Fyrir löngu búið að leysa leigubílavandann fyrir fullorðna karlmenn

Skortur á leigubílum er hálfgert einkennismerki Reykjavíkur og þá sérstaklega næturlífsins. Ég heyrði um þriggja klukkustunda bið eftir leigubíl seinasta sumar og var þá feginn að hafa reddað mér úr bænum á annan hátt sjálfur.

Ég er fullorðinn karlmaður og sest því nokkuð rólegur inn í bíl lögbrjóta sem keyra gegn reiðufjárgreiðslu (og hafa þeir í öllum tilvikum keyrt óaðfinnanlega). Hið sama gildir væntanlega ekki um fíngerða kvenmenn sem eru einir á ferð, svo dæmi sé tekið. Þeir vilja helst setjast í bíl með löglegum fagmanni sem sætir eftirlits og er hægt að kvarta undan eða kæra (því nafn hans er ekki á huldu). 

Leigubílavandinn er með öðrum orðum leystur fyrir löngu fyrir fullorðna karlmenn, meðal annars með svokölluðum skutlurum. Þeir sem læra á þjónustu skutlara taka ekki leigubíl nema í ýtrustu neyð, þegar ekkert annað er í boði.

Sumir leysa svo vandann einfaldlega með ölvunarakstri eða akstri án gilds ökuskírteinis. Því miður.

Það væri óskandi að sérhæfð fyrirtæki eins og Uber og Lyft væru starfandi á Íslandi. Kannski einhverjar flökkusögur um bílstjóra í Indlandi standi þar í vegi fyrir sjálfsögðum hlut (og flökkusögur um hefðbundna leigubílstjóra látnar eiga sig). Ekki má skrifa þvermóðskuna á  umhyggju fyrir fólki sem stundar bíllausan lífsstíl (a.m.k. á meðan það er ölvað).

„Langsótt“ að Uber og Lyft séu velkomin

Athugasemdir

[Guðmundur Ásgeirsson, 4.6.2022 kl. 15:21]

Svo er líka ágæt lausn að búa bara í göngufæri við miðbæinn ef maður er skemmtanaþyrstur og nennir ekki að bíða í leigubílaröð.

Önnur lausn gæti verið að byggja upp skemmtanalífskjarna víðar en bara á þessum eina litla bletti í lægsta póstnúmerinu.

[Vagn (IP-tala skráð) 5.6.2022 kl. 16:30]

 Það er af sem áður var. Þegar leigubílar óku 24/7 og ekki var nema hálftíma bið í mesta lagi þó allir staðir lokuðu á sama tíma. Nú taka skutlarar rjómann og ekki er lengur grundvöllur fyrir atvinnumennsku í leigubílaakstri. Og Uber og Lyft vilja ekki koma meðan greiða þarf bílstjórum samkvæmt kjarasamningum og gefa tekjur upp til skatts. Amman sem þarf að komast til læknis klukkan tvö á þriðjudegi fær engan leigubíl og skutlararnir eru í vinnu eða skóla. En allt er víst gott ef karlmenn með skerta dómgreind af drykkju geta fengið réttindalaust ungmenni sem ekkert gefur upp til skatts til að skutla sér ótryggðum heim eftir drykkjuna.

[Geir Ágústsson, 5.6.2022 kl. 17:05]

Skutlarar eru afkvæmi forneskjulegs fyrirkomulags leigubíla á Íslandi. Bjórinn í skottinu hjá þeim er afkvæmi foreskjulegs fyrirkomulags áfengissölu á Íslandi. 

Annars er greinilega langt síðan þér var boðið á barinn því "leigubílaröðin" hefur verið fast hugtak í reykvísku tungutaki síðan kannski næturstrætó var og hét fyrir 20-25 árum. Þessi hálftímabið var kannski nokkrum áratugum fyrr?

