Orka og Evrópa

Evrópa er föst á milli steins og sleggju og eigin skammsýni, vafin í óraunsæja hugmyndafræði.

Ekki kærir hún sig um meiri orku frá Rússlandi en þörf er á. Fyrir þetta geldur auðvitað almenningur með svimandi orkukostnaði. Þá meina ég svimandi. Og ágóðinn rennur í rússneska vasa. 

Ekki er hún að bora eftir olíu og gasi (nema Norðmenn auðvitað, þeir halda sínu striki). Þekktar olíu- og gaslindir standa ósnertar. Sumum er lokað þótt nóg sé eftir í þeim.

Ekki kærir hún sig um kol og heldur áfram að loka kolaorkuverum í miðri orkukreppu.

Hvað stendur þá eftir?

Að betla meiri orku út úr Aröbunum? Þeir hafa kannski ekki jafnmikinn áhuga á að eiga dollarasjóði í vestrænum bönkum og áður og farnir að líta til austurs. Og eru að auki uppteknir af ólöglegum innrásum og árásum - nokkuð sem er stundum óvinsælt í augum Evrópubúa.

Byggja vindmyllur?

Það er hæpið að treysta á Bandaríkjamenn. Þeir eru líka að skjóta sig í fótinn og fresta opnun fleiri olíu- og gaslinda. 

Ég geri mér grein fyrir því að mörg vandamál steðja að heiminum en í Evrópu þurfa menn enga óvini til að rýra lífskjör sín og skerða orkuöryggi. Þeir gera það svo ljómandi vel sjálfir, við sjálfa sig.

Athugasemdir

[Vagn (IP-tala skráð) 1.4.2022 kl. 14:05]

"Ég styð ekki einfeldingslega nálgun á flókin viðfangsefni" sagði einhver fyrir skemmstu.  En orkuverð í Evrópu er það sama og orkuverð um allan heim. Og Evrópa ræður ekki verðinu. Og varla er mikil orkukreppa í Evrópu meðan gas og olía flæða frá Rússlandi í engu minni mæli en undanfarna mánuði og allir geta fengið það magn sem þeir vilja. Svo er verð á gasi núna það sama og það var í enduðum september á síðasta ári. Síðan féll verðið um 25% fram í desember, án þess að nokkuð bættist við. Það er því eitthvað annað en einhver "orkukreppa" sem er að stýra verðinu. 

[Geir Ágústsson, 1.4.2022 kl. 14:24]

Það blés 10% minna í Evrópu í fyrra en venjukega og kjarnorku og kolaorku kippt úr sambandi, gaslindum lokað, tókst ekki að fylla á gaslagera Evrópu fyrir veturinn, aukin eftirspurn eftir gasi utan Evrópu, óvissa, pólitík, flöskuhalsar og verðbólga. Auðvitað margt sem kemur til. En líka að grýta eigin höfn.

[Hrossabrestur, 1.4.2022 kl. 17:58]

Sæll Geir ég held að þetta sé nokkuð skörp greinging hjá þér, því miður virðist þessi skammsýni og heimska hrjá flest alla pólitíkusa hér á klakanum.

kv hrossabrestur 

[Símon Pétur frá Hákoti (IP-tala skráð) 1.4.2022 kl. 18:28]

Gunnar Rögnvaldsson hefur komist að sömu niðurstöðu, að grænslepjan sé að drepa vestrið.  Vestrið, og ekki hvað síst ESB ríkin eru að kafna í eigin grænslepju.