Sumir vilja bara vera í stjórnarandstöðu

Margir þingmenn kunna best við sig í stjórnarandstöðu. Fyrir því eru margar ástæður.

Ein er sú að stjórnarandstaðan, sé hún til vinstri, fær mikla athygli fjölmiðla og á greiðan aðgang að t.d. öllu hjá RÚV en einnig öðrum miðlum. Margir kunna vel við sig í sviðsljósinu og eru minna hrifnir af þessari leiðinlegu pappírsvinnu sem þarf að vinna í einrúmi þegar búið er að slökkva á hljóðnemunum. 

Önnur ástæða er sú að stjórnarandstaðan fær sjaldan að finna fyrir afleiðingum orða sinna og gjörða. Hún er jú bara stjórnarandstaða sem reynir að benda sitjandi ríkisstjórn á ljósið. Fari eitthvað úrskeiðis getur það ekki verið stjórnarandstöðunni að kenna. Margir kunna vel við þetta fyrirkomulag - að geta masað og masað en þurfa aldrei að bera ábyrgð á neinu. 

Í þriðja lagi er alltaf hægt að vera ósáttur við eitthvað í stjórnarandstöðunni. Skattar eru of lágir, útgjöld til gæluverkefna of lítil og innlimun í Evrópusambandið of hægfara. Stjórnvöld eru spillt, hreinu og óflekkuðu sálir stjórnarandstöðunnar fá aldrei orðið, framkvæmdavaldið kúgar þingið og svona má lengi telja. "Grumpy old men" líður best þegar þeir fá að tuða og nöldra og þurfa aldrei að stinga upp á raunhæfum lausnum. 

Ég legg til að þeim sem líður best í stjórnarandstöðu játi einfaldlega þessa tilfinningu sína og um leið að þeir hafi engan áhuga á að koma að stjórnarsáttmála sem þarf í raun og veru að leggja undir kjósendur í næstu kosningum. 

Eiga ekki samleið

Athugasemdir

[Guðmundur Ásgeirsson, 14.11.2016 kl. 16:49]

Hvað með stjórnarandstöðu til hægri?

Fær hún enga athygli fjölmiðla?

Nei, fyrirgefðu, þegar svokallaða hægrið er í minnihluta þá er víst engin stjórnarandstaða, heldur bara meðvirkni sbr. Icesave III.

Góðar stundir.

[Geir Ágústsson, 14.11.2016 kl. 17:48]

Nú efast ég um að til sé óþekkari hópur í stjórnmálum en frjálshyggjumenn innan Sjálfstæðisflokksins, nema ef vera skyldi frjálshyggjumenn utan hans. Það liggur fyrir að samstarf með Viðreisn og Bjartri framtíð, ef til þess kemur, muni leiða til mjög veigamikilla frávika milli stjórnarsáttmála og landsfundarályktana Sjálfstæðisflokksins, sem SUS átti stóran þátt í að semja. Fyrir það mun Bjarni Ben. hljóta verðskuldaða gagnrýni úr eigin röðum þótt hún rati e.t.v. ekki alltaf í fjölmiðla. 

Eða varstu að vísa til einhvers annars?

[Guðmundur Ásgeirsson, 14.11.2016 kl. 18:05]

Já ég var að vísa til annars.

Hins vegar er alveg rétt hjá þér, að frjálshyggjumenn innan Sjálfstæðisflokksins eru oft óþekkir.

Þeir mega líka alvega vera það, fastir í íhaldinu sem þar er.