Nokkur orð um viðskiptabönn

Viðskiptabönn eru gömul uppfinning. Þau hafa verið notuð í ýmsum tilgangi. Afleiðingar þeirra eru samt svipaðar í flestum tilvikum.

Oftar en ekki leiða viðskiptabönn til þess að fyrirtækjum eða verksmiðjum er lokað og þeir sem missa vinnuna eru yfirleitt almenningur viðkomandi svæðis. 

Þau leiða líka til þess að ríkið sem setur á viðskiptabannið er að neyta sér um hagstæð kjör og það bitnar á almenningi sem þarf að finna sér lélegri valkosti eða borga meira fyrir eitthvað svipað. 

Viðskiptabönn valda líka ruglingi á milli þess að stunda viðskipti og þess að vera ósáttur við eitthvað. Viðskipti eru í eðli sínu friðsamleg og gagnleg fyrir alla sem að þeim koma (annars væru þau ekki stunduð og menn væru að gera eitthvað annað og létu viðskiptin eiga sig). Með því að kæfa frjáls viðskipti er verið að takmarka möguleika fólks á að nýta þau tækifæri sem annars væru til staðar til að bæta kjör sín.

Viðskiptabönn geta ýtt undir ólgu og pólitískan og efnahagslegan óstöðugleika og framapotarar í röðum stjórnmálamanna eru fljótir að nýta slíkt til að styrkja völd sín. Viðskiptabönn styrkja því ósvífna og harðsvíraða stjórnmálamenn.

Viðskiptabann á Ísrael er ekki bara gagnslaust heldur hefur nú þegar leitt til mikils taps fyrir íslenskan efnahag. Ég vona að menn hafi lært sína lexíu og minnist orða Jóns Sigurðssonar sem sagði að Íslendingar ættu að rækta eigin garð og stunda frjáls viðskipti við alla. 

Harmar ákvörðun borgarstjórnar

Athugasemdir

[Vagn (IP-tala skráð) 23.9.2015 kl. 13:01]

Kaupir þú þýfi? Þar færð þú vöruna á lágu verði og hagstæðum kjörum sem bætir efnahag þinn. Enginn missir vinnuna. Frjáls viðskipti við alla. Og fyrst viðskipti eru í eðli sínu friðsamleg og gagnleg fyrir alla sem að þeim koma þá getur það ekki verið nema hið besta mál. Eða getur verið að slagorð og frasar frjálsra viðskipta eigi ekki ætíð við?

[Elín Sigurðardóttir (IP-tala skráð) 23.9.2015 kl. 13:41]

Vagn er átaklegt eintak af mannveru.  Þræll sem grátbiður um hlekkina.

[Jóhann Kristinsson, 23.9.2015 kl. 13:45]

Hvað ættli að viðskiptabann USA á Japan hafi kostað mörg mannslíf, áður en viðskiptabanninu milli þessara landa var aflétt?

Viðskiptabönn geta komið af stað styrjöldum milli ríkja.

Kveðja frá Houston

[Einar Steinn Valgarðsson (IP-tala skráð) 23.9.2015 kl. 14:25]

Árétti að hér var ekki um viðskiptabann að ræða, heldur tók þetta einungis til Reykjavíkurborgar og innkaupastefnu hennar, sem sagt að ísraelskar vörur yrðu sniðgengnar í innkaupum hennar.

Það vakti líka athygli mína að þú minntist hvergi á hernámið í færslunni þinni.

[Elín Sigurðardóttir (IP-tala skráð) 23.9.2015 kl. 17:34]

Næst á að sniðganga Kína.  Það er fyndið að hugsa til þess að ólíklegasta fólk kallar sniðgöngu friðsamlega aðgerð.  Allir sem eitthvað hafa heyrt um einelti vita að útilokun er ofbeldi.  Hættum þessu sniðgöngutali.  Sérstaklega fólk sem boðar allskonar.  Í Kína er allskonar fólk eins og alls staðar annars staðar í heiminum.  Treystum fólki til að stunda sín viðskipti í friði og spekt.  Göngum úr Nató hættum þessu endalausa útilokunartali.

http://www.mbl.is/frettir/innlent/2015/09/23/vill_snidganga_vorur_fra_kina/

[Geir Ágústsson, 23.9.2015 kl. 18:32]

Vagn: Góður! Þú vilt þá væntanlega leggja að jöfnu frjáls samskipti og samskipti manns sem hótar öðrum líkamlegu ofbeldi. En ekki ég.

Jóhann: Ógrynni! Þú virðist þekkja vel söguna að baki árás Japana á Pearl Harbour, og hvernig sú saga er ólík þeirri sem er matreidd ofan í börn í skólunum. 

Einar: Reykjavík ákvað að sniðganga vörur frá Ísrael. Það getur vel verið að orðabókarskilgreining viðskiptabanns sé önnur en sú ætlun, en niðurstaðan er nákvæmlega sú sama. Hvað hernámið varðar þá er rétt að um umdeilt mál er að ræða en um leið fjarri því grófasta dæmið um yfirgang eins á öðrum í okkar heimi og einkennileg ástæða viðskiptabanns í hinu stóra samhengi.

[Einar Steinn Valgarðsson (IP-tala skráð) 25.9.2015 kl. 09:00]

Niðurstaðan er einmitt ekki sú sama, þar sem viðskiptabann tekur til meira en innkaupastefnu. Þetta snerist um innkaup borgarinnar á vörum, ekki annað. Þannig hefði til að mynda einkaaðilum eftir sem áður verið fyllilega frjálst að versla við Ísrael, þó borgin sjálf keypti ekki vörur þaðan.