Rússagrýlan mætt í Keflavík

Rússar eiga hraðfleygustu flugskeyti í heimi sem þeir þróuðu sem andsvar við uppbyggingu flugskeytaskotpalla NATO um gjörvalla Austur-Evrópu. Eða það er að minnsta kosti söguskýring Pútín. Sennilega erum við á Vesturlöndum með einhverja aðra.

Þessi flugskeyti geta ferðast heimsálfa á milli á mínútum. Mögulega hraðar en viðbragðstími margra varnarkerfa gegn flugskeytum. 

Það eru til margar leiðir til að lokka slík flugskeyti til sín (ef menn vilja vera á slíkri vegferð). Danir eru hérna mögulega fremstir í flokki. Þeir buðu NATO upp á mjög veglegar aðstæður til að koma sér fyrir í Eystrasalti. Um daginn lofuðu þeir að gefa Úkraínu öll stórskotaskotfæri sín. Hvað er heppilegra skotmark en vopnlaus bandamaður andstæðingsins með stórar bækistöðvar hers á sínu landi? Ég bý innan við 3 km frá flugvellinum í Kaupmannahöfn. Mér finnst þetta ekkert sniðugt (og heldur ekki ef kílómetrarnir væru hundrað). En það má jú ekki gagnrýna svona málningarvinnu á skotskífum.

Á hverju degi birtast fréttir af því hvað Rússar gætu gert. Um leið er okkur sagt hvað rússneska ríkið standi höllum fæti. Pútín er allt í senn að skipuleggja allskyns árásir og um leið á banabeði og notar klóna til að koma fram fyrir sína hönd. Hann heldur tveggja tíma ræður og situr álíka löng viðtöl en er um leið við lélega andlega heilsu. Hann er með krabbamein um leið og hann yngir upp kærustuna.

Blaðamenn ættu kannski að finna sér eitthvað annað til að fjalla um úr því þeim gengur ekki betur en þetta.

Telur Rússa hafa áætlanir fyrir Keflavíkurflugvöll

Ekkert er varanlegra en tímabundnar björgunaraðgerðir yfirvalda

Katrín Jakobsdóttir for­sæt­is­ráðherra segir þörf á að horfa til blandaðra leiða til að mæta kostnaði vegna náttúruhamfara á Reykjanesskaga. Aukin útgjöld ríkisins eru nauðsynleg á komandi tímabili. Í þessu felst meðal annars að hækka skatta, gera tímabundna skatta varanlega, halda áfram að vanrækja þá þjónustu sem fólk heldur að ríkisvaldið eigi að einbeita sér að, og margt fleira gott.

Á meðan er hælisleitendum keyrt í leigubílum á milli landshluta til að sækja ókeypis tannlækna- og heyrnatækjaþjónustu um leið og þeim er réttur vasapeningurinn sinn. Á vegum íslenska ríkisins eru í dag hópar embættismanna í Egyptalandi til að múta landamæravörðum til að hleypa fleiri hælisleitendum til Íslands og a.m.k. einn þingmaður í Úkraínu að berja þar í trommur stríðsreksturs í landamæradeilum tveggja ríkja vegna yfirráða yfir rússneskumælandi fólki sem fær aldrei að kjósa án þess að atkvæðunum sé hent í ruslið.

Á sama tíma fjalla samstilltir fréttatímar um ölvunarástand íslenskra unglinga í flugvél og hvaða fasteign fræga fólksins er til sölu.

Til að bæta gráu ofan á svart virðist svo vera hafinn undirbúningur fyrir að byrja aftur að sprauta fólk með mRNA svokölluðum bóluefnum. Í þessari frétt er fjallað um rannsókn sem á einhvern undraverðan hátt sýnir algjöra andstæðu gríðarlegs fjölda annarra rannsókna, sem er sú að mRNA svokölluðu bóluefnin séu örugg (ekki endilega að þau séu gagnleg, en örugg). Og það eftir litla 10 daga frá útgáfu þeirrar rannsóknar. Það mætti halda að blaðamenn séu að fylgjast með, en eru auðvitað bara að fá ábendingar um „réttar“ rannsóknir.

Ég tek ekki þátt í þessu bulli. Ég borga nokkurn veginn alla mína skatta til að forðast fangelsi en ég er farinn að banna læknum að sprauta börnin mín, merki engar myndir af mér með fánum og merkjum, lít á fréttir (að undanskildum íþróttafréttum og kannski veðurfréttum) sem afþreyingu frekar en upplýsingar, huga í engu að kolefnisfótspori mínu og finnst orðið „kvár“ ekki eiga að fá stig í orðaleikjum.

