Á meðan ísinn þiðnar

Íslenskur sjávarútvegur borgar um 2 milljarða í svokölluð kolefnisgjöld til ríkisins - á ári! Markmið slíkrar gjaldtöku er "að reyna að breyta hegð­un, til að reyna að fá fólk til að fara úr því að nota elds­neyti sem hefur í för með sér að menga og valda lofts­lags­breyt­ing­um", segir umhverfisráðherra, og vill auðvitað hækka skatta. Olíunotkun í sjávarútvegi á Íslandi hefur minnkað úr 246 þúsund tonnum árið 1990 í 133 þúsund tonn árið 2017, skv. SFS. Raunar hófst sú þróun ekki með notkun skattkerfisins heldur með innleiðingu framseljanlegra veiðiheimilda sem gerðu útgerðum kleift að skipuleggja sig til lengri tíma, en það er önnur saga.

Sjávarútvegurinn er sem sagt að breyta hegðun sinni á alveg leiftrandi hraða, en samt skal hann skattlagður í rjáfur. Og núna bíða fiskiskip eftir því að stærðarinnar ísspöng víki svo hægt sé að landa fiski. Kannski hlýnun Jarðar hafi verið afsökun til aukinnar skattheimtu frekar en eitthvað sem raunverulega á sér stað?

Ég birti hér í heild sinni alveg frábæran pistil Vefþjóðviljans (frá nóv. 2015) um tungutak stjórnmálamanna í samhengi loftslags og breyttrar hegðunar:

Í gær kynntu þrír ráðherrar Framsóknaflokksins svonefnda „Sóknaráætlun í loftslagsmálum“ á blaðamannafundi. Menn vilja ekki fara ónestaðir á loftslagsráðstefnuna í París.

Annað af tveimur tölusettum markmiðum í sóknaráætluninni er að losun gróðurhúsalofttegunda frá sjávarútvegi minnki um 40% til ársins 2030.

Það er ekkert smáræði, hafa sjálfsagt ýmsir hugsað með sér. Mjög metnaðarfullt. Náttúrverndarsamtök Íslands fögnuðu þessu 40% markmiði fyrir sjávarútveginn sem „frábæru“ í Spegli Ríkisútvarpsins í gærkvöldi.

Þegar betur er að gáð er markmiðið hins vegar ekki að draga úr losun um 40% frá sjávarútvegi frá því í dag til ár[s]ins 2030 heldur verður miðað við árið 1990 sem upphafsár.

Árið 1990 er stundum sagt að kvótakerfið hafi loks verið fullskapað á Íslandi, kvótinn hafi orðið sæmilega traust eign sem gat gengið kaupum og sölum.  Vafalítið á kvótakerfið sinn þátt í því að dregið hefur úr olíunotkun í sjávarútvegi því það gefur miklu betri færi til skipulagningar veiða en önnur og fyrri kerfi. Skipum hefur því fækkað og dregið úr orkuþörf.

Frá 1990 til 2012 minnkaði losun gróðurhúsalofttegunda frá sjávarútvegi nefnilega um 38%.

Þetta er í raun frábært dæmi um hvernig ná má árangri í orku- og umhverfismálum án skatta, boða og banna. Orkusparnaður er innifalinn í góðum kerfum á borð við íslenska fiskveiðistjórnunarkerfið.

Það er heldur ekki ónýtt fyrir ráðherrana að hafa nánast náð öðru tölusetta markmiðinu sínu um leið og sóknaráætlun þeirra var kynnt.

Fer ekki að koma tími til að taka upp heiðarlega skattheimtu aftur, frekar en skattheimtu byggða á vitleysu ætlaðrar til að framfylgja trúarskoðunum vinstrimanna?

Ís lokar innsiglingunni

Athugasemdir

[Guðjón E. Hreinberg, 9.2.2021 kl. 13:02]

Frábær pistill - en; Heiðarleg skattheimta mun aldrei verða veruleiki í Öfgasósíalisma og meðan fólk skilur ekki tilveruknött þess hugtaks, rís engin menning aftur og siðmenning heldur áfram að falla.

[Geir Ágústsson, 9.2.2021 kl. 13:27]

Guðjón,

Svartsýni þín er sennilega réttmæt en ég er með hugmynd:

Með því að lækka skatta og gera þá einfalda og gegnsæja og kannski svo viðráðanlega að bótakerfið fer að vega minna í pyngju hins venjulega launþega má ná mörgum markmiðum:

- Fleiri karlmenn geta verið heimavinnandi með börnum sínum og konur fara í staðinn á atvinnumarkaðinn. Heimilin hafa á ný efni á bara einni launaávísun og nú þegar karlar eru í auknum mæli ólæsir og konur að taka yfir háskólana blasir við að nú er kominn tími til að þær sjái um að framfleyta heimili sínu

- Heimavinnandi feður geta svo kannski tjaslað aðeins upp á syni sína sem eru að hrynja niður eins og flugur í sjálfsvígum og lóðfalla í skólakerfinu, með brotna sál og sjálfsmynd og lítið sjálfsálit

- Þetta gefur svo leikskólum svigrúm til að gera það sem þeir vilja gera: Láta starfsfólkið vinna styttri vinnudaga en annað vinnandi fólk, og er jafnvel komið á vaktaálag fyrir að vinna 8 tíma vinnudag. Það er dagljóst að leikskólarnir ráða ekkert við 8 tíma dagvistun

Allt þetta - gegn því einu að lækka skatta!

[Kristinn Bjarnason (IP-tala skráð) 10.2.2021 kl. 19:15]

Það er borin von að skattar lækki í þessu sósíalíska þjóðfélagi eins og Guðjón segir. Á Íslandi er sósíalismi orðinn allsráðandi, í sjálstæðisflokki keppast menn um að þóknast vinstri og er Guðlaugur fremstur meðal jafningja. Eitt er víst að vanlíðan og eymd mun aukast, bara spurning á hversu miklum hraða. Eistaklingar eru vannýttir og eyðilagðir.

Eina sem virðist í boði í haust er vinstri eða meira vinstri.