Allar réttu vottanirnar

Leikskólinn Brákarborg opnaði á nýjum stað sumarið 2022 í endurgerðu húsnæði. Framkvæmdin er Breeam vottuð og hlaut Grænu skófluna fyrir umhverfisvæna hönnun. Breeam-vottun þýðir að framkvæmdin skorar hátt á hinum svokölluðu ESG mælikvörðum sem samtök milljarðamæringa og stjórnmálamanna halda mjög á lofti og verðlauna sýndarmennsku umfram allt. 

Með alla þessa áherslu á dyggðir og umhverfisvernd kemur nánast ekki á óvart að hönnun burðarvirkis hafi leikið aukaatriði enda er það eina sem stendur á heimasíðu burðarþolshönnuðarins orðið „emptyness“ sem er furðulega góð lýsing á allri Brákarborgar-vegferðinni.

Þetta er mögulega alveg rosalega góður lærdómur. Í stað þess að keppast við allskyns vottanir sem engu skila nema kostnaði þá þurfi menn að leggja meiri áherslu á að vinna vinnuna sína: Byggja hús sem stendur, og auðvitað sleppa því að hlaða torfi ofan á þakið á því. 

Lærdómurinn nær jafnvel langt út fyrir byggingaframkvæmdir. Við ættum að vinna að því að leggja niður jafnlaunavottanir og hætta að hugsa um hringrásarhagkerfi sem kallar á sorpflokkun niður í öreindir, hætta að skerða orkuinnihald eldsneytis og skattpína hagkvæmar bifreiðir á meðan lúxusbifreiðir efnafólks eru niðurgreiddar. Hætta að reyna bjarga öllum fátækum heimsins með velferðarkerfi lands sem hefur færri en hálfa milljón íbúa. Yfirgefa Mannréttindadómstól Evrópu og Parísarsamkomulagið. 

Með öðrum orðum að taka reynsluna af Brákarborg alla leið: Hætta dyggðaflöggun og snúa aftur til raunveruleikans þar sem hús standa, fólk fær að henda ruslinu í ruslatunnuna og bíllinn sýgur ekki í sig allt rekstrarfé heimila.

Er von í komandi kosningum? Varla.

En með tíð og tíma verða kannski nógu margir nógu þreyttir á vottunarvitleysunni og heimsfaraldursþvælunni til að eitthvað dragi úr hvoru tveggja.

Þungi af steypu og torfi meiri en þakið þolir

Athugasemdir

[Sigurður Kristján Hjaltested, 19.10.2024 kl. 14:57]

Flottur pistill Geir og svo sannur.

En vittu til. Þetta endemis rugl á bara eftir

að aukast. Sleikjuhátturinn við bullið er svo

mikill að erfitt er að sjá að það muni breytast.

Því miður.

[Grímur Kjartansson, 19.10.2024 kl. 15:06]

Byggingarreglugerðir virðast almennt vera illa hannaðar og virðast aldrei vera endurskoðaðar en í þessu tilfelli voru mistökin hugsanlega að þetta var flokkað sem "endurbygging"  þegar um var að ræða glænýja hönnun sem hefði þá þurft að minnsta kosti burðarþolsreikning

Píratar vilja banna allar auglýsingar tengdar olíu og skrúfa alveg fyrir innflutning alvöru bifreiða sem fyrst - án þess að nein lausn sé fyrir öðru

Svo ef þannig flokkar fá brautargengi í kosningunum þá er engin von

[Ásgrímur Hartmannsson, 19.10.2024 kl. 15:07]

Fólk þreytist aldrei á eigin heimsku.  Breytingar verða þegar það deyr úr elli.

[Geir Ágústsson, 19.10.2024 kl. 15:43]

Grímur,

Eitthvað var gert sem kallast "hönnunar burðarmannvirkis" samkvæmt heimasíðu Grænu skóflunnar, og það skrifa á fyrirtækið Arkamon ehf. sem var einu sinni með sæmilega vefsíðu en ekki lengur. 

Ef ég væri íbúi á eftirfarandi heimilisföngum þá myndi ég mögulega hafa smávegis áhyggjur:
Fyrri verk – ARKAMON

[Geir Ágústsson, 19.10.2024 kl. 15:58]

Sigurður, Ásgrímur,

Bjartsýni ekki ykkar viðhorf! En það skil ég fullkomlega. En fyrsta skrefið er hjá okkur sjálfum, næsta skref er að tala upphátt og það þriðja að reyna sannfæra aðra, ef menn nenna. 

[Helga Dögg Sverrisdóttir (IP-tala skráð) 19.10.2024 kl. 20:15]

Svo hlýtur leikskólinn að hafa regnbogavottun ofan á allar hinar vottanirnar. ;) 

[Geir Ágústsson, 20.10.2024 kl. 08:18]

Helga,

Já, mikil ósköp!

Starfsstaðir sem hafa hlotið Regnbogavottun | Reykjavik

Hefði átt að muna eftir þeirri þvælu líka. 

Brákarborg: Vottaður af öllu, nema burðarþolsútreikningum.