Ekki ég!

Hún er sterk sú tilhneiging hagsmunasamtaka að líta aðeins í eigin barm - sjá eingöngu það sem snýr nákvæmlega að þeirra eigin hagsmunum og líta framhjá heildarmyndinni, jafnvel viljandi.

Gott dæmi er skattlagning. Hagsmunasamtök ýmis konar líta yfirleitt á hana sem eitthvað sem á fyrst og fremst að bitna á einhverjum öðrum, en ekki þeim sjálfum. Þau tala aldrei fyrir almennum skattalækkunum sem um leið koma þeirra skjólstæðingum til góðs. Nei, þau þegja yfirleitt þegar ríkisvaldið þefar uppi nýja skattgreiðendur ef þau standa utan við hagsmunasamtökin.

Þetta er auðvitað skiljanlegt. Aðrir gera sig sekan um sams konar hugarfar. Launþegar fagna þegar ríkisvaldið hækkar skatta á fyrirtæki. Þeir sem reykja ekki þegja þunnu hljóði þegar ríkisvaldið hækkar opinberar álögur á tóbak. Þeir sem drekka ekki segja ekki orð þegar ríkisvaldið seilist dýpra í vasa áfengisneytenda. Það er freistandi að vona að ríkisvaldið nái að seðja hungur sitt á tekjum annarra.

Á endanum mun ríkisvaldið samt alltaf þefa uppi nýja og nýja skattstofna til að kroppa í. Enginn getur vonast til að sleppa, ef svo má að orði komast.

Hagsmunasamtök ýmis konar myndu gera sjálfum sér stóran greiða til lengri tíma með því að berjast gegn auknum álögum almennt - berjast fyrir grennra ríkisvaldi sem heldur að sér höndum í eyðslu sinni á annarra manna fé. Það er í raun eina raunhæfa leiðin til að temja hið opinbera. Aðhald sem kemur frá mjóróma röddum hér og þar er lítils virði. Ríkisvaldið lætur þær sem vind um eyru þjóta.

Núna kvarta Samtök fjármálafyrirtækja. Það er of seint. Þau geta dregið ríkisvaldið fyrir dómstóla ef þau telja sig hafa málstað að verja. Ríkisvaldið er að reyna þenjast út, og núna mun það bitna á fjármálafyrirtækjum. Aðrir þegja og vona að þetta seðji hungur hins opinbera. Sú verður raunin ekki. 

Skattlagningin á ekki rétt á sér

Athugasemdir

[Espolin (IP-tala skráð) 21.6.2015 kl. 14:28]

Og ég sem hélt að þú værir á móti því að samtakamáttur væri notaður. Hver ætti að semja fyrir sig og stunda sína hagsmunabaráttu einn á eigin verðleikum.

[Geir Ágústsson, 21.6.2015 kl. 14:40]

Get ég samið við ríkisvaldið um skattheimtu þess á mér? Það væru nothæfar upplýsingar! En í hjörð kinda er ég alveg til í að nota samtakamáttinn til að eiga við úlfahópinn sem vill borða úr hjörðinni (helst þar til hún er öll uppétin).

[Guðmundur Ásgeirsson, 21.6.2015 kl. 14:59]

Geir sagði: Hagsmunasamtök ýmis konar myndu gera sjálfum sér stóran greiða til lengri tíma með því að berjast gegn auknum álögum almennt

Rétt er að benda á að það eru til slík samtök, þau heita Hagsmunasamtök heimilanna og berjast gegn sívaxandi álögum á heimilin almennt, en þar sem allir eiga einhverskonar heimili eru það sameiginlegir hagsmunir allra.

[Geir Ágústsson, 21.6.2015 kl. 15:41]

Guðmundur,

Takk fyrir ábendinguna. Að vísu hafa HH ekki höfðað til allra, og virðast t.d. höfða svolítið til skuldsettra fasteignaeigenda, en vonandi láta þau gott af sér leiða.

Önnur samtök sem mætti benda á eru Samtök skattgreiðenda. 

[Guðmundur Ásgeirsson, 21.6.2015 kl. 18:34]

Ástæða þess að barátta gegn íþyngjandi lánskostnaði hefur hingað til verið helstu áhersluatriði HH er einfaldlega vegna þess að það er stærsta hagsmunamál flestra heimila. Sú afstaða byggist alls ekki á því að þeir sem skulda eigi að fá hjálp á kostnað annarra, heldur þeirri staðreynd að flest neytendalán hér á landi eru ólöglega úr garði gerð. Þannig snýst þetta ekki um peninga heldur réttindi fólks, og baráttu gegn því að þau séu brotin, en þar til samtökin urðu til voru íslenskir neytendur almennt lítið meðvitaðir um réttindi sín, og í skjóli þess hafa þau verið þverbrotin.

Samtökin beita sér líka fyrir mörgum fleiri atriðum sem varða hagsmuni allra heimila, til dæmis að í stað þess að niðurgreiða húsnæðiskostnað með bótum eigi frekar að lækka húsnæðiskostnaðinn og sleppa bótunum. Þetta varðar hagsmuni allra skattgreiðenda, því það eru þeir sem þurfa að borga skatta sem eru notaðir til að fjármagna bæturnar. Ef þetta yrði lagað myndi það hjálpa öllum, líka þeim sem hvorki skulda né leigja, með því að lækka skattbyrðina hjá þeim. Þetta er aðeins eitt dæmi af mörgum sem hægt væri að nefna til að sýna fram á að HH eru alls ekki bara "samtök skuldara" þó að ýmsir varðhundar auðvaldsins hafi gjarnan reynt að halda slíku fram.

[Geir Ágústsson, 21.6.2015 kl. 20:47]

Guðmundur,

Takk fyrir upplýsandi innlegg. Þetta hljóma vissulega eins og góð baráttumál. Um allan heim eru til samtök neytenda sem upplýsa neytendur um lögin og hvernig eigi að forðast svindl og pretti. Hin íslensku Neytendasamtök hafa því miður verið frekar getulaus í þeirri viðleitni og gott að fleiri sinna þessum brýnu málefnum. Býð hér með fram krafta mína til þess starfs er snýr að því að benda á að auknar opinberar álögur eru bein skerðing á kjörum allra heimila (sem borga skatta). 

[ls (IP-tala skráð) 22.6.2015 kl. 11:01]

Það er voða vinsælt að búa til samtök og kalla þau hagsmunasamtök stórs hóps (t.d. neytendasamtökin, Félag Íslenskra Bifreiðaeigenda og svo þau sem hér eru nefnd Hagsmunasamtök heimilanna og skattgreiðenda).  Vandinn er sá að þetta eru bara hagsmunasamtök sumra og beita sér bara fyrir áhugamálum forsvarsmannanna. Eitt af stærri hagsmunamálum HH t.d. mynda gera mér (sem skuldsettum húseiganda) erfiðara fyrir að standa í skilum. Á sínum tíma sagði ég mig úr FÍB vegna þess að eitt baráttumála þeirra var að auka rekstrakostnað bílsins míns!

[Geir Ágústsson, 22.6.2015 kl. 11:58]

Is,

Athyglisverð frásögn.

Kannski mætti stofna Hagsmunasamtök hagsmunasamtaka. Þau myndu berjast fyrir allt í senn lágum sköttum og háum ríkisstyrkjum, eða miklu aðgangshindrandi regluverki á samkeppnisaðila en jafnframt litlum ríkisafskiptum. Sannkölluð "borða kökuna og eiga hana" stemming.