Hið opinbera veit að fátt er varanlegra en tímabundið neyðarástand. Veira, Úkraína, Ísrael. Hið eina raunverulega neyðarástand fyrir Íslendinga eru eldsumbrot en allir sjóðir eru tómir. Nýir skattar taka við. Öll neyðarástöndin halda áfram. Forgangsröðun er engin. Áfram gakk!

Komandi tímar kalla á útgjöld

Umræða, loksins!

Loksins, loksins, loksins! Loksins er kominn fyrsti vísir að einhverri umræðu um málefni innflytjenda og hælisleitenda á Íslandi.

Umræða þar sem er hægt að hafa ákveðna skoðun án þess að vera bara kallaður rasisti. Það er jú aldrei hægt að kalla formann Samfylkingarinnar rasista þótt hann þrói með sér sömu skoðun og þeir Sjálfstæðisflokknum.

Þetta minnir á danska þjóðfélagsumræðu fyrir 20 árum síðan. Einn stjórnmálaflokkur var að stækka vegna áherslu sinnar á að takmarka streymi hælisleitenda og flóttamanna inn í Danmörku. Flokkurinn var kallaður öllum illum nöfnum þar til danska Samfylkingin tók upp stefnu hans í þessum málaflokki. Þá gat umræðan hafist.

Umræðan er nauðsynleg til að norræn jafnaðarmennska nái að fóta sig á Íslandi. Hún snýst um að verja velferðarkerfið en ekki láta það ná til alls heimsins (fyrir utan skattgreiðendurna sem borga fyrir það - þeir fá ekkert).

Hvað sem mönnum finnst um risavaxinn velferðarvef á könnu hins opinbera hljóta allir fagna því að hann nái fyrst og fremst til innfæddra og bara til annarra ef það er eitthvað aflögu. Það er alls ekki staðan á Íslandi í dag (eða Danmörku, ef því er að skipta, enda getur tekið áratugi að leiðrétta skemmdarverk fortíðarinnar).

Oddný rýfur þögnina um orð Kristrúnar

Heilablóðfall íslenska ríkisins

Fyrir ekki löngu síðan las ég eftirfarandi orð, byggð á viðtali við Íslending sem hafði fengið heilablóðfall og var, og er, að jafna sig á því:

„Ég hef aldrei drukkið, aldrei reykt, aldrei verið í yfirþyngd. Í rauninni eina boxið sem ég tikka í, sem er talið geta orsakað heilablóðfall er kannski streita. En það er annar hver maður að burðast með streitu. En ég er kannski smá sek um það […] Eins og ég skilgreindi velgengni var að hafa rosalega mikið að gera, segja já við öllum verkefnum og hafa nóg að gera,“

Ég held að íslenska ríkið ætti að tengja við þetta. Það telur sig vera í hollustunni en er það ekki.

Það er að segja já við öllu: Hælisleitendum, ákalli um að fjármagna stríðsátök, ákalli um að senda opinbera starfsmenn erlendis til að múta þar spilltum landamæravörðum, ákalli um að skipta út hagkvæmri orku fyrir óhagkvæma og úr hreinni orku yfir í óhreina, ákalli um að fjármagna ríkisreksturinn á yfirdrætti, ákalli um að gera allt fyrir alla á meðan það snýr ekki að grunnþjónustunni sem flestir halda, ranglega, að sé í forgangi.

Heilablóðfall íslenska ríkisins er hafið. Það er nú þegar að valda sársauka og jafnvel lömun. 

Besta hugmyndin er þá sú að halda áfram að segja já við öllu en reyna að gera betur.

Kannski þingið ætti að hefja sumarfrí sitt bráðum. Ríkið gerir voðalega lítið af sér á meðan þingmenn eru í fríi. Það hættir að segja já við nýjum verkefnum. Heilablóðfall ríkisins fær möguleika á að hjaðna.

Betra er langt frí en vinnuvika sem endar á heilablóðfalli.

Vill betri aðlögun og vinna gegn ójöfnuði

Norræn jafnaðarmennska skýtur upp kollinum á Íslandi

Það blasir við að stefna íslenskra stjórnvalda í svokölluðum útlendingamálum er glapræði. Klókir stjórnmálamenn hafa hér tækifæri til að lokka til sín kjósendur með því að benda á það. Kjósendur eru að bíða eftir raunsæi hérna. 

