Stjórn og stjórnarandstaða

Ungir jafnaðarmenn krefjast þess að Alþingi verði kallað saman án tafar svo renna megi skýrum lagastoðum undir nauðsynlegar sóttvarnir á landamærum.

Lesist: Að lögreglan fái lagaheimild til að sækja fólk á flugvöllinn og keyra í hús þar sem það þarf að hírast í þeirri tegund sóttkvíar sem orðabókin telur eiga við um dýr:

sóttkví

1
það þegar maður þarf að halda sig fjarri öðrum vegna hættu á útbreiðslu smitsjúkdóms
2
það þegar dýr er vistað á sérstökum stað í ákveðinn tíma vegna hættu á útbreiðslu smitsjúkdóms

 

Mæður og börn mega svo hírast þar grátandi næturlangt í stað þess að geta tekið út sína (óumdeildu) sóttkví heima hjá sér.

 

Ég hélt að Samfylkingin væri í stjórnarandstöðu. Væri svo þá gæti hún nú kallað á afsögn heilbrigðisráðherra sem braut lög á saklausu fólki með því að innleiða reglugerð án lagastoðar og senda lögreglumenn á vettvang til að framfylgja henni.

 

Nú eða heimta svör á því hvers vegna ráðuneytið, með um tug lögfræðinga á sínum snærum auk fjölda svokallaðra sérfræðinga, hleypti reglugerð án lagastoðar í gegn.

 

Nú eða spyrja sóttvarnarlækni hvort hann sjái enga ástæðu til að vinna innan ramma gildandi laga, jafnvel þótt hann telji það auka svokallaða smithættu. Sóttvarnarlæknir hefur ekki sagt svo mikið sem afsakið við fólk sem hann hélt frá heimilum sínum í 5 daga.

 

En stjórnarandstaðan segir ekkert. Ekkert. Þingmenn stjórnarflokkanna hafa verið duglegri að gagnrýna valdníðslu og yfirgang yfirvalda en stjórnarandstaðan. 

 

Enda mælist stjórnin enn með blússandi fylgi í djúpri efnahagslegri niðursveiflu þar sem framundan er annað dautt ferðamannasumar og eini votturinn af áætlun hjá yfirvöldum kemur fram í tveggja manna tali óbreyttra borgara í hlaðvarpi (en þar sem annar þeirra er vissulega í símaskrá yfirvalda).

Alþingi samþykki nauðsynlegar sóttvarnir á landamærum

Athugasemdir

[Guðmundur Ásgeirsson, 7.4.2021 kl. 12:57]

Ungliðahreyfing Samfylkingar vill lögleiða það sem dómstólar eru búnir að dæma ólöglegt. Semsagt að löggjafinn grípi inn í sjálfstæði dómsvaldsins. Sama fólk segist vilja nýja stjórnarskrá.

[Geir Ágústsson, 7.4.2021 kl. 13:22]

Guðmundur,

Í bók Thomas Sowell, A Conflict of Visions, er talað um tvær meginsýnir á samfélagið sem togast vissulega á en á grófan hátt er nothæft verkfæri til að skilja hvers vegna það eru oft sömu einstaklingar sem raðast sitthvoru megin við mismunandi og jafnvel gjörsamlega óskyld málefni. 

Hann kallar þetta "the constrained version", þar sem valið er aðallega á milli mismunandi "trade-offs" innan ákveðinna ramma hefða, réttinda, löggjafar og menningar, og "unconstrained version", þar sem leitað er að "the solution" og ekkert getur staðið í vegi fyrir þeim, jafnvel ekki dómsfordæmi og stjórnarskrár.

Þannig sjái þeir sem aðhyllast "unconstrained vision" ekkert því til fyrirstöðu að yfirvöld setji einfaldlega lög og reglur sem "leysa vandamálið". Þessu fylgir gjarnan stuðningur við ýmis ríkisafskipti, svo sem lögbundin lágmarkslaun og ákveðna tekjudreifingu með valdi. Þeir í "constrained vision" sjá galla á þessu því með slíkum úrræðum verði einfaldlega til önnur vandamál, svo sem flótti frá verðmætasköpun og háum sköttum eða ýmis konar ófyrirséð eymd.

Það er því ekki skrýtið að Ungliðahreyfing Samfylkingar styðji löggjöf sem snýr við dómsvaldinu þegar slíkt er talið heppilegt, og um leið nýja stjórnarskrá sem er aðeins losaralegri í takmörkunum á ríkisvaldinu.

[Símon Pétur frá Hákoti (IP-tala skráð) 7.4.2021 kl. 14:30]

Afar athyglisvert að sjá Pírata og Viðreisn sem dyggustu fylgisveina "frelsis-arms" flokks Bjarna Benediktssonar.

Afar athyglisvert að sjá ESB sinnana sameinast undir styrkri stjórn Engeyjar lénshöfðingjans.

[Guðmundur Ásgeirsson, 7.4.2021 kl. 16:03]

Símon Pétur. Pírataflokkurinn er ekki ESB-sinnaður. Ég hvet þig til að kynna þér hina raunverulegu stefnu flokksins í því máli.

[Jón Magnússon, 7.4.2021 kl. 16:49]

Það er virkilega ánægjulegt að sjá hvernig ýmsir þingmenn Pírata, Viðreisnar og Miðflokksins hafa tekið sér stöðu með mannréttindum gegn frelsissviptingum að nauðsynjalausu. Af hverjum dettur engum í hug að þeir brotlegu sæti harðari refsingum .t.d. 500 þúsund króna sekt, en fólk geti tekið út sóttkví heima  hjá sér. 

[Geir Ágústsson, 8.4.2021 kl. 07:32]

Jón,

Þú átt hrós og heiður skilinn fyrir að hafa slegið á putta framkvæmdavaldsins, sem fer nú offörum í nafni sóttvarna, en á kostnað lýðheilsu og réttarríkisins.