Rökréttar ástæður til hamfaraótta

Blaðamenn, stjórnmálamenn og aðrir hópar gáfaðra einstaklinga sem vilja hlutast til um líferni hins sauðsvarta almúga boða nánast daglega nýjar hamfarir. Hamfarirnar verða líka sífellt langsóttari, svo sem að örlítill vöxtur á einni lofttegund í andrúmsloftinu geti nú kveikt skógarelda í Ástralíu umfram það sem hefði annars brunnið.

Hinn raunverulegi ótti er hins vegar ekki réttilega staðsettur. Í stað þess að óttast hamfarir í fjarveru ríkisafskipta er sennilega skynsamlegra að óttast hamfarir vegna ríkisafskipta af ýmsu tagi. Dagleg heimsókn á ZergoHedge.com, Antiwar.com og Mises Wire viðheldur réttmætum ótta við ríkisafskipti. Þetta eru gjörólíkar heimasíður í efnistökum, hugmyndafræðilegri nálgun og viðhorfum almennt en fyrir tortrygginn frjálshyggjumann hef ég gagn af þeim öllum (miklu frekar en hinum hefðbundnu áróðurspésum vinstriblaðamannanna).

Ríkisvaldið heldur á lífi tæknilega gjaldþrota bankakerfi (brotaforðakerfi er tæknilega gjaldþrota um leið og lánsfé er annað en sparnaður), heldur hagkerfi og samfélagi rækilega í gíslingu skatta og íþyngjandi reglugerða (t.d. með rekstri svonefnds velferðarkerfis) og enginn er í raun óhultur þótt hættan á ofsóknum hins opinbera sé vissulega mismikil eftir ríki.

Nú er auðvitað ekki hægt að neita því að margt jákvætt á sér stað í heiminum en þegar á heildina er litið eru mörg teikn á lofti um meiriháttar bresti í bæði hagkerfi og samfélagi okkar tíma.

Í stað þess að senda skólakrakka heim með hausinn troðfullan af hugmyndum um ný ríkisafskipti á að hvetja þá til að hugleiða frekar ágæti óþvingaðs samstarfs frjálsra einstaklinga á frjálsum markaði, að mestu óáreittir af stjórnmálamönnum.

Athugasemdir

[Þorsteinn Siglaugsson, 12.1.2020 kl. 13:57]

Brotaforðakerfið er grunnurinn að þeirri miklu fjárfestingu sem er nauðsynleg til að halda uppi hagvextinum. Í raun ætti gagnrýni þeirra sem hamast gegn kapítalismanum sem slíkum kannski fremur að beinast að stjórn peningamála í heiminum.

[allidan (IP-tala skráð) 12.1.2020 kl. 15:44]

Hvernig skilgreinir þú orðið frjálshyggja?

[Geir Ágústsson, 12.1.2020 kl. 19:03]

Þorsteinn,

Ég held að það sem þú segir sé efni í heila ritgerð eða tilvísanir í margar bækur þar sem þú hendir í mig Milton Friedman og ég hendi í þig Murray Rothbard. Ég spyr mig samt: Ef peningafölsun (útgáfa peningaígilda án innistæðu) er forsenda hagvaxtar hvernig kom þá hagvöxtur til þar sem slík er bönnuð, af öllum?

allidan,

Einu sinni sagði maður að frjálshyggjurnar væru jafnmargar frjálshyggjumönnum en almennt má kannski segja að frjálshyggja sé tortryggni á ágæti ríkiseionkunar, og opið viðhorf fyrir því að það sé drífandi afl að einstaklingar keppi í því að veita sem bestan varning og þjónustu. 

[Þorsteinn Siglaugsson, 12.1.2020 kl. 21:05]

Hvar í heiminum er brotaforðakerfi bannað nú á dögum?

[Geir Ágústsson, 13.1.2020 kl. 09:29]

Þorsteinn,

Að ég held hvergi og víðast hvar er svokölluð bindiskylda bankanna svo lág að það má lítið út af bregða til að bankaáhlaup hefjist. Að hugsa sér: Ef skitin 10% innlána eru tekin út af reikningum þá hrynur spilaborgin. En sennilega miklu fyrr. 

[Þorsteinn Sch Thorsteinsson, 13.1.2020 kl. 17:37]

Sæll Geir, 

"Rökréttar ástæður til hamfaraótta" ???

Hérna fyrir neðan á myndum hefur dæmi um eitthvað raunverulegt, og er veldur verulegum veðurfarsbreytingum. 

KV. Þorsteinn

 

[Þorsteinn Sch Thorsteinsson, 13.1.2020 kl. 17:38]

[Þorsteinn Sch Thorsteinsson, 13.1.2020 kl. 17:39]

[Þorsteinn Siglaugsson, 13.1.2020 kl. 22:41]

Samsæriskenningar geta verið skemmtilegar - í bíómyndum.

Hver ætti nú að vera tilgangur stjórnvalda í Bandaríkjunum með því að breyta veðrinu?

[Þorsteinn Sch Thorsteinsson, 13.1.2020 kl. 23:14]

Sæll Þorsteinn nafni, 

Nafni ekki vera svona neikvæður, ha?