Núna hefur formaður Samfylkingarinnar stigið fram og boðar aðgerðir. Það er góð stefnubreyting. Ef ég tæki upp á því aftur að kjósa þá myndi ég að vísu aldrei kjósa Samfylkinguna en fyrir þá sem eru í sífellu að flakka á milli Pírata, Viðreisnar, Samfylkingar, Sósíalistaflokksins, Vinstri-grænna, Flokks fólksins og jafnvel Framsóknar er valið orðið nokkuð skýrt. 

Að því gefnu auðvitað að í kjölfar orða komi aðgerðir: Lagafrumvörp og þess háttar.

Aðrir vinstriflokkar þurfa nú að velta því fyrir sér hvort þeir taki líka upp fána norrænnar jafnaðarmennsku eða þurrkist út. Sjálfstæðisflokkurinn og Miðflokkurinn þurfa líka að girða sig í brók ef þeir ætla ekki að líta út eins og linkindur í samanburði við formann Samfylkingarinnar. Best væri auðvitað að fá svolitla samkeppni í því hvernig á að sauma fyrir götin á íslenskum landamærum, ríkissjóði og tómum hirslum sveitarfélaganna.

Fyrir 20 árum sáu danskir jafnaðarmenn það sem sumir þeirra íslensku sjá í dag: Ekki er hægt að halda úti velferðarkerfi samhliða því að fólki er mokað inn í það. Þeir sem koma þurfa að standa á eigin fótum og verða greiðendur skatta en ekki neytendur. Þeir sem flytja inn í samfélagið þurfa að aðlagast því, en ekki öfugt. Þetta er norræn jafnaðarmennska og þótt ég sé enginn jafnaðarmaður þá fagna ég því samt ef hún nær til Íslands.

Ekki sérstök stefnubreyting

Talsmenn báknsins

Í aðsendri grein í Morgunblaðinu tekur vinstrisinnaður þingmaður upp hanskann fyrir báknið:

Þúsund­ir op­in­berra starfs­manna mæta til vinnu á degi hverj­um og gera sitt besta til þess að mæta óend­an­legri eft­ir­spurn og sí­vax­andi kröf­um sam­fé­lags­ins. Þau sjá um þær skyld­ur sem við höf­um ákveðið að fela þeim, kenna börn­um, hlúa að sjúk­um, þjón­usta eldri kyn­slóðir, halda uppi lög­um og reglu og þannig mætti telja áfram. Eft­ir­lits­stofn­an­ir fylgj­ast með, í nafni al­manna­hags­muna, að farið sé að regl­um. Að ekki sé svindlað á al­menn­ingi með sam­ráði. Veg­um sé haldið opn­um af fólki sem fer snemma á fæt­ur og skef­ur í dimmviðri frá morgni til kvölds. Það er í mín­um huga til óþurft­ar að tala eins og verið sé í sí­fellu að sólunda fé í óþarfa, í eitt­hvert órætt bákn.

Þetta er bæði rétt og rangt. Það er rétt að á þeim sviðum þar sem hið opinbera hefur búið til „óendanlega eftirspurn“ eftir úrvinnslu óþarfa eyðublaða og tekið sér einokunarvald, bannað samkeppni, og sett á spena skattgreiðenda að þar mætir mikill fjöldi til vinnu og reynir að leggja sitt af mörkum.

En það er enginn að kvarta yfir vinnu þessa fólks, jafnvel þótt óþarfa eyðublöðin taki sinn toll. Foreldrar hrækja ekki framan í leikskólakennara eða starfsmenn sýslumannsembættanna. Starfsfólk spítala og hjúkrunarheimila mætir í engu einhverju leiðinlegu viðhorfi frá skjólstæðingum og aðstandendum. 

En þegar atvinnubílstjórar eru sendir á gagnslaus námskeið gegn svimandi gjaldi þá kvarta menn. Þegar fiskverslun getur ekki opnað af því þrjú eða fjögur mismunandi embætti geta ekki verið sammála um hvar eigi að vera ræsi á gólfinu (sönn saga!) þá fyllast menn tortryggni. Þegar menn þurfa að hafa aðgang að milljónum í annaðhvort sparnaði eða lánum áður en þeir mega byrja steikja kjúkling þá taka reyndir menn eftir því að báknið er að þenja sig út, og snýta út úr sér regluverki.

Þegar leyfisveitingar breiða úr sér þar sem engar voru áður, af engum sérstökum ástæðum, þá taka menn eftir.

Þessi gamla tugga um að verið sé að verja neytendur og passa að lögum sé framfylgt er ekki rétt. Þvert á móti missir báknið allan fókus á því sem fer raunverulega fram þegar það hefur drekkt öllu í eyðublöðum og pappírsvinnu. Raunverulegt eftirlit er orðið að skrifborðsvinnu. 

