Spilling er leið framhjá hindrunum

Í sumum ríkjum er spilling útbreidd og talin vera mikið vandamál. Undir það tek ég alveg. Spilling er hins vegar ekki eitthvað sem sprettur fullskapað upp úr jörðinni og leggst á fólk og fyrirtæki.

Spilling er oftar en ekki leið til að þræða flókna frumskóga skattheimtu og reglugerða. Hún er viðbragð við kæfandi kerfi.

Spilling þrífst ekki nema hún borgi sig. Nú meina ég ekki endilega í fjárhagslegum skilningi. Spilling þrífst þegar það er einfaldara að stunda viðskipti með því að fóðra hana en að sleppa því (t.d. borga lögreglumönnum fyrir að hafa sig á brott eða embættismanni til að veita leyfi fyrir einhverju).

Spilling er lítið vandamál á Íslandi af því að kostnaðurinn við hana er meiri en kostnaðurinn við að stunda heiðarleg viðskipti (yfirleitt). Lítil spilling á Íslandi er ekki einhver afleiðing heiðarlegs uppeldis trúrækinna Íslendinga. Þegar viðskiptahöft einkenndu íslenskt hagkerfi og samfélag þreifst spilling eins og annars staðar þar sem svipað ástand er við lýði í dag.

En þetta gleymist. Menn halda að baráttan við spillinguna verði unnin með því að sekta einhverja einstaklinga og jafnvel að stinga þeim í steininn. Það er eins og að ætla sér að lækna blæðandi svöðusár með því að skera á sig nýtt sár og hleypa blóðinu þar út og vona að svöðusárinu hætti að blæða.

Skilvirkasta leiðin til að berjast gegn spillingu er að einfalda regluverkið, fækka hindrunum á eðlilegum viðskiptum, lækka skatta, styrkja eignarréttinn og minnka völd hins opinbera.

Krefst ekki afsökunarbeiðni frá Cameron

Athugasemdir

[Ásmundur (IP-tala skráð) 12.5.2016 kl. 09:30]

Skv lista Transparency International er miklu meiri spilling á Íslandi en á hinum Norðurlöndunum. Meðan hin löndin eru í 1., 2., 3. og 5. sæti yfir minnstu spilltu lönd heims er Ísland í 13 sæti.

Aðalástæðan er greinilega sú að hægri pólitík hefur ríkt hér lengst af meðan vinstri pólitík hefur einkennt stjórnarfarið í hinum löndunum.

Frjálshyggjan ýtir undir spillingu á þann hátt að spillingin er viðurkennd og eftirlit í lágmarki. Þar sem frjálshyggjan ríkir streymir fé í ríkum mæli frá hinum verr settu til hinna betur settu. Það er mikil spilling.

Skattar verða að vera svo háir að þeir geti fjármagnað innviðina sem almennt eru mjög illa haldnir á Íslandi. Að öðru óbreyttu þyrfti því að hækka skatta en ekki lækka.

En með því að taka eðlilegt gjald fyrir fiskveiðikvóta og orku til stóriðju, hækka tekjuskatta á ofurtekjur og taka aftur upp auðlindarskatt er hægt bæta innviðina án þess að hækka skatta á almenning. Jafnvel mætti þannig lækka skattana á lægri tekjuhópa.

Nauðsynlegt er að auka skattaeftirlit og banna eftir megni skattaskjól þannig að skattsvik borgi sig ekki. Frjálshyggjan vill hins vegar sem minnst eftirlit og ýtir þannig undir skattsvik.

Að þau lönd í heiminum þar sem kratar hafa verið lengst af við stjórnvölinn séu minnst spilltu lönd heims segir sína sögu. Hægri áróður má sín lítils gagnvart slíkum staðreyndum.

[Geir Ágústsson, 12.5.2016 kl. 11:28]

Forstjóri Transparency International er með aðeins öðruvísi boðskap:

"Corruption can be beaten if we work together. To stamp out the abuse of power, bribery and shed light on secret deals, citizens must together tell their governments they have had enough."

[Ásmundur (IP-tala skráð) 12.5.2016 kl. 13:05]

Nei, tilmæli forstjórans eru einmitt góð lýsing á því hvernig jafnaðarmenn vinna og um leið andstaða við vinnubrögð frjálshyggjumanna.

Misnotkun á valdi, mútur, leyndarhyggja og lágmarkseftirlit eru fylgifiskar hægri stefnu. Til að jöfnuður geti aukist þarf að útrýma þessum meinum.

[Geir Ágústsson, 12.5.2016 kl. 14:16]

Ásmundur,

Þú ert búin að skrifa mörg orð en ég skil ekki alveg tenginguna á milli öflugs ríkisvalds með viðamikið eftirlit og mikið vald í höndum embættismanna annars vegar, og lítillar spillingar hins vegar. Er það rétt skilið?

Sem sagt, að það sé vænlegra til að lágmarka spillingu að fela ákvarðanir í hendur einstaklinga sem sjá ekki fram á persónulegt gjaldþrot ef þeir gera á sig. 

Ég er mjög opinn fyrir nánari útskýringum. 

[ls (IP-tala skráð) 12.5.2016 kl. 14:48]

Hvort er þetta vinstri eða hægri spilling?

http://www.mbl.is/frettir/innlent/2016/05/12/ludvik_radinn_hafnarstjori_i_hafnarfirdi/

[Ásmundur (IP-tala skráð) 12.5.2016 kl. 21:52]

Geir að sjálfsögðu geta opinberir starfmenn nýtt krafta sína til að minnka spillingu. Td hefur skattrannsóknarstjóri upplýst að aukið fjármagn í skattrannsóknir skili sér margfalt tilbaka.

Þess vegna var það til vitnis um spillingu þegar núverandi ríkisstjórn minnkaði fjárframlög til embættis skattrannsóknarstjóra. Hún dró þar taum skattsvikara á kostnað almennings.

Opinberir starfsmenn sæta eftirliti og hafa almennt ekki orð á sér fyrir spillingu enda vilja þeir síður missa starf sitt. Spillingin er fyrst og fremst hjá stjórnmálmönnum.

[Geir Ágústsson, 15.5.2016 kl. 11:51]

Hefur opinber forstöðumaður lýst því yfir að aukið fjármagn í hans rekstur muni skila árangri? Það var nú gott. 

[Ásmundur (IP-tala skráð) 15.5.2016 kl. 18:11]

Er það ekki augljóst að aukið fjármagn til opinberra stofnana mun skila sér í betri þjónustu?

Þannig mundi heilbrigðiþjónustan batna, skólar taka framförum og verða samkeppnishæfir við erlenda skóla, viðhald vega verða viðunandi og lögreglan gæti sinnt lögbundnum skyldum sínum.

Ertu í einhverjum vafa um að þetta yrði reyndin ef nægt fjármagn fengist?