Því að hérna er eitthvað fyrir þig: 

"Chemtrails and other forms of weather modification are often dismissed as conspiracy theory, yet there does exist a legitimate body of evidence for geoengineering.

https://www.facebook.com/GaiaUnexplained/videos/2493550660894835/UzpfSTEwOTQ0NzM3ODA6Vks6MzMzNzI3OTYzOTY3Njc3Nw/

Watch more: http://bit.ly/2FheTcp  

[Ómar Geirsson, 14.1.2020 kl. 10:32]

Blessaður Geir.

Takk fyrir linkana, þeir fóru á bókarmerkjaslána mína, gaman að sjá að þú lest skrif þeirra sem sjá í gegnum markaðssetningu stríðanna.

En þú veist Geir að þetta er útópía, "ágæti óþvingaðs samstarfs frjálsra einstaklinga á frjálsum markaði, að mestu óáreittir af stjórnmálamönnum.", svona ekki ósvipuð þeirri útópíu kommanna að öll efnahagsstarfsemi mannsins eigi sér stað í kommúnum jafnrétthárra, sem eiga svo í frjálsum viðskiptum sín á milli. Í raun er eini munurinn að þú sérð einstaklinginn sem grunneiningu, en kommarnir kommúnuna, sem er frjálst óháð samstarf einstaklinga.

Þetta stenst ekki raunveruleikann um eðli einstaklingsins, hann leitast alltaf við að auka sín gæði, bæði í bandalagi við aðra, eða með því að sölsa undir sig gæðum annarra.

Þess vegna eru bæði Kommúnistaávarpið og Auðlegð þjóðanna af sama meiði og sagan um Litlu gulu hænuna, svona draumsýn höfunda um eitthvað sem þeir vildu að væru.  En er ekki.

Þú ert ekki að lýsa frelsi Geir, þú ert að lýsa helsi.

Það vissi frændi minn Bjartur, lengi búandi í Sumarhúsum, hann vissi eins og er að nafn þess sem skerti frelsið skipti ekki máli, hvort það var ríkur einstaklingur, einokunarfélag (kaupfélagið) eða ríkisvaldið, ofríki og kúgun er alltaf ofríki og kúgun.

Og það sem skipti máli var að fá að vera í friði fyrir þessum andskotum.

Þú leggur mikla áherslu á friðinn í skrifum þínum Geir, átt það sameiginlegt með frænda mínum.

En líkt og kommúnistinn sem sér ekki þá kúgun og ofbeldi sem þarf til að neyða hinu meinta frelsi kommúna yfir samfélagið, og þá einstaklinga sem mynda það, þá sérð þú ekki óhjákvæmilega kúgun hins sterka þegar hann losnar við bönd ríkisvaldsins.

Það er engin tilviljun að einu frjálsu samfélögin voru til skamms tíma á túndrum Síberíu og Norður Ameríku,í eyðimörkum Suður Afríku (álfunnar ekki samnefnds lands) og í þéttum frumskógum Suður Ameríku og Nýju Gíneu.  Rökin fyrir útópíu þinni er hagkvæmi, að hin frjálsu samfélög frjálshyggjunnar skili mestri velmegun og ríkdæmi, þá væru þessi samfélög ekki jaðarsamfélög, heldur hin ráðandi samfélög heimsins.

En það þarf bara einn einbeittan einstakling til að leggja þau undir sig í miðstýrð ríki, eins er það með hin óteljandi fjölda smáatvinnurekanda sem var forsenda hagbullsins hjá Smith, það þarf bara einn einbeittan, og hann ræður markaðnum.  Nema að sjálfsögðu að hinir snúist til varnar, myndi bandalög, stækki heildir og svo framvegis.

En þar með eru forsendur útópíurnar brostnar.

Og peningar búa ekki til hagvöxt þar sem engan hagvöxt er að hafa, en skortur á þeim sannarlega getur kæft alla efnahagsstarfsemi.

Peningar eru ekki upphaf og endir eins, eru ekki verðmæti í sjálfu sér þó þeir séu kallaðir gull, það er framleiðslan.

Ekkert flókið, spurðu bara Bjart frænda.

Kveðja að austan.

[Geir Ágústsson, 16.1.2020 kl. 15:27]

Ómar,

Takk fyrir hugleiðingu þína. Í henni er mikið hráefni í langar hugleiðingar, bæði sem svar við þínum en líka sem sjálfstæðar pælingar. Slíkt þarf þó að bíða betri tíma.

Ég vil bara nefna að ég er ekki "hagkvæmnis"-frjálshyggjumaður heldur "réttlætis"-frjálshyggjumaður. Átrúnaðargoð mín eru menn sem börðust gegn þrælahaldi þótt allir hafi sagt við þá að slíkt gæti steypt hagkerfinu í voða og væri í raun afskaplega óhagkvæmt. Í öðru samhengi má nefna Murray Rothbard heitinn, sem skrifaði um rökin fyrir því einstaklingar og landeigendur ættu að geta lögsótt þá sem senda mengandi efni í loftið jafnvel þótt aðrir hrópi að slíkt gæti eyðilagt hagkerfið. Þar steig samt ríkisvaldið inn í upphafi iðnbyltingar og heimilaði mengun í nafni framfara sem þýddi auðvitað að mengun fór úr böndunum - núna er fyrirtækjum gert að búa við svo þrönga ramma að þau hrökklast til Kína. 

En sem sagt, meira seinna (vonandi).

[Ómar Geirsson, 17.1.2020 kl. 06:53]