Plastframtíðin okkar

Plast hefur orðið fyrir miklu aðkasti undanfarið. Að sumu leyti er það skiljanlegt: Í stórum ríkjum þar sem iðnvæðing er ennþá á fullum hraða hafa menn ekki alveg náð að taka á sorpvandamálinu: Nokkur stórfljót eru notuð til að losa gríðarlegt magn af rusli í hafið, þar á meðal plastræmur sem ýmis dýr flækjast í og verða að myndefni fyrir ljósmyndara. 

En plast er dásamlegt. Það er ekki bara notað til að verja matvæli frá skemmdum og minnka þannig matarsóun. Það er líka notað sem byggingarefni í bíla, flugvélar og báta og létta þannig þessa hluti töluvert miðað við stálsmíðina. Þetta bætir eldsneytisnýtingu, eykur hagkvæmni og minnkar hina óttuðu losun á kolefni í andrúmsloftið. Hjólreiðamenn Tour de France klæðast plasti, hjóla á plasti og drekka úr plasti. Plastið er á hraðri leið með að ýta stálinu til hliðar og það er jákvætt.

Til að búa til plast þarf olíu og sem betur fer er ofgnótt olíu í jörðu og jafnvel á yfirborðinu því eitt helsta vandamál margra olíuframleiðenda er of lágt verð á olíu, sem er til merkis um að framboðið er mikið. 

Er þá ónefnt að olía er alveg frábær orkugjafi: Færanlegur, geymanlegur og hár í orkuinnihaldi.

Það er mikilvægt að benda á þetta því samkvæmt minni reynslu er almenn vitneskja um útbreiðslu, notagildi og ágæti plastsins í lágmarki. Ég hef staðið fyrir framan bekk af greindum grunnskólakrökkum sem létu koma sér mjög á óvart að plastið er að finna í skóbúnaði okkar, bíldekkjum (gervi-gúmmí), fatnaði, bifreiðum og mun víðar. Þeim er bara kennt að hata olíuna, en til vara að hlakka til brotthvarfs hennar. Þess í stað þarf að fagna tilvist hennar í umhverfi okkar.

Áfram plast!

Bárður stærstur plastbátanna

Athugasemdir

[Ásgrímur Hartmannsson, 2.12.2019 kl. 20:07]

Þeim er kennt að hata tækni.  Frábært.  Hnignun siðmenningarinnar er vel á veg komin.

[Geir Ágústsson, 3.12.2019 kl. 11:21]

Þeim er ekki kennt að hata tækni. Þvert á móti er tækninni otað að þeim í skólastofunum. Meira að segja stærðfræði er aðallega kennd af tölvuskjá og er því þá ósvarað hvernig eigi að bjarga sér með útreikninga ef það verður rafmagnslaust.

En þeim er ekki kennt að tölvur og símar séu skaðlegir hlutir með öllu sínu plasti, sjaldgæfu málmum, rafmagnsnotkun og notkun á stórum gagnaverum sem sjúga í sig raforku og þarf að tengja við umheiminn með sverum leiðslum og gervihnöttum.

Nei, þeim er kennt að bíllinn og flugvélin séu eiturpillur, og að olían sem knýr þessi tæki sé hættuleg Jörðinni.

Sama olía knýr kannski rafstöðvar sem knýja gagnaverin og vélarnar sem vinna hráefni í snjallsímana en því er haldið utan við.

Pappír á að vera svo skelfilegur fyrir umhverfið en tölvutæknin svo frábær. 

Hipparnir hamast því á Facebook með notkun tækjanna sinna en bölva svo þeim sem keyra í bíl og lesa af pappír.

Auðvitað er ekki heil brú í öllu þessu þvaðri en einhverjir snillingar hafa kannski reiknað út að með því að stilla hatrið af og beina að ákveðinni tækni en ekki annarri þá megi hækka hlutabréfaverðið. Og strengjabrúður á löggjafarsamkundum dansa með tónlistinni.