Veirutímar

Myndin hér að neðan er tekin af mér í mars 2022 þar sem ég sat í flugvél á leið til Íslands og var beðinn um að setja á mig grímu, sem ég gerði (því vildi ekki láta fleygja mér út).

Eins og sést var ég töluvert skeggjaður á þessum tíma. Veirur ferðuðust óhindrað á milli skeggháranna og gerðu gagnslausa grímu jafnvel enn gagnslausari, og jafnvel að veiruhraðal. 

Flugþjónarnir virtust ánægðir með að sjá grímuna og gerðu ekki neinar athugasemdir við að ég hafi ekki einu sinni breitt úr henni til að ná a.m.k. yfir aðeins stærra svæði á andliti mínu, né að ég hafi ekki einu sinni haft fyrir því að klemma henni á nefið á mér. Þeir vissu sennilega að fyrirmæli þeirra voru kjaftæði og bara ánægðir með að þurfa ekki að eiga við einhvern álhattinn.

Ég passaði mig svo það sem eftir var flugsins að vera alltaf að borða eða sötra eitthvað, enda heimilt að vera án grímu á meðan matar eða drykkja var neytt, veirum til mikillar skemmtunar.

Ég rifja þetta upp því ég var að horfa á viðtal John Stossel við Rand Paul, bandarískan öldungadeildarþingmann, sem er tiltölulega nýbúinn að gefa út bók, Deception: The Great Covid Cover-Up, sem rauk eftir þetta viðtal í 2. sæti á lista mínum yfir bækur sem ég ætla að lesa/hlusta á (í 1. sæti er The Great Awakening eftir Alex Jones þegar ég er búinn með An Immigrant´s Love Letter to the West eftir Konstantin Kisin).

Við vorum auðvitað blekkt af yfirvöldum sem voru ekki að boða vísindi, eins og þau héldu fram, heldur bara að gera eitthvað, byggt á minnisblöðum að utan. Gott og vel, við féllumst á það einu sinni og sumir lengur en aðrir, en næst verða eingöngu hin raunverulegu vísindi í boði og yfirvöld geta tekið aftursætið.

Athugasemdir

[Ragnhildur Kolka, 14.12.2023 kl. 10:42]

Þessa dagana er erfitt að lesa danartilkynningar Moggans. Þegar maður er farin að þekkja 2-4 samferðamenn á þeim síðum hvern dag. Allt fólk sem trúði í blindni á mRNA-bóluefnin. Það er þó huggun harmi gegn að gengi hlutabréfa í Phizer lækkaði um 80% á síðasta ári og er spáð áframhaldandi lækkun á næsta ári.

Þegar fjárfestarnír fara að sjá ljósið má búast við að heilbrigðisyfirvöld kveiki líka á perunni. 

[Ómar Geirsson, 14.12.2023 kl. 14:13]

Bara að gera eitthvað, þú nærð þarna kjarnanum nokkuð vel Geir, ég hefði nú rakað þig.

Verra var að þeir sem efuðust um að gera eitthvað, þeir sættu kárínum, og þá ekki bara frá Kára.

Af því þarf fólk að læra.

Kveðja að austan.

[Geir Ágústsson, 14.12.2023 kl. 21:18]

Ragnhildur,

Já ætli það þurfi ekki flótta fjárfesta frá þessu ævintýri til að enda það. Leitt með það hvernig þú sérð með eigin augum fólk sem þú þekkir hrynja niður. Mjög dapurlegt.

Ómar,

Hafðu ekki áhyggjur, ég rakaði mig að lokum og klippti lubbann og upplifði oft að fólk leit á mig, staldraði við og fattaði svo að þarna var einhver kunnuglegur á ferð. Og einmitt - "gera eitthvað" - bara til að fá frið (og veita frið).