Þegar tölvan segir nei

Aðdáendur þáttanna Little Britain þekkja vel atriðin þar sem tölvan segir nei við öllu.

Svona er þetta víðar en í fyndnum, breskum grínþáttum. Fréttir segja nú frá fólki sem býr í allskyns húsnæði sem tölvan veit ekki að hýsir fólk alla daga ársins. Þetta er dæmi um tölvu sem segir nei. 

Einu sinni voru opinber skráningarkerfi ætluð til að skrá það sem fór fram í samfélaginu. Núna eru þau notuð til að stjórna því hvað fólk gerir. Ef tölvan segir nei er það ekki leyfilegt. Í staðinn ætti tölvan bara að taka við upplýsingum um raunveruleikann sé á annað borð áhugi á því að skrásetja raunveruleikann.

Geti átt lögheimili í frístundabyggð

Athugasemdir

[Guðmundur Ásgeirsson, 21.11.2017 kl. 17:20]

Í þessu tilviki er það ekki "tölvan" sem segir nei heldur lögin.

Það verður fróðlegt að sjá hvort fámenn sveitarfélög með stórar sumarhúsabyggðir verði í stakk búin til að veita lögbundna þjónustu á borð við sorphirðu, slökkvilið, skólahald o.fl. þegar eigendur sumarhúsa flytja lögheimili sitt þangað í stórum.

Ástæðan fyrir því að þetta var bannað á sínum var einmitt sú að sum sveitarfélög voru ekki í stakk búin til að veita slíka lögbundna þjónustu, til að mynda á það við um Grímsnes- og Grafningshrepp. Annar hreppur sem mun eflaust leggjast gegn þessu er Skorradalshreppur með aðeins örfáa tugi raunverulegra íbúa en mörg þúsund sumarhús í hreppnum.

Svo má velta því fyrir sér hvort eðlilegt sé að heimila skráningu lögheimilis í atvinnuhúsnæði sem uppfyllir ekki reglur um brunavarnir eða aðrar öryggisreglur? Vandséð er að slík breyting geti verið til bóta fyrir nokkurn mann, nema níðingana sem leigja atvinnuhúsnæði til fólks sem er á hrakhólum á húsnæðismarkaði því mað muna gera þeim kleift að innheimta hærri leigu ella vegna vegna húsaleigubóta. Eiga skattgreiðendur að niðurgreiða óréttmæta starfsemi sem bitnar verst á þeim sem minna mega sín?

[Geir Ágústsson, 22.11.2017 kl. 07:31]

Það er svo margt í þessu. Það virðist finnast stór hópur af fólki með greiðslugetu upp á tugi þúsunda á mánuði sem finnur samt ekkert annað húsnæði en iðnaðarhúsnæði. Þetta á að vera nánast óhugsandi. Þarna er brjáluð eftirspurn, greiðslugeta til staðar en ekkert framboð! 

En auðvitað vita allir ástæðuna: Reglugerðarfrumskógurinn í kringum nýbyggingar er slíkur að það borgar sig ekki að byggja ódýrt húsnæði eða innrétta samkvæmt bókstaf laganna.

Hvað sem því líður er fólk að fara til Þjóðskrár og vill láta skrá lögheimili sitt, þ.e. heimilisfang sitt þar sem það hefur aðsetur, býr og sefur. Og tölvan segir nei. Fólk er með heimilisfang en tölvan segir bara "óstaðsettir í hús". 

Tölvan segir nei.

Ekki veit ég hvað ríku sumarbústaða-sveitarfélögin gera. En er það vandamál annarra en þeirra? 

[Guðmundur Ásgeirsson, 22.11.2017 kl. 15:12]

Nei það er einmitt þeirra vandamál með sumarbústaðina. ;)

Kannski verður það til bóta að heimila skráningar lögheimilis í atvinnuhúsnæði því þá eru auknar líkur á að stærð vandamálsins komist fram í dagsljósið og t.d. verði hægt að samkeyra þjóðskrá við fasteignaskrá til að fá betri vísbendingar um raunverulegan fjölda þeirra sem ríkið er að brjóta mannréttindi á með því að útvega þeim ekki viðunandi húsnæði.