Kennarastéttin reynir að ná lögvarinni einokunarstöðu

Nú hélt ég að það væri erfitt að manna stöður í íslensku mennta- og barnapössunarkerfi. Erfitt að laða að fólk í stéttina. Erfitt að halda í gott fólk. Nei svo virðist ekki vera því Kennarasambandið óskar nú eftir enn einu pappírslagi á milli venjulegs fólks og hinna gríðarlega faglegu kennara! "Leyfisbréf" já? Ekki þurfti ég svoleiðis þegar ég kenndi í hlutastarfi við minn gamla menntaskóla á meðan ég var enn í grunnnámi í háskóla. Ég sá ekki að ég væri mikið skelfilegri kennari en þeir þaulreyndu og útúrsérmenntuðu, þótt auðvitað geri maður sín byrjendamistök.

Þessi eilífa krafa um fleiri pappíra og fleiri titla er ekki kennarastéttinni til bóta þegar kemur að ráðningum og að halda í fólk. Hún veit það líka. Þegar stéttafélag heimtar fleiri stimpla og leyfisbréf þá er það til að loka fyrir of mikla samkeppni við meðlimi sína. Ef stéttafélag fær ríkið til að samþykkja "ákveðin lágmarksskilyrði" (sem vitaskuld verða erfiðari og erfiðari á hverju ári) þá er hinum þrautþjálfuðu meðlimum stéttafélagsins tryggð ákveðin lögvarin einokunarstaða, og síðan hvenær hefur slíkt verið neytendum, notendum, kaupendum og nemendum til hagsbóta?

Kennarar fagna frumvarpi um kennaramenntun

Athugasemdir

[Nafnlaust (IP-tala skráð) 28.1.2008 kl. 17:32]

Sammála þér! Frekar ætti að nota peningana sem þetta kostar í að hækka laun kennara og þá fyrst myndi fleira gott fólk sækja í þessi störf.

[Elías Theódórsson, 28.1.2008 kl. 17:34]

Afnema skal skólaskyldu (réttnefnd uppeldisstofnanaskylda) í leiðinni og taka upp fræðsluskyldu í staðinn. Það er hægt að læra án þess að hafa kennara.

[Páll (IP-tala skráð) 28.1.2008 kl. 17:43]

Ég held að litlar framfarir og meir fólksflótti verði úr stéttinni ef menn telja að hver sem er geti gengið inn í starfið og sinnt því eins og til er ætlast af mönnum.  Ég held að það sé varasamt að gera ekki kröfur um hæfni og menntun í kennarastarfinu eins og þú gefur í skyn.  Hvort myndir þú velja tveir kostir stæðu barni þínu til boða?  Annars vegar leiðbeinandi með stúdentspróf á undanþágu eða kennari sem hefur sérhæft sig í að kenna því aldursstigi sem barn þitt er á?  Hvað er að því að sækjast eftir lögverndun starfsins?  Ekki ganga menn í störf lækna, sálfræðinga, lögfræðinga eða annara sérfræðistétta?  Það þykir bara sjálfsagt að bera virðingu fyrir því námi og sérhæfinu sem menn hafa aflað sér á lífsleiðinni.

[Elías Theódórsson, 28.1.2008 kl. 17:50]

5 ára háskólanám til að "passa" börn á leikskóla. En hvað með foreldrið sem sér um þetta sjálft? á að skylda það líka í háskólanám til að geta alið upp sitt barn? Hvar enda þessi ósköp?

[Valdís (IP-tala skráð) 28.1.2008 kl. 18:54]

Þú mættir nú alveg kynna þér málið aðeins... Starfsheitin grunnskólakennari og framhaldsskólakennari eru þegar lögvernduð.

[Geir Ágústsson, 28.1.2008 kl. 19:18]

Mig varðar ekkert um lögvernd, og fyrirtækjum í raun ekki heldur. Ég held að EINN einstaklingur úr mínum BS-árgangi í véla- og iðnaðarverkfræði hafi sótt um "löggildingu" á sjálfum sér sem hið fína heiti "verkfræðingur". Aðrir flögguðu bara skírteinum sínum frá vel þekktum Háskóla Íslands og ruku í stöður.

Gallinn við dæmi Páls hér að ofan (sem gerir ráð fyrir að ákveðið frelsi ríki) er að á Íslandi er bannað með lögum að leita til annarra en hinna ríkisreknu uppeldisstofnana og þeirra sem þar starfa, hvort sem það er hæft fólk og ánægt eða óhæft og óánægt fólk í eilífum verkföllum. Ekki margir foreldrar geta staðið undir skattbyrðinni sem skólakerfið krefst og samtímis stytt vinnudaginn sinn til að kenna barni sínu. Járngripið er traust hjá hinu opinbera.

[Bára (IP-tala skráð) 28.1.2008 kl. 19:49]

Skrítið þjóðfélag sem leyfir ekki hverjum sem er að klippa hár á hárgreiðslustofum landsins en hefur aðrar reglur um þá sem kenna börnum ...  Hvað gerist ef hár er illa klippt?

