Kommúnismi vekur upp það versta í manninum

Þeir eru til sem telja að kommúnismi sé draugur fortíðar.

Þeir eru líka til sem telja að sósíalismi sé framtíðin.

Báðir hópar hafa rangt fyrir sér.

Kommúnismi, eða sósíalismi (sjálfur Lenín gerði engan greinarmun á þessu tvennu), er bráðlifandi. Hann lifir í Venesúela og Norður-Kóreu. Hann lifir í höfði margra Vesturlandabúa. Sósíalismi er jafnvel í tísku meðal ákveðinna hópa, t.d. ungs fólks í mörgum vestrænum ríkjum, og gamalla kommúnista sem það lítur upp til.

Þetta má skrifa á skort á sagnfræðilegri þekkingu og skort á þekkingu á innihaldi sósíalískrar heimspeki, hvort sem hún kallar sig kommúnisma eða sósíalisma. 

Kommúnismi í hvaða formi sem er mun alltaf og á öllum stöðum vekja upp verstu kenndir mannsins og sé hann gerður að opinberri stefnu mun saklaust fólk alltaf þjást og jafnvel deyja.

En hvað er til ráða? Ekki fá andstæðingar sósíalisma mikið um það að segja hvað blessuð börnin eru látin lesa í hinu opinbera skólakerfi. 

Ekki er hægt að vænta þess að opinberir starfsmenn með tryggð eftirlaun - kennarar - höggvi í höndina sem fóðrar þá: Ríkisvaldið.

Auðvitað geta foreldrar rætt við börn sín og látið þau fá lesefni, en eru þeir sjálfir nægilega meðvitaðir um hætturnar?

Það má samt reyna. Og menn reyna.

Nú stendur t.d. til að endurútgefa The Gulag Archipelago í tilefni 50 ára afmælis bókarinnar. Þetta er bók sem margir telja að hafi haft töluvert um það að segja að Sovétríkin hrundu á sínum tíma. Ég hef ekki lesið hana en það stendur til, og mér skilst að þarna sé kommúnismanum veitt hið heimspekilega náðarhögg, og það rökstutt með óteljandi dæmum.

Það má nálgast ýmis rit Ayn Rand á íslenskri tungu, og Lögin eftir Bastiat og ýmis önnur rit sem steinrota ástina á ríkiseinokun og ríkiskúgun. 

Kommúnisminn lifir góðu lífi, og jafnvel betra en nokkru sinni fyrr þökk sé tækniframförum hins frjálsa markaðar sem gera útbreiðslu hugmynda auðveldari en nokkru sinni.

Reynum nú, í eitt skipti fyrir öll, að jarða bændamorðingjana Che Guevera, Maó, Stalín og Pol Pot, þjóðernissósíalistann Adolf Hitler og hinar vægari nútímaútgáfur af öllum þessum sjálfelsku, sósíalísku valdafíklum.  

Eru upp á náð karla komnar

Athugasemdir

[Sigþór Hrafnsson (IP-tala skráð) 1.11.2018 kl. 21:26]

Kommúnistar! Hvar?! Þá trúir þú pottþétt á að risaeðlur veki upp það versta í manninum.

Þú ert augljóslega að skrifa fyrir launum Geir. Fake news alla leið lol!

Eru raunverulega rauðhærður eða ertu bara að feika það líka?

[Grímur (IP-tala skráð) 1.11.2018 kl. 21:55]

Hugsjónin að allir fái jöfn tækifæri er falleg.

Eyrir tíma Mao þá var ástandið víða í Kína líkt og í Afríku fólk dó úr hungri, reyndar svalt fólk í Þýzkalandi líka áður en Hitler komst til valda.

Í dag þá heldur verklýðsforystan og Inga Sæland því fram hér svelti fjöldi manns, svo ef til vill er grundvöllur kominn fyrir byltingu en á móti þá gengur alltaf ótrúlega vel að safna fé handa bágstöddum í Afríku svo meiri hlutinn virðist vera aflögufær

[Geir Ágústsson, 2.11.2018 kl. 07:33]

Nálgun Aleksandr Solzhenitsyn, eins og ég skil hana, er þessi:

Kommúnismi er vissulega einhvers konar sýn á samfélagið, en hún er líka sýn á óvini samfélagsins.

Það er auðvitað byrjað á "auðvaldinu" eða "konungsfjölskyldunni", og þá er ekki nóg að taka einn og einn af lífi. Nei, heilu stéttirnar eru óvinir ríkisins því þær bera í sér hugarfar sem vinnur gegn markmiðum þess.

En fljótlega er hringurinn víkkaður. Eru trúaðir ekki líka með ranga sýn á hlutina? Hvað með Gyðingana? Nú eða menntafólkið? Hvað með þá sem hafa sótt sér menntun erlendis? Eða lesa rangar bækur? Eða tjá sig of gagnrýnið?

Niðurstaðan - og þetta er sagnfræðilegur veruleiki - er að fleiri og fleiri falla undir hatt óvina ríkisins og þurfa að mæta aftökusveit eða fara í endurmenntun eða fangabúðir eða útlegð.

Og það er af því að hugsjónin, í grunninn, gengur út á að fólk hugsi rangt, og að hugsun fylgi heilu stéttunum eða þjóðfélagshópunum frekar en einstaklingum.

Annars er allt þetta tal um að jöfnuður sé svo frábær tómt tal. Það er enginn að senda peninga sína til Afríku til að jafna út lífskjör Íslendinga og Afríkubúa. Menn eru bara að tala um að vilja meira af launum þeirra tekjuhærri, ekki að þeirra eigin laun eigi að renna til þeirra tekjulægri.

[Bjarni (IP-tala skráð) 2.11.2018 kl. 11:32]

Sæll Geir

í þessu sambandi er alltaf gott að rifja upp bók Courtois sem er orðin tuttugu ára rúmlega og tekur saman afleiðingar þessa stefnu í hinum ýmsu löndum. Þar er rakið hvernig um 100 milljónir létust undir oki þessarar hugmyndafræði og langtum fleiri en undir nasisma sem var líka mannfjandsamlegur -ismi en byggði frekar á hugmyndafræði um kynstofna. En jú þjáningar þessa fólks eru ótrúlegar og erfitt að gera sér í hugarlund hér á Vesturlöndum hvað þetta fólk hefur þurft að þola.