Tóbaksgjöld = lágtekjuskattur

Enn og aftur er landsmönnum gert ljóst að skattar og álög á tóbak eru fátækra- og lágtekjuskattur. Ríka, háskólamenntaða fólkið í skrifstofustörfunum veit þetta. Lágtekjufólk veit þetta. Alþingismenn vita þetta.

Einnig hafa menn einhverja hugmynd um ástæður þess að lágtekjufólk heldur áfram að reykja þrátt fyrir alla fræðsluna, vitneskjuna og áróðurinn um skaðsemi reykinga. Ein er til dæmis sú að þegar er erfitt að láta enda ná saman, og erfitt að lifa frá mánuði til mánaðar á sveiflukenndum yfirvinnutímaháðum útgreiddum launum, þá er erfitt að setja reykleysisnámskeið og afslappandi jógatíma ofarlega á vikuplanið. Tóbaksreykingar koma þá inn sem stressstillandi og eftirsótt nautn í amsti hversdagsins.

Vel menntað og sæmilega launað fólk hefur engan skilning á þessu. Þess vegna baular það á stjórnmálamenn um að hækka tóbaksgjöld og gera aðgengi að tóbaki erfiðara. Ekki af því annars freistast það sjálft til að hefja reykingar, heldur af því annað fólk (ómenntaði láglaunaskríllinn) á að  fá að þjást fyrir fíkn sína og nautn. Það er jú byrði á okkar yfirskattlögðu hátekjulaunaávísunum í formi heilbrigðisútgjalda, ekki satt?!

Verkalýðsfélög og vinstrimenn heimta allskyns tilfæringar í skattkerfinu til að "bæta hag" lágtekjufólks og fátækra. Auka persónuafsláttinn, fjölga skattþrepum, þyngja jaðarskatta, og svona má lengi telja.

Ég sting hins vegar upp á annarri leið til að auka fjárhagslegt rúm þeirra tekjulægstu: Afnema tóbaksgjöld!  Að ofansögðu má vera ljóst að það hefði bein jákvæð áhrif á lífskjör tekjulágra og fátækra strax í dag.

Ofanritað er einnig að finna á Ósýnilegu höndinni.

Reykingar eru orðnar fátíðari

Athugasemdir

[Ingvar (IP-tala skráð) 2.3.2008 kl. 14:39]

Við gætum líka bara gert okkur öllum greiða og hætt með einu og öllu að flytja inn tóbak.....

[Geir Ágústsson, 2.3.2008 kl. 14:47]

Setja það í sölubása svarta markaðsins með hassinu, kókaíninu, vændinu og fjárhættuspilinu? Nú þegar er gróskumikill og vaxandi ólöglegur innflutningur á löglegum en ofurskattlögðum sígarettum til Íslands. Ég sé enga ástæðu til að styðja þann innflutning frekar með lögbanni en gæti samt skipt um skoðun með sannfærandi rökum (til dæmis þeim að þá verður ríkið af skattfé sem er gríðarlega jákvætt).

[Einar Jón, 2.3.2008 kl. 23:52]

Hefur það bein jákvæð áhrif á lífskjör tekjulágra og fátækra að fá krabbamein eftir 10-20 ár?

[Geir Ágústsson, 3.3.2008 kl. 10:43]

Einar Jón,

Nei. En hver veit nema þau afslappandi nautnaráhrif sem tóbaksreykurinn veitir stressuðu og annasömu lágtekjufólki í amsti hversdagsins geri að lífið verður lengra! Hver veit! Kannski það sé best að fólk vegi og meti sjálft kosti og galla þess að reykja versus lifa í stressi í boði snobbaða skrifstofupakksins sem skrifar greinar í Moggann.

[Úlfur (IP-tala skráð) 5.3.2008 kl. 16:02]

Svo lengi sem maður er ekki neyddur til að stunda óbeinar reykingar er það fáránlegt að skipta sér af reykingum annarra. Ríkisvaldið hefur nú þegar alltof miklar tekjur yfir höfuð, og þegar ríkisvaldið réttlætir svona óþarfar álögur á neysluvöru í formi e.k. barnfóstrustefnu er ekki skrýtið að augabrýr lyftist hjá fólki með sæmilega dómgreind.

Hvað skyldi vera næsta úrræði félaga Haarde við að reyna að stjórna lífi okkar? Sérstakur sykurskattur? Fituskattur á franskar kartöflur? Bjórbann?

[Dawg (IP-tala skráð) 9.3.2008 kl. 07:28]

Reykingafólk deyr áður en það nær að nýta
lífeyrissjóðinn en samt ekki nógu fljótt til að
vinna færri ár. En því eldri sem maður verður
því dýrari verður maður heilbrigðiskerfinu,
dýrustu árin koma því ekki við sögu hjá
reykingafólki.

Það  greiðir í lífeyrissjóð til til þess eins að
andreykingarfasistarnir sem vildu girða þau
af fái að ráðstafa því, reykingafólk heldur
því afætunum, andreykingarfasistunum uppi
bæði með beinum greiðslum sem ekki verða
nýttar og með heildarsparnaði eilbrigðiskerfisins
í færri elliárum.

Svo eru skattar á tóbaki þannig að reykingafólk
borgar ekki bara meira en það nýtir þegar
heildina er litið heldur borgar það einnig hærri
prósentu í skatt. 

Tala nú ekki um öllum einkamarkaðskerfunum sem
þau halda uppi með því að borga tvöfalt fyrir
fjöldan allan af tryggingum án þess að nýta
það tvöfalt.

Svo er auðvitað til fólk sem vill að aðrir hætti
að reykja af einskærri góðmennsku, og má ekki
rugla þeim saman við andreykingafasistana.

Til að halda þessum ranti í pólitískum réttrúnaði
og innan ramma laga landsins enda ég þetta á
eftirfarandi tilkynningu:

Reykingar drepa.