Getgátur um frétt

Dagbók lögreglu er stundum athyglisverður lestur. Raunar svo að ég vildi óska að fleiri stéttir tækju upp sama sið. Hvar er dagbók lækna til dæmis?

Hvað um það. Að þessu sinni er sagt frá unglingasamkvæmi sem hafi verið stöðvað. Ekki kemur fram hvað margir lögreglumenn komu að því verki né hvað mikið af tíma þeirra hafi farið í þetta brýna þjóðfélagsmál, þar sem einu stóru samkvæmi var breytt í mörg lítil. En eitthvað hefur þetta kostað af fyrirhöfn fyrir lögregluna.

Einnig er sagt frá tveimur innbrotum/innbrotstilraunum. Ekki kemur fram að lögregla hafi mætt á vettvang til að rannsaka málið. Þó er vísað í upptökur eftirlitsmyndavélar svo sennilega hefur einhver lögreglumaður með tíð og tíma skilað sér á vettvang.

Mín ágiskun er sú að unglingasamkvæmið hafi kostað lögregluna a.m.k. tvo lögregluþjóna í 2 tíma, alls 4 manntímar, en að innbrotin hafi samanlagt fengið færri tíma lögreglu. 

Því lögin eru einfaldlega þannig að óteljandi ofbeldislausir verknaðir eru bannaðir með lögum og krefjast gríðarlega krafta af hendi lögreglu á meðan innbrot og ofbeldisverknaðir raðast neðar á listann, óumflýjanlega.

En ekki er þó eingöngu við löggjafarvaldið að sakast því lögreglan hefur vafalaust nokkuð svigrúm til að forgangsraða tíma sínum en velur að forgangsraða í mál sem má ætla að veki mesta athygli. Ég man t.d. vel eftir endurteknum fréttum um lögreglumenn að fjarlægja heimabrugg bænda. 

En þetta eru bara getgátur sem verða vonandi aflífaðar í hvelli. Ég vona það.

Lögreglan stöðvaði fjölmennt unglingasamkvæmi

Athugasemdir

[ls (IP-tala skráð) 20.9.2020 kl. 10:24]

Svona getur maður verið vitlaus. Ég hélt að frjálshyggjumenn teldu eignarréttinn mikilvægan. Í þessari frétt er sagt frá 62 manna partíi sem virðist ekki vera með leyfi húseiganda (20 manns utandyra sem bendir til verulegs ónæðis fyrir nágranna, sem er líkleg ástæða þess að löggan mætti á staðinn), innbrotum og skemmdum á eigum vegna aksturs undir áhrifum. Og svo er tuðað yfir því að löggan sé að skipta sér af.

[Þorsteinn Siglaugsson, 20.9.2020 kl. 11:16]

Unglingar eru auðvitað stórhættulegt fólk og nauðsynlegt að koma böndum á þá hvar sem til þeirra næst. 

Partí er samt ekki brot á eignarrétti. Innbrot og þjófnaður er það hins vegar.

En munurinn er kannski sá að innbrotsþjófar eru yfirleitt á bak og burt loksins þegar lögreglan kemur á staðinn. Unglingarnir eru hins vegar "sitting ducks".

[ls (IP-tala skráð) 20.9.2020 kl. 11:34]

Er það ekki brot á eignarrétti að halda partí án samþykkis eiganda staðar (íbúðar) eða þess sem hann hefur framselt það vald t.d. með leigusamning? 

Reyndar má skilja á löggu sem rætt var við á Vísi að langflestir hafi í reynd verið í óþökk þess sem þó bauð einhverjum í partí þarna. 

Ég veit ekki með aðra en ég vildi ekki fá 62 unglinga (einhverja þeirra misdrukkna) í partí heim til mín. Jafnvel þó ég væri á staðnum.

[Þorsteinn Siglaugsson, 20.9.2020 kl. 12:28]

Það kemur ekkert fram í fréttinni um að brotist hafi verið inn í íbúðina heldur virðast íbúar hafa verið að halda partí. Það er hins vegar brot á eignarrétti að brjótast inn og stela.

[Geir Ágústsson, 20.9.2020 kl. 12:43]

Fréttin segir ekkert um viðhorf húsráðanda, sem var sennilega bara fullur hinum megin í bænum og vissi mætavel af þessu teiti, en varð batteríslaus og löggan gat því ekki náð  í hann. Nema hann hafi verið utan símasambands á veiðum á hálendinu og orðið brjálaður að heyra um þetta teiti. 

En jú, húsráðandi á auðvitað að veita blessun sína á notkun húsnæðisins. En ekki löggan.

[Þorsteinn Siglaugsson, 20.9.2020 kl. 12:54]

Líklega hafa þetta verið börn húsráðanda, og sem íbúar hafa þau væntanlega sinn rétt.

[Geir Ágústsson, 20.9.2020 kl. 18:31]

"Á meðan allt lítur eins út fyrir og eftir partýið..." sagði mér ein móðir um hennar partý-stand hennar sonar á meðan hún var í sumarbústað. 

Það er allur gangur á þessu.

[Þorsteinn Siglaugsson, 20.9.2020 kl. 21:35]

Nákvæmlega mælikvarðinn sem við hjónin höfum gagnvart syni okkar. Ef það er almennilega tekið til eftir partýið er þetta ekkert mál. Og hann leggur líka metnað sinn í þetta.

[Andreadoría (IP-tala skráð) 21.9.2020 kl. 01:42]

Gæti líka hugsast að m.a. hópamyndum og covid hafi eitthvað með það að gera að krakkagerinu var tvístrað.