En er ekki allt Evrópusambandinu að kenna? Nei, alls ekki. Íslendingar innleiða allt sem þaðan kemur af slíku offorsi að Evrópusambandið lítur út eins og villta vestrið í samanburðinum. Til dæmis get ég í Danmörku ennþá keypt plastpoka í flestum matvöruverslunum eða fengið þá ókeypis í ávaxta- og grænmetisdeildinni, og flokka í tvær tunnur en ekki tíu. Líkurnar á að ég þurfi að standa í röð hjá einhverju embættinu til að geta gert það sem ég vil eru mun minni í Danmörku en á Íslandi. Ekki vegna Evrópusambandsins, heldur þrátt fyrir það, vegna þess hvernig hlutir eru innleiddir og hvernig báknið er skrúfað saman.

Íslenskir stjórnmálamenn eru oft án hryggsúlu og með ónýt hné sem bogna um leið og báknið ræskir sig. Þeir leggja yfirleitt ekki í það, því miður. En ýmis teikn eru núna á lofti og vonum að úr þeim rætist.

Unga fólkið og loftslagið

Í mjög fróðlegri yfirferð fer blaðamaður í þessu myndbandi yfir þrjátíu spádóma um framtíð loftslagsins undanfarna áratugi. Það er búið að spá því óteljandi sinnum að jöklarnir séu að hverfa, að snjór heyri sögunni til, að eyjur fari undir sjó og svona mætti lengi telja. En líka að jörðin sé að frjósa og ísöld væntanleg. 

Við þekkjum öll þessa spádóma sem endurnýja sig eins og gömul tíska. Nema kannski unga fólkið. Blaðamaður er með áhugaverða tilgátu:

Kannski það útskýri af hverju það er aðallega ungt fólk á þessum loftslagsmótmælum. Af því það hefur ekki lifað undanfarin 50 ár af þessum spádómum þá gerir það kannski ráð fyrir að seinasta spáin sé sú eina og þar með að hún sé rétt.

Þetta er ágæt útskýring. Ungt fólk veit skiljanlega ekki að það er búið spá hamförum mjög oft og hefur engan áhuga á einhverri leiðinlegri fortíð.

Ætli þetta gildi um fleira en bara loftslagsspádóma? 

Þegar ég var ungur maður þá lét ég lokka mig til að styðja við innrás Bandaríkjanna í Írak. Ég vissi lítið um sögu Bandaríkjanna, Breta og fleiri Vesturlanda í Miðausturlöndum og hvernig þetta svæði hefur verið undir stanslausum afskiptum vestrænna hermanna svo áratugum skiptir. Núna veit ég betur. Það getur verið gagnlegt að kynna sé aðeins söguna og gleyma sér ekki í hávaðamáli dagsins.

En kannski þarf fyrst að vera ungur og vitlaus og láta plata sig í nokkur mótmæli. Þá það.

Glasið er fullt, elskan

Ég er faðir orkumikillar og hugmyndaríkrar 6 ára stúlku. Hún vill gera allt sjálf og skammar mig jafnvel fyrir að hjálpa henni þegar hún þarf í raun og veru hjálp. Þetta er svo sannarlega lúxusvandamál sem ég ber ánægður á herðum mínum.

Um daginn vildi hún hella appelsínusafa í glas. Fernan var ný og því nokkuð þung. Að lyfta henni upp og og halla og hitta í glasið og hella rólega og allt þetta krefst samhæfingar og ákveðins styrks. Hún hellti í glasið og þegar það var við það að fyllast þá varaði ég við að hella ekki of miklu í það því þá gæti glasið yfirfyllst. Hún hætti ekki við það og vildi fylla það alveg að brúninni. Það tókst næstum því, en ekki alveg. Eitthvað af safa lak út fyrir og á borðið. Við þurrkuðum það í sameiningu og urðum sammála um að hella ekki alveg svona miklu í glasið næst.

Núna er Ísland fullt. Innviðir eru sprungnir fyrir löngu. Það er orkuskortur. Ríkissjóður er rekinn á yfirdrætti. Biðtímar eftir þjónustu, leikskólaplássi og læknisaðgerðum eru alltof langir. Húsnæðismarkaðurinn er sprunginn og ræður ekki einu sinni við innlenda flóttamenn og hvað þá erlenda. 

Hvað gera yfirvöld þá? 

