Bland í poka og glötuð tækifæri

Þingmálaskrá ríkisstjórnarinnar hefur verið birt. Hún er bland í poka. Sumt er gott og annað ekki eða svo sýnist mér í fljótu bragði. Sumt leiðir til hærri byrði á herðar skattgreiðenda en annað síður.

Mér sýnist ríkisstjórnin ætla að missa af tækifæri til að vindan endanlega ofan af brunarústum seinustu ríkisstjórnar. Stjórnarandstaðan er áköf að fá kosningar sem fyrst á meðan skoðanakannanir eru henni hagstæðar og áður en almenningur gerir sér grein fyrir því að hagur hans hefur vænkast töluvert undanfarin misseri. Örfá en veigamikil mál hafa fengið alla athyglina, t.d. staða hins sovéska heilbrigðiskerfis og götóttar götur Reykjavíkur sem enginn kennir borgarstjórn um. 

Ákafa stjórnarandstöðunnar hefði mátt nýta til að keyra góð mál hratt í gegn og veifa á meðan kosningadagsetningu eins og gulrót fyrir framan nefið á henni. Mér sýnist menn ætli að fara í keppni í óþarfakurteisi og bjóða upp á dagsetningu fyrir kosningar áður en nokkur mál hafa hlotið brautargengi. Þessu má líkja við að bjóða lötum 12 ára strák að vinna sér inn vasapening með heimilisverkum en borga þá fyrirfram. Eftir stendur að verkin eru aldrei unnin en peningarnir eru horfnir. 

Nú finnst mér sjálfum ólíklegt að 60% kjósenda ætli sér að kjósa núverandi stjórnarandstöðuflokka. Það á eftir að koma í ljós. Ríkisstjórnin virðist samt að vera að spila frá sér öllum trompunum og vona að spilastokkurinn breytist þegar líður á leikinn.

Málaskrá ríkisstjórnarinnar birt

Athugasemdir

[Sigurður Antonsson, 24.4.2016 kl. 14:45]

Hef samúð með bændum, en miklu frekar með fæðuöryggi byggt á íslenskum landbúnaði. Íslensku kartöflurnar í Suður Noregi verða margfalt stærri. Frjósamari jörð og hlýrra. Hagkvæmni landbúnaðar í suðurlöndum er ólíkt meiri.

Jafnvel þótt greiða þurfi hærra verð fyrir einstakar landbúnaðarvörur erum við jafnframt að styrkja byggð. Kemur ferðaþjónustu og landsbyggðinni til góða.

Sjálfstæðismenn og flestir flokkar hafa viðurkennt þessa staðreynd. Það er einföldun að segja að allt eigi að vera innflutt þegar kemur að því að það vantar gjaldeyri. Vöruskipi óhagstæð. Góðæri sem nú ríkir er einstakt og meðal annars vegna þess að hér er hreint loft og gott vatn. Vörumerki Íslands.

Hinsvegar dapur að flokksfundir Framsóknar þurfi að taka fyrir sérstaklega kynningu á íslensku lambakjöti erlendis. Mættu þá eins ræða vírlokun á lambakjöti og ísmola í plastpakkningum. Þessa gæðavöru ætti einungis að selja innanlands sem gæðavara, fengin af ræktuðu landi. Fréttablaðið ætlar einnig að næla sér í prik út á innflutning á landbúnaðarvörum.

Hagar og Bónus eru góðir í innflutningi á kjúklingi, en eru ekki lyfjaleifar og hormónar í dönsku kjöti. Dönsku heiðarnar lykta af ofnýtingu og áburðarnotkun sem skemmir grunnvatnið. 

[Geir Ágústsson, 24.4.2016 kl. 18:29]

Hreint loft, hreint vatn, lömb sem fá að ganga sjálfala alla ævi fram að sláturtíð, lífræn ef eitthvað er það. Maður hefði haldið að slík framleiðsla væri gulls ígildi á heimsmarkaði en svo er ekki. Framleiðslan er niðurgreid, framleiðendur eru með fátækari stéttum landsins og enginn er sáttur, hvorki þeir sem njóta niðurgreiðslanna og hinir sem fjármagna þær.

Við erum sennilega ósammála um aðkomu ríkisins að landbúnaðarframleiðslu en hér er margt í ólagi. Það er t.d. einkennilegt að Íslendingar megi ekki flytja inn lífrænan kjúkling og þurfi þess í stað að gera sér innlenda iðnaðarframleiðslu kjúklings að góðu.