Engin stigmögnun, engin hætta, ekkert samhengi við koltvísýring

Segjum hlutina bara eins og þeir eru:

Þessi stanslausi hræðsluáróður, sem felst í því að kenna losun á koltvísýringi um breytingar í loftslagi Jarðar, er pólitísk vegferð með það markmið að styrkja hlutverk ríkisvaldsins og draga úr vægi hins frjálsa markaðar.

Koltvísýringur stjórnar ekki loftslagi Jarðar.

Kolabruni án síunar á reyknum er mengun. Losun á eiturefnum í land, loft og vatn er mengun.

Losun á koltvísýringi er ekki mengun. Koltvísýringur flæðir út úr öllum virkum eldfjöllum og opnum sprungum og hefur alltaf gert. Hann flæðir úr rassgötum landdýra og opnum mógröfum í íslensku landslagi. Smávegis hlutfall dælist svo úr púströrum bíla og vélum skipa og flugvéla. Ekkert af þessari losun er mengun.

Loftslag Jarðar er flóknara en svo að það sé búið að lýsa því með líkönum. Engin líkanaspá hefur ræst þótt tölvur séu nú orðnar svo fullkomnar að þær geti sigrað hvern sem er í skák. Menn hafa ofmetið hlutverk koltvísýrings ítrekað, markvisst og viljandi og niðurstaðan er hver ranga spáin á eftir annarri.

Almenningi er talin trú um að loftslag Jarðar hlýni eða kólni sem hlutfall af lofttegund sem er um 0,04% af samsetningu lofthjúpsins. Okkur er sagt að þegar þetta hlutfall var 0,02% var allt í lagi, en stígi það í 0,06% fari allt til fjandans. Þetta er beinlínis hlægileg nálgun en hefur það hlutverk að einfalda málið nægilega mikið til að stjórnmálamenn geti riðið út á hvítum hesti og bjargað deginum.

Parísarsáttmálinn svokallaði er innihaldslaust plagg. Þar lofa Indverjar að hætta að auka losun sína eftir 2-3 áratugi og Kínverjar eitthvað svipað. Með öðrum orðum: Þar er í fæstum tilvikum kveðið á um minnkun losunar. 

Það er kominn tími til að hætta þessari vegferð og brjóta upp melónurnar sem eru grænar að utan eins og laufblöð, en rauðar að innan eins og kommúnistar. 

Gjáin eykst í baráttu gegn hlýnun jarðar

Athugasemdir

[Grímur (IP-tala skráð) 27.11.2018 kl. 20:31]

Sumir hafa alltaf þurft að hafa eitthvað til að skelfast hvort sem það er syndaflóð, kjarnorkustríð, svarthol eða eitthvað annað.  Það er sjálfsagt að reyna að draga úr mengun en samkvæmt dómdagsspám þessara ofstækismanna þá er orðið alltof seint að gera nokkurn skapað hlut annað en að njóta þessu fáu daga sem eftir eru áður en líf þurrkast út á jörðinni 

[Geir Ágústsson, 27.11.2018 kl. 20:34]

Haha, mikið rétt!

[Tómas Ibsen Halldórsson, 27.11.2018 kl. 21:58]

Sameinuðu þjóðirnar ættu að sameina þjóðir í því að hreinsa hafið af þeim gríðarlegu flekkjum af plasti sem þekur orðið fleiri hundruð ferkílómetra, sérstaklega í Kyrrahafinu, en einnig í Atlantshafinu.

Hitt veit enginn hvert meðalgildi hitastigs er á jörðinni og hvort það hlýnar um nokkur prik á ári og kólni svo um nokkrar gráður, er eitthvað sem hefur ávalt gerst frá því jörðin varð til.

Að banna bílaumferð, siglingu skipa eða flugvélaumferð mun engu breyta. En ef menn vilja halda í þessar kenningar ættu þeir sem hæst hafa að hætta að þeytast um jarðarkringluna á einkaþotum sínum fram og til baka. Og SÞ ættu að hætta að vera með fjölda fundi, eins og þann sem á að vera í Marokkó innan nokkurra daga, þeir sem þangað sækja þurfa að koma sér þangað með flugvélum sem losa nú einna mest CO2 út í andrúmsloftið, en nei, það má ekki banna SÞ slíkt, þau verða að fá að stunda þá iðju öllum fremur þar sem þeir þurfa að koma boðskapnum áfram og það gera þeir ekki nema með því að útdeila CO2 út í andrúmsloftið sem aldrei fyrr.