Málamiðlanir sem virka

Á Íslandi má selja rafsígarettur og vökva í þá en bara að uppfylltum allskyns skilyrðum. Dönsk löggjöf er nánast eins í þessum efnum.

Þetta er í sjálfu sér ágæt málamiðlun. Uppi eru háværar raddir sem vilja banna þessar vörur alveg og henda þar með öllum kröfum um merkingar, læsingar og innihald út um gluggann og vörunum inn á hinn svarta markað. Slíkt hefur ekki reynst vel. Í Bandaríkjunum hafa boð og bönn myndað mikið svigrúm fyrir ólöglega vökva sem innihalda olíu frá kannabisplöntunni og sú olía virðist vera stórhættuleg sem rafsígarettuvökvi.

Boð og bönn leysa einfaldlega engan vanda. Ólöglegur varningur, eða varningur sem býr við óbærilega mörg skilyrði, tekur val úr höndum neytenda og löglegra söluaðila og setur í hendur glæpamanna. Við erum að tala um neyslu á hinu og þessu sem yfirleitt er kallað ofbeldislaus glæpur og ætti alls ekki að vera glæpur.

Nei, það er enginn að tala um að fjarlægja hegningarlögin og gefa grænt ljós á barsmíðar, þjófnaði og morð.

Nei, það er enginn að tala um að rétta ungum börnum logandi sígarettur og kenna þeim að reykja.

Nei, það er enginn að tala um að blanda ungbarnamjólk með rauðvíni.

Nei, það er enginn að tala um að setja fulla unglinga undir stýri á kappakstursbíl og sleppa lausum í Ártúnsbrekkuna.

Ég er að tala um ofbeldislausar athafnir fullorðinna einstaklinga. Þær ber að heimila að öllu leyti. Og þá meina ég: Ef fullorðinn maður vill sprauta fljótandi heróíni inn í líkama sinn, og einhver er tilbúinn að framleiða og selja honum þann varning í frjálsum viðskiptum, þá á það ekki að vera á könnu lögreglu að skipta sér af. Neytendastofa getur þá gert athugasemdir við verðmerkingar, umbúðir og barnalæsingar heróínsins ef hún vill, en viðskiptin fá að fara fram án afleiðinga.

Þetta er sem betur fer og smátt og smátt að renna upp fyrir fleirum. Ég vona að sú þróun haldi áfram.

Rafrettuvökvinn Nasty Ballin innkallaður

Athugasemdir

[Vagn (IP-tala skráð) 9.10.2019 kl. 12:16]

Hvar línuna skuli draga verður ætíð álitamál milli þeirra sem vilja leyfa fullorðnum að gera eins og þeim sýnist og þeirra sem ekki vilja leyfa þeim að verða vísvitandi og viljandi baggi á þjóðfélaginu. Því þó athafnirnar séu ofbeldislausar þá eru þær ekki án afleiðinga og áhrifa á allan almenning.

Að segja "Boð og bönn leysa einfaldlega engan vanda." er alger þvæla. Boð og bönn leysa margan vanda og eru grundvöllur þess að fólk geti búið með öðru fólki. Þetta á jafnt við um litlar einingar eins og hvert heimili og upp í heil þjóðfélög. Og þó einhverjir fari ekki eftir þeim reglum sem gilda gerir það reglurnar ekki gagnslausar.

Brot einhvers á reglum þjóðfélagsins kallar ekki á breytingar á reglunum. Það er ekki þjóðfélagsins að breytast til að þóknast þeim sem ekki geta sætt sig við reglur þjóðfélagsins. 

[Geir Ágústsson, 9.10.2019 kl. 12:23]

Úr grein Guardian:

"But if conservative, isolationist, Catholic Portugal could transform into a country where same-sex marriage and abortion are legal, and where drug use is decriminalised, a broader shift in attitudes seems possible elsewhere."

Það er enn von fyrir þig, Vagn!