Þessir óþægu Afríkubúar

Fyrir ekki mörgum áratugum síðan var Asía talin stærsta vandamál heimsins. Þar voru hundruð milljóna fátæklinga sem bjuggu við hungur og vosbúð. Fellibylir þurrkuðu út heilu héröðin og neyðin var oft mikil.

Þessi tími er sem betur fer að mestu liðinn. Ástæðan er meðal annars sú að Asíubúar hafa unnið að því eins og brjálæðingar að byggja upp orkuinnviði sína sem þeir nýta til að knýja iðnað og ísskápa og gera það með kolum, olíu, gasi, vatnsafli og hreinlega öllu sem framleiðir orku (meira að segja lélegir, dýrir, óáreiðanlegir og plássfrekir orkugjafar til rafmagnsframleiðslu eins og vindur og sól eru nýttir). Lífskjör batna, það hægist á fólksfjölgun, líf lengjast og smátt og smátt opnar fólk augun fyrir vernd á loftgæðum og náttúru þegar sárasti sulturinn er að baki. 

Núna er vandamálið Afríka. Þar eru hundruð milljóna enn án rafmagns og hvað þá annarra nauðsynja nútímamannsins. Fátæktin leiðir til annarra vandamála, eins og flóttamannastraums, sjúkdóma og vosbúðar. 

En Vesturlönd hafa svolítið einkennilega nálgun þegar kemur að Afríku: Þau fordæma nánast allt sem Afríkuríki gera til að reyna bæta hlutskipti sitt.

Þeim er sagt að sleppa því að brenna jarðefnaeldsneyti til að eyðileggja ekki loftslagið hjá ríka fólkiu. Þau eiga á einhvern undraverðan hátt að geta efnast á einhvern allt annan hátt en afgangur heimsins, og vera umhverfisvæn í leiðinni. 

Gott og vel, þegar gömlu nýlenduherrarnir vilja ekki sleppa tökunum þá má reyna að þóknast þeim, og mörg Afríkuríki horfa núna til kjarnorku. Gott mál, ekki satt? Kjarnorka útvegar stöðuga orku sem réttlætir uppbyggingu á öflugu raforkudreifikerfi, veitir iðnaði möguleika á að koma sér fyrir og loftslagið upplifir ekkert nema vatnsgufu frá kæliturnunum.

Nei. Ekki nógu gott! Af hverju? Jú, af því Rússar eru að hjálpa Afríkuríkjunum með lánum, sérþekkingu og aðgangi að kjarnorkueldsneyti!

Rússar!

Við hverju bjuggust Vesturlönd þegar þau neituðu að aðstoða Afríku við að byggja upp hagkvæma og stöðuga orkuframleiðslu?

Við hverju bjuggust Vesturlönd þegar þau þóttust geta lokað Rússa af? Að aðrir heimshlutar gerðu það sama, þvert á eigin hagsmuni?

Ekki get ég svarað þessu en vegna aðgerða Vesturlanda er núna að verða til ný heimsmynd þar sem hlutverk Vesturlanda er einfaldlega minna en áður og blaðamenn okkur rassskelltir af þjóðarleiðtogum þegar þeir reyna að predika úr fílabeinsturni.

Ekki styð ég vegferð Rússa í Úkraínu þar sem menn eru að stráfalla af því tveir forsetar gátu ekki fengið að tala saman um endalok áratugar af átökum án afskipta okkar á Vesturlöndum. Öll stríðsátök eru slæm, líka þau sem við nennum ekki að mynda okkur skoðun á. En vegferð Vesturlanda er mér einnig stórt áhyggjuefni því ég bý á Vesturlöndum og sé að það verið að mála stórt skotmark á þau um leið og leiðtogar Vesturlanda þykjast ennþá vera (yfirlætisleg) rödd á heimssviðinu.

Katrín mælist með mesta fylgið

Athugasemdir

[Bjarni (IP-tala skráð) 9.4.2024 kl. 11:29]

Vandamál Afríku eru ekki vesturlönd eða aðrir utanaðkomandi þættir.

Vandamál Afríku er innbyrgðis óeining.  Þjóðríki Afríku eru ekki þjóðir heldur samsett af mismunandi ættbálkum.  Korteri eftir að Suður Súdan fékk sjálfstæði logaði landið í átökum milli ættbálka.  Fjöldamorðin í Rúanda voru vegna ættbálkaerja.  Nígería skiptist í tvennt vegna ættbálka og trúar.  Átök í Afríku hafa að mestu ekku verið milli ríkja heldur milli ættbálka innan ríkjanna.

Svo ég sletti smá rasisma inní umræðuna, færi ekki betur á því að aðrir sæju um yfirstjórnina hjá þessum þjóðum?

[Grímur Kjartansson, 9.4.2024 kl. 12:01]

Á meðan er bókstaflega ALLT sem hugsanlega mögulega skerðir lífsgæði vesturlandabúa - mannréttindabrot 

Svissneska ríkið sakfellt í loftslagsmáli (mbl.is)

[Geir Ágústsson, 9.4.2024 kl. 18:12]

Bjarni,

Okkur er kennt að gjarnan handahófskenndar línur á korti, stundum nefndar "landamæri", séu ófrávíkjanlegur og heilagur sannleikur og að minnsta frávik frá þessum línum sé ávísun á stríðsátök. Á meðan þetta er almennt og viðtekið viðhorf þá verða alltaf til línur á kortinu sem skera í sundir ættbálka, fjölskyldur og þjóðir.