Regnbogafáninn snýr aftur

Á þessum árstíma fara gleðigöngurnar fram í borgum og bæjum. Þar fögnum við fjölbreytileikanum - því að við erum öll mismunandi, hneigjumst að mismunandi kynjum, veljum okkur mismunandi bólfélaga og lífsförunauta, klæðumst mismunandi og svona mætti lengi telja, en erum svo í raun bara fólk. Mismunandi fólk.

Lengi vel var regnbogafáninn tákn þessa fjölbreytileika. Hann er auðvelt að skilja. Litir regnbogans eru hvítt ljós sólar brotið upp í alla frumlitina. Regnbogafáninn táknar þannig mannkynið í öllum sínum fjölbreytileika. 

En skyndilega var þetta ekki nóg. Allt í einu fóru einstaka litir fánans að tákna einhvern ákveðinn hóp kynhneigðar eða smekks á klæðaburði og þá runnu litirnir hratt út enda er fjölbreytileikinn nánast óendanlegur - í raun nær hann alveg niður í hvern og einn einstakling (við erum öll einstök, ekki satt?). Þá þurfti að flækja málin og búa til nýja fána með þríhyrningum og einhverjum táknum krotuðum á hann. Úr varð eitthvað afskræmi sem enginn skilur. Ekki nóg með það - þeir sem flögguðu einhverju öðru en nýjustu útgáfunni af fánanum fengu skammir í hattinn. Myndin við þessa færslu er vitnisburður um það (tekin í fyrra).

En núna er eins og regnbogafáninn sé tekinn við aftur sem megintáknmynd fyrir fjölbreytileika mannsins. Er það ímyndun í mér? Furðulegi fáninn með þríhyrningunum er undantekningin frekar en reglan þar sem ég hef séð til. Gafst einhver upp á því að útskýra ekki-regnbogafánanna? Völdum við að snúa aftur til regnbogans því hann segir í raun allt sem segja þarf, og gerir það með einföldum hætti? 

Ef svo er þá fagna ég því. Regnboginn rúmar alla, líka miðaldra gagnkynhneigða hvíta karlmenn eins og mig. Hann inniheldur allt litrófið, líka liti sem sjást varla með berum augum. Hann hefði aldrei átt að víkja fyrir fánum sem eiga að þýða eitthvað en þýða í raun ekkert. 

Velkominn aftur, regnbogafáni!

Athugasemdir

[Helga Dögg Sverrisdóttir (IP-tala skráð) 18.8.2024 kl. 10:39]

Því miður er það ekki svo að regnbogafáninn sé tekin við. Víða í grunnskólum er trans-fánanum flaggað. Við kirkjur er trans-fáninn málaður til að fagna andlega veiku fólki sem berst við að finna sjálfsmynd sína.

Í trans-vikunni var þessum ljóta áróðursfána víða flaggað við búðir.

Einn nemandi sagði við mig; Veistu ég ætla aldrei að lita regnbogalitina það er búið að eyðileggja regnbogann. Bragð er að þá barnið finnur.

Læt fylgja mér krækju að áhugaverðum þætti, Transgenderism, Transhumanism, and Porn | Jennifer Bilek, Michelle Uriarau & Suzanne Vierling - YouTube

[Ingólfur Sigurðsson, 18.8.2024 kl. 16:53]

Heimdallur er vörður guðanna og Valhallar. Regnboginn er tákn um ormagöngin, en meðfram er regnboginn einnig tákn um hindranir á aðgangi helstefnujarða og helstefnumannkynja að Valhöll. Þess vegna er þessi helstefnujörð okkar og helstefnumannkyn án sambands við geiminn og æðri mannkyn, eins konar sóttkví. 

Hvað segir Fermi þversögnin?

Hin rétta merking regnbogans er margþætt. Regnbogann verður aldrei hægt að eyðileggja eða merkingu hans. Maður á að hafa Heimdall hinn heilaga í huga. 

[Loncexter, 18.8.2024 kl. 19:06]

Það má kalla syndsamlegt líferni; ,,fjölbreytileika" og ýmislegt annað, en á dómsdegi verður lítið tekið mark á útúrsnúningum og skilgreiningum.

Í stað þess að leiða fólk í sannleikann, er honum vandlega pakkað samann af fjölmiðlum, og stungið undir stól.

[Guðmundur Örn Ragnarsson, 19.8.2024 kl. 07:57]

Og Guð sagði: Þetta er merki sáttmálans, sem ég gjöri milli mín og yðar og allra lifandi skepna, sem hjá yður eru, um allar ókomnar aldir:

Boga minn set ég í skýin, að hann sé merki sáttmálans milli mín og jarðarinnar.

Og þegar ég dreg ský saman yfir jörðinni og boginn sést í skýjunum, þá mun ég minnast sáttmála míns, sem er milli mín og yðar og allra lifandi sálna í öllu holdi, og aldrei framar skal vatnið verða að flóði til að tortíma öllu holdi. (1. Mós. 9:12-15).

[Geir Ágústsson, 19.8.2024 kl. 15:19]

Regnboginn hefur vissulega tekið á sig ýmsar myndir í gegnum mannkyns- og trúarsöguna en í botninn er hann bara hvítt ljós að brotna upp í frumliti sína þegar það rekst á regndropa og er þannig í raun bara einn ósýnilegur geisli að sýna fjölbreytni sína í raun.

Og sem slíkur finnst mér hann vera frábært tákn um fjölbreytileika.

Án þess að það sé eitthvað tekið af regnboganum í öðrum túlkunum.

Og án þess að þvinga nokkurn til að hafa skoðanir á einstaka hlutum fjölbreytileikans, hvort sem menn tala um sköllótta eða þá með hár, mismunandi húðliti, gott fólk og slæmt, gagnkynhneigt eða samkynhneigt, rauðhærða og dökkhærða. 

Bara tákn sem minnir á fjölbreytileikann.

[Ingólfur Sigurðsson, 20.8.2024 kl. 13:31]

Geir, þú ert ágætlega réttlátur maður, en samt merkir ekki regnbogafáninn það sama fyrir alla, ekki fjölbreytileika.

Ef þú hefðir spurt fólk fyrir 40 árum hefði enginn talað um fjölbreytileika, enginn. Það er nútímatúlkun.

En samt, falleg og réttlát túlkun á gömlu tákni sem merkir miklu fleira. Ég get verið sáttur við það.