Er ekkert þarfara að gera?

Starfsmannamál Ríkisútvarpsins verða tekin til sérstakrar umræðu á Alþingi í dag. Málshefjandi er Steingrímur J. Sigfússon, þingmaður Vinstri grænna og til andsvara verður Illugi Gunnarsson, menntamálaráðherra. 

Er virkilega ekkert þarfara að gera á Alþingi? Ef ekki þá finnst mér að Alþingismenn eigi bara að byrja jólafríið sitt, og framlengja það fram að sumarfríi.

Ríkissjóður er tómur og í raun gjaldþrota. Skorið er niður í ríkisrekstrinum, bæði þeim hlutum hans sem sinna þjónustu sem þörf er á, og hinum (t.d. RÚV). Uppsagnir fylgja í kjölfarið. The end.

En nei, núna var snert við hinni heilögu belju, RÚV. 8% starfsmanna þar fá uppsagnarbréf. Það er minna en margar ríkisstofnanir hafa þurft að þola, og miklu minna en hjá mörgum einkafyrirtækjum sem berjast við að halda sér á lífi í umhverfi hárra skatta, þrúgandi regluverks og gjaldeyrishafta.  

Stjórnarandstaðan er einfaldlega að reyna skapa sér vinsældir. Vonandi mistekst það.  Vonandi stendur ríkisstjórnin í lappirnar og leggur bráðum fram frumvarp um að leggja RÚV niður með öllu, og til vara 90% af RÚV. Vilji stjórnmálamenn halda áfram að fjármagna eitthvað af núverandi verkefnum RÚV með skattfé má gera það með útboði á einstaka verkefnum. Best væri samt að stjórnmálamenn létu sér nægja að hafa áhrif á dagskrá fjölmiðla með persónulegri áskrift eða ekki áskrift að einstaka einkareknum sjónvarps- og útvarpsstöðvum. Það virkar ágætlega fyrir okkur hin sem neytendur. 

Ræða uppsagnir á RÚV á þingi

Athugasemdir

[Helgi (IP-tala skráð) 5.12.2013 kl. 17:01]

Sæll.

Ekki man ég eftir svona sterkum viðbrögðum þegar skorið var niður hjá löggunni og á spítölunum. Liðið á RUV þykist greinilega gera rosalega mikið gagn!

Hið opinbera er gjaldþrota Geir, skuldir ríkis og sveitarfélaga eru yfir 1000 milljarðar umfram eignir. Þegar fjárfestar almennt átta sig á því verður erfiðara fyrir hið opinbera að sækja sér lán. Fyrr eða síðar fer verðbóglan af stað úti og þá neyðast menn til að hægja á eða slökkva á prentvélunum. Þú rjúka vextir upp og fjölmörg lönd verða gjaldþrota - líka klakinn.

Mér skilst að hið opinbera í Danmörku sé með því stærsta sem gerist í heiminum - þar munu sjálfsagt margir opinberir starfsmenn ekki fá laun þegar lánamarkaðir lokast, líkt og í öðrum löndum. Þetta verður svakalegur hvellur. Frjálshyggjunni verður sjálfsagt kennt um hann því ekki verða stjórnmálamenn tilbúnir til að láta af hendi sín völd :-(

[Geir Ágústsson, 10.12.2013 kl. 08:17]

Auðvitað verður frjálshyggjunni kennt um þegar ríkissjóðir heimsins fara alveg í kaf í skuldafeninu. Frjálshyggjunni er jú því að kenna að Ronald Reagan hækkaði útgjöld og bætti í skuldir bandaríska ríkisins, því að bankar með ríkisábyrgðir lánuðu og prentuðu meira en þeir réðu við, því að ríkisfyrirtækið Landsvirkjun fær þjóðnýtt lönd á spottprís til að sökkva undir uppistöðulón, og svona má lengi telja.