staðan svona:

D: 36,3%

S: 19,1%

B: 13,1%

BF: 12,3%

VG: 9,1%

Annað og Samstaða: 7,1%

(Óútskýrt er svo hvar seinustu 3,0% eru)

Möguleg ríkisstjórn:

S+B+BF+VG = 53,6%

Það má aldrei útiloka að B hoppi í samstarf með vinstriflokkunum. S-fylgið er að fara, en því miður bara til litlu systur, BF.

[Ívar Pálsson, 30.1.2013 kl. 10:15]

Já, en aðför er gjarnan notuð sem neikvæð atlaga að einhverju (sem traust er).

Sjálfstæðisflokkurinn er með þetta 36% fylgi nokkuð fast, þannig að eitthvað þarf til þess að það aukist upp í nauðsynleg 40%. Hugsanlega færir Icesave- niðurstaðan honum og Framsókn eitthvert fylgi. Alvöru ESB-hlé eða slit færa kannski prósentur frá ESB flokkunum Samstöðu og Samfylkingu yfir í XD-XB ásinn, enda er kannski mesta tilfærslan á fyrrverandi ESB-fólki. Samfylkingin gæti hirt fjölda þeirra hægri krata ef hún setti ESB-umsókn í frost en hún er ekki tilbúin til þess.

Raunar er líklegast til árangurs ef Framsóknarflokkur og Sjálfstæðisflokkur næðu báðir að bæta við sig 2-3 prósentustigum hvor. Hanna Birna fæst ekki til þess að fara í formanninn og þá verður þetta að nást með heildinni. Sigmundur Davíð og Frosti hífa nú sitt eflaust upp. Þeir fara ekki í vinstri stjórn!