Svarta hagkerfið er viðbragð við vandamáli, ekki vandamálið sjálft

Svokölluð svört atvinnustarfsemi finnst víða. Flestir Íslendingar hafa stundað slíka starfsemi eða nýtt sér hana. Þegar Frikki frændi er fenginn til að tengja sjónvarpið gegn 5 þúsundkalli er það svört starfsemi. Þegar Jóna frænka er fengin til að klippa hárið á krökkunum gegn smávegis þóknun er það svört starfsemi. Þegar Njörður nágranni fær lánaða sláttuvélina í nokkur skipti í skiptum fyrir bjórkippu er það svört starfsemi.

Megnið af svartri starfsemi er óskipulögð og tækifæristengd og fer fram á milli fólks sem þekkist. Hún fer ekki í taugarnar á neinum. 

Hins vegar finnst líka skipulögð svört starfsemi. Hvernig stendur á því? Yfirleitt má rekja slíka starfsemi til tvenns konar þátta:

• Of hárra skatta á löglega starfsemi
• Of mikillar skriffinnsku á löglega starfsemi

Hvernig á að uppræta hana? Það verður bara gert með því að láta skattheimtu og skriffinnsku hinnar löglega starfsemi nálgast þá á hina svörtu starfsemi. Með öðrum orðum: Lækka skatta og fækka kröfum.

Ég skil vel atvinnurekendur sem stunda löglega, skattlagða og skriffinnskuvædda starfsemi og kvarta yfir hinni svörtu starfsemi. Hvernig væri að jafna leikinn og lækka skatta og fækka eyðublöðum?

Svart hagkerfi í Reykjavík

Athugasemdir

[Guðmundur (IP-tala skráð) 16.12.2016 kl. 08:39]

Sammála þér Geir. Ég veit ekki betur en að það kosti stórar fjárhæðir að gista hjá þessum aðila og góð afkoma. Ef að þessar leigur væru ekki í gangi þá væri verð í þessum bransa komin út úr kortinu fyrir ferðamanninn. Það er staðreynda að deilihagkerfið er komið til að vera. Vandamálið er að þessir hóteleigendur hafa komið íslenskum almenningi illa þar sem að þeir hafa spennt upp verð á gistingu, mat og bjór. Auðvitað sprettur upp hliðarstarfssemi. Íslendingar eru að bjarga sér og margir gera það vel. Þetta er spurning um að komast af.

Það væri nær að settur yrði 10 prósent flatur skattur á þessa heimagistingu og fá alla til að borga. Það myndi laga mikið. Svo segja mér aðilar sem eru í þessu að það sé ekki hægt að fá leyfi þó svo að menn vilji fá leyfi. Það er bara ekki hægt því embættismennirnir hafa komið málum svo fyrir að það er ekki hægt.

Kveðjur Guðmundur

[Elín Sigurðardóttir (IP-tala skráð) 16.12.2016 kl. 09:17]

Þegar frændsystkinin Simmi og Kata vilja enga skatta fyrir suma en háa skatta fyrir aðra í nafni jafnaðarhugsjónar sinnar (divide et impera) þá er hætt við því að ekki kunni allir gott að meta.

http://www.mbl.is/frettir/kosning/2016/10/15/skattaivilnanir_fyrir_landsbyggdina/

[Geir Ágústsson, 16.12.2016 kl. 19:54]

Guðmundur,

Þessi svarta atvinnustarfsemi er a.m.k. að hægja á hóteluppbyggingu í miðborginni - nokkuð sem margir kvarta yfir nú þegar. 

Elín,

Skattastefna er í besta falli handahófskennd og í versta falli stjórnað af illum ásetningi eða vanþekkingu á lögmálum markaðarins.