[Vagn (IP-tala skráð) 5.6.2022 kl. 19:23]

Breytingar og nýungar eru ekki undantekningalaust til bóta. Þess eru mörg dæmi að aukið frelsi skili verri þjónustu, dýrari og hættumeiri. Hvort internet sem býður upp á stórfelld skattsvik og svindl á neitendum, minni löggæsla eða forneskjulegt fyrirkomulag aksturs með atvinnubílstjórum sem greiða skatta af mannsæmandi launum sé foreldri skutlara finnst mér ekki skipta miklu máli. Flestir vilja geta fengið akstur alla daga og á öllum tímum, ekki bara nætur um helgar.

Og meðan þú miðar við bið eftir bíl fyrstu opnu sumarhelgi eftir lokanir vegna covid þá má ég miða við þegar leigubílaakstur var starf sem hægt var að lifa af en ekki bara aukavinna þeirra sem nenna þegar mesta eftirspurnin er og gott veður. 

[Geir Ágústsson, 5.6.2022 kl. 19:36]

Vagn,

Stundum hittir þú á rétta nótu en hérna ertu úti að aka (þó ekki á leigubíl). Heldur þú í alvöru að Uber-bílstjórarnir sem keyrðu mig í Þýskalandi eða Póllandi hafi ekki greitt skatta? Uppspuni frá rótum af þinni hálfu. 

Og heldur þú að þýsk eða pólsk yfirvöld, eða yfirvöld hvar sem er þar sem Uber er ekki bannaður, telji ekki að starfsemin þurfi að fylgja lögum? 

Skutlarar eru vissulega skattlausir og eftirlitslausir og jafnast á við að fá far hjá vini eða kunningja sem eru "bara" með bílpróf. En veistu, stundum þarf það að duga.

Og nei, 3 klst biðin var ekki á einhverjum sérstökum óvæntum álagspunkti eins og "megavika Dominos" eða "skattfrjálsir dagar í Hagkaup", sem virðast þó vera fyrirbæri sem ganga upp með svolítilli skipulagningu og forsjálni.

[Vagn (IP-tala skráð) 5.6.2022 kl. 22:03]

Það hefur gengið treglega fyrir skattayfirvöld í öllum löndum þar sem Uber starfar að fá upplýsingar. Og treglega gengið af fá það til að fara eftir lögum um réttindi starfsmanna.

Það að fá far gegn greiðslu jafnast ekki á við það að fá far hjá vini eða kunningja. Allavega samkvæmt tryggingaskilmálum ökutækisins. Þú ert tryggður farþegi hjá vini eða kunningja, þú ert ótryggður viðskiptavinur í farartæki sem ekki er tryggt til atvinnureksturs hjá skutlaranum. Og lögreglan hefur einnig heimild til að sekta þig fyrir af greiða fyrir ólöglega starfsemi.

Þú býrð í Danmörku og komst hingað loksins síðasta sumar þegar einhverjum takmörkunum og lokunum var aflétt. Í "megaviku" skemmtanahalds þegar allir og amma hans voru á djamminu. Það er þitt viðmið.

Margir leigubílstjórar skiluðu inn leifum og hættu akstri í covid. Enda gera leifin kröfur um akstur utan há annatíma sem erfitt er að uppfylla þegar innkoman minnkar svo mikið að sækja þarf vinnu í annarri grein. Skutlið sá svo til þess að enn hafa þeir ekki skilað sér aftur. Skutlið er að auka á skort og vandræði almennings með að fá leigubíl.

[Geir Ágústsson, 5.6.2022 kl. 22:39]

Vagn,

Stafsetning þín hrörnaði töluvert í 3. efnisgrein. Ég tók aðallega eftir því. Tók einhver annar við lyklaborðinu þá?

Náði því annars vel að vandamál leigubílstjóra er meðal annars búið til af yfirvöldum í leit að veiru. 

[Vagn (IP-tala skráð) 6.6.2022 kl. 00:33]

Lyklaborðið og leiðréttingardraslið í símanum er ekki gert fyrir óvana fingur. 

Sama hverjum þú heldur að vandamálið sé um að kenna, það leysist ekki með því að gera atvinnugreinina að helgarhobbíi og undirheimastarfsemi þar sem engar kröfur eru gerðar til bílstjóra og bíla.