Taka þau til sín varnarorð um að það sé að flæða úr glasinu og á borðið og jafnvel gólfið?

Nei, auðvitað ekki.

Þau skilja ekki það sem 6 ára krakkar skilja. 

Hvers vegna ekki?

Því get ég ekki svarað.

Spítalinn ekki upplýstur um ástand flóttafólksins

Hlaupabóla var það víst

Ég gær skrifaði ég af miklum eldmóð lítinn pistil um mislinga, óþarfa ótta við mislinga og hvernig nýjar tegundir af sprautum hræra saman fjölmörgum efnum í eina blöndu til að tryggja að fólk geti ekki valið að sleppa sumum efnum.

Á meðan ég stend við margt af því sem ég skrifaði (sjá mynd) þá ætla ég að leiðrétta sjálfan mig í tveimur veigamiklum atriðum:

• Mislingar eru stórhættulegir og ég fagna því að það sé til sannprófað bóluefni sem veitir raunverulega vörn
• Ég fékk ekki mislinga heldur hlaupabólu, og það var hún sem ég hristi af mér

Ég hljóp sem sagt aðeins á mig og biðst velvirðingar á því.

Eftir stendur nú samt að sífellt er verið að sprauta gegn fleiri og fleiri sjúkdómum. Sumir þeirra eru meira að segja kallaðir hættulausir:

Sýkingin er yfirleitt hættulaus og gengur fljótt yfir en hún er þekkt fyrir að valda alvarlegum fylgikvillum sérstaklega hjá unglingum og fullorðnum.

Hérna er sem sagt verið að lýsa hettusótt. Ég fékk enga sprautu gegn henni, og heldur ekki hlaupabólu (fékk bara sjúkdóminn), streptókokkum og ýmsu fleira. Samanburð á bólusetningakorti mínu og lista yfir bólusetningar barna í dag má sjá hér að neðan (smella þarf á mynd til að stækka hana).

Ég er ekki að mæla á móti bólusetningum né því að börn séu bólusett né því að bóluefnum fjölgi eitthvað þegar menn hafa fundið örugg og góð efni sem svo sannarlega fela í sér minni áhættu en veiran sem þau eiga að stöðva.

En þetta er allt að þróast í ranga átt. Það er látið eins og sprautum fylgi engin áhætta bara af því þær eru á lista einhverra embætta - embætta sem eru ennþá að drepa fólk með nýjasta glundrinu sem að auki er gagnslaust. Sjúkdómar sem fólk fékk einfaldlega og jafnaði sig á eru komnir á par við pláguna miklu. 

Í Danmörku, þar sem ég bý, er sprautað til 5 ára aldurs og síðan er ekki sprautað aftur fyrr en við 12 ára aldur og þá er þessi HPV-sprauta sett í krakka. Í Danmörku í bæði stráka og stelpur (á Íslandi bara í stelpur). Ég hafnaði þessari sprautu fyrir son minn og uppskar skammir fyrir en það verður bara að hafa það. Þetta er orðið fínt.

Hvað er skynsöm skoðun? Þumalputtaregla

Ég er að þróa með mér þumalputtareglu til að komast að því, með fljótlegum hætti, hvaða afstaða í málum er sennilega sú skynsamlega. 

Hún er eitthvað á þessa leið:

Þegar Íslendingar hópa sig saman með skilti og eru með skrílslæti eða af því yfirvöld segja þeim að gera það þá er sennilega skynsama skoðunin sú að vera á öndverðum meiði við þann hóp.

Ýmis mál ræsa þessa reglu og þótt ég reyni nú að mynda mér mína eigin skoðun þá virðist hún oft afhjúpa sig sjálf - sem andstæð skoðun við hópinn. Sem dæmi má nefna:

• Mál Eddu Bjarkar og barnanna
• Málefni Palestínu-Araba á Íslandi
• Sprautuveislurnar í íþróttasölunum
• Kvennafrídagurinn
• Búsáhaldabyltingin

Lesendur mega gjarnan bæta við þennan lista.

Á þessu eru auðvitað veigamiklar undantekningar, svo sem þegar Íslendingar þjappa sér saman til að aðstoða landsmenn sína þegar náttúruöflin minna á sig og þegar fólk hittist til að veifa fána á 17. júní.

En skrílslætin afhjúpa oftast einhvers konar hjarðhegðun og skort á jarðtengingu sem á augabragði breytir friðsömu úthverfaliði sem býr í húsi með bílskúr í Gyðingahatara, fasista, strengjabrúður erlendra stofnana og já, skríl.

Ekki fyrir mig, takk.