Skilaboð ráðamanna með þessum undanþáguveitingum er stórskrýtin...

Kveðja Bára - kennari 

[Elías Theódórsson, 28.1.2008 kl. 20:26]

Geir, skattbyrðin mun bara þyngjast og heimavinnandi foreldrar munu enga umbun fá frekar en fyrri daginn. Er það sanngjarnt?

Bára, það bannar þér enginn að klippa hár barna þinn eða annarra sem það kjósa!  Þekkir þú engan nemanda sem hefur komið illa út úr einelti í skóla? Þekkir þú engann ungan dreng sem líður illa í skóla? Finnst þér í alvöru í lagi að senda 6ára drengi á skólabekk?

[Geir Ágústsson, 28.1.2008 kl. 21:38]

Jahérna, í hvaða öngstræti rataði þessi umræða?

Í hvorki meira né minna en í DAG er skólastjórnum skipað að ráða eftir einhverju allt öðru en eigin hyggjuviti. Þegar ég (búinn með nokkur ár í verkfræðinámi) var kominn langt í umsóknarferlinu eftir hlutastarfi (með námi) sem stærðkennari í mínum gamla framhaldsskóla þá hékk umsókn mín alltaf á bláþræði því menntaður íslenskufræðingur með kennsluréttindi hafði ekki gert upp hug sinn með hvort hann tæki stöðuna sem ég sóttist eftir. Menntaður íslenskufræðingur að kenna stærðfræði? Sendið frekar refinn í hæsnabúrið!

"Fagmennska" er engin ávísun á bætta kennslu. Hins vegar er hún ávísun á einokunarstöðu stéttar sem óttast um hag sinn og vill múra sig inni með feitu stöðunum með hjálp ríkisins. 

[Geir Ágústsson, 28.1.2008 kl. 23:38]

Ég hlýt bara að mæla með alveg ljómandi lesefni núna: Lögverndun á starfsréttindum.

Tilvitnun:

"Lögverndunarlögin hefðu ef til vill virkað til að hækka laun kennara ef fólk hefði almennt trúað að réttindamenn hafi afgerandi yfirburði yfir leiðbeinendur. En það gerði nánast ekki nokkur maður, enda var og er munurinn á dæmigerðum réttindamanni og dæmigerðum leiðbeinanda sá helstur að réttindamaðurinn hefur lokið 30 eininga námi í uppeldis- og kennslufræði til kennsluréttinda en leiðbeinandinn ekki. Engir, ekki einu sinni hörðustu talsmenn laganna frá 1986, trúðu því að eins árs nám í uppeldis- og kennslufræðum gæfi réttindakennurum neina afgerandi yfirburði yfir leiðbeinendur."

[Einar Jón, 29.1.2008 kl. 16:52]

Geir: Maður fær ekki "löggildingu" á sjálfum sér sem hið fína heiti "verkfræðingur" eftir B.s. námið. Það þarf a.m.k. 120 eininga nám til þess (M.s., eða gamla C.s.) og ef þessi eini fékk skírteini hefur það væntanlega verið afturkallað um leið og mistökin uppgötvuðust. 

En hvorutveggja (kennsla/verkfræðistörf) er þetta klassískt dæmi um framboð og eftirspurn, með mismunandi breytum.

[Geir Ágústsson, 29.1.2008 kl. 21:07]

Einar Jón,

Ég má ekki kalla mig verkfræðing á Íslandi þótt ég sé með mastersgráðu í faginu upp á vasann. Mér er líka skítsama. Vinnuveitendur vilja sjá útskriftarpappíra, ekki fína titla.

[Geir Ágústsson, 29.1.2008 kl. 21:11]

En ég sé að ég var svolítið óskýr hér að ofan og umorða:

Af þeim sem voru með mér í BS-bekk í véla- og iðnaðarverkfræði en kláruðu MS síðar meir (í ýmsum skólum og á mismunandi árum) þá hef ég bara staðfestar upplýsingar um einn sem hefur útfyllt pappíra og greitt til Verkfræðingafélagsins það sem þarf til að mega af náð og miskunn yfirvalda kalla sig verkfræðing á Íslandi. 

[Einar Jón, 30.1.2008 kl. 09:54]

OK - en flestir (eða helmingur) úr rafmagnsverkfræðinni sem kláruðu masterinn fylltu út þessa einu umsókn og borguðu þennan 5000-kall til ráðuneytisins (ekki Verkfræðingafélagsins) til að fá plaggið og titilinn. Ég á tvö ofan í einhverjum skúffum.

En það er hárrétt að vinnuveitendum virðist vera nákvæmlega sama, með þeirri undantekningu að þegar ég fékk fyrra plaggið eftir B.S. fékk ég óumbeðna  ~15% launahækkun í sumarvinnunni.