Skattar MUNU hækka, en á hvern?

Óopinber en augljós ásetningur ríkisvaldsins á Íslandi er að þenjast sem mest út sem víðast. Hættan fyrir stjórnmálamenn er samt sú að ef þeir sjúga of mikið af verðmætum samfélagsins til ríkisins of hratt þá verði pólitískur ásetningur þeirra of mörgum augljós. Þeir bregða því á það ráð að skrúfa skattana upp í tiltölulega litlum skrefum, og ekki á alla í einu. Stundum eru skattarnir samt skrúfaðir hratt upp, en þá er þess gætt að sú skattahækkun lendi bara á tiltölulega fámennum og dreifðum hópi sem er ekki í sömu "hagsmunasamtökum" (t.d. sama verkalýðs- eða fagfélagi). Þannig má lágmarka andspyrnuna. Skuldlausir eldri borgarar liggja t.d. vel við höggi hérna. 

Núna virðast tveir hópar vera í sigti hins opinbera skattariffils: Ferðaþjónustuaðilar, og stórir raforkukaupendur. Ferðaþjónustan á að taka á sig þunga hækkun virðisaukaskatts, og stóra raforkukaupendur á að svíkja um endalok "tímabundinnar" hækkunar á einhverju opinberu gjaldinu.

Hvað gerum við hin svo? Við þegjum. Flestir anda léttar og hugsa með sér að skatta á þá sjálfa eigi a.m.k. ekki að hækka enn meira, í bili.

Ég skrifaði nokkur orð um þetta efni sem birtust í Morgunblaðinu í dag. Þau orð má lesa hérna.

Athugasemdir

[Helgi (IP-tala skráð) 16.10.2012 kl. 22:59]

Sæll.

Það er mikið til í þessu hjá þér.

Vandinn er sá að það virðist ekki vera neinn mótmælakúltúr hér eða á Norðurlöndunum (nema einna helst hjá vinstri mönnum). Mér skilst að hækka eigi gjöld á eldsneyti um áramótin með tilheyrandi jákvæðum áhrifum á efnahagslífið og fjárhag fjölskyldna.

Varðandi hækkun á vsk á ferðaþjónustuna er hann næstum því fyndinn hann er svo mikið bull: Vg töluðu í upphafi kjörtímabils eins og ferðaþjónustan ætti að leysa allan vanda þjóðarinnar en nú, örfáum árum síðar þegar greinin gengur ágætlega, á búa þannig um hnútana að færri ferðamenn komi hingað, við fáum minni gjaldeyri af greininni, færra fólk fái vinnu við að þjónusta ferðamenn, fyrirtæki í geiranum fari á hausinn og síðast en ekki síst að ríkið tapi fé á þessum skatti.

Vilja stjórnvöld kannski að hér lepji allir dauðann úr skel?

Af hverju gat þetta vonlausa stjórnlagaráð ekki sett klausu inn í stjórnarskrá að skattur, hvaða nafni sem hann nefnist, megi ekki fara yfir 10%. Á stjórnarskráin ekki að vernda okkur gegn ríkisvaldinu? Það stelur kinnroðalaust af fólki í dag og við erum alveg varnarlaus :-(

Mér finnst kreppan í dag líka vera að mörgu leyti skipbrot fulltrúalýðræðis.

[Geir Ágústsson, 20.10.2012 kl. 08:29]

Sæll Helgi,

Það eina sem er hægt að treysta á er að skattar hækki miðað við það sem nú er. Stjórnvöld vilja að allir lepji úr lófa hins opinbera. Sumir hafa kallað það "vasapeningaþjóðfélagið".

[Sigurður Antonsson (IP-tala skráð) 20.10.2012 kl. 21:16]

Sæll Geir

Langar að koma á aðalfund frjálshyggjufélagsins 27. okt.

Getur þú látið mig vita hvar fundurinn verður haldinn.

Kveðja Sigurður

[Geir Ágústsson, 21.10.2012 kl. 12:27]

Sæll Sigurður,

Ég veit ekki meira en það sem stendur hérna:

http://frjalshyggja.is/index.php/component/content/article/35-frettir-og-tilkynningar/182-aealfundarboe

Kv.

Geir