Ekkert er varanlegra en tímabundnar björgunaraðgerðir yfirvalda

Katrín Jakobsdóttir for­sæt­is­ráðherra segir þörf á að horfa til blandaðra leiða til að mæta kostnaði vegna náttúruhamfara á Reykjanesskaga. Aukin útgjöld ríkisins eru nauðsynleg á komandi tímabili. Í þessu felst meðal annars að hækka skatta, gera tímabundna skatta varanlega, halda áfram að vanrækja þá þjónustu sem fólk heldur að ríkisvaldið eigi að einbeita sér að, og margt fleira gott.

Á meðan er hælisleitendum keyrt í leigubílum á milli landshluta til að sækja ókeypis tannlækna- og heyrnatækjaþjónustu um leið og þeim er réttur vasapeningurinn sinn. Á vegum íslenska ríkisins eru í dag hópar embættismanna í Egyptalandi til að múta landamæravörðum til að hleypa fleiri hælisleitendum til Íslands og a.m.k. einn þingmaður í Úkraínu að berja þar í trommur stríðsreksturs í landamæradeilum tveggja ríkja vegna yfirráða yfir rússneskumælandi fólki sem fær aldrei að kjósa án þess að atkvæðunum sé hent í ruslið.

Á sama tíma fjalla samstilltir fréttatímar um ölvunarástand íslenskra unglinga í flugvél og hvaða fasteign fræga fólksins er til sölu.

Til að bæta gráu ofan á svart virðist svo vera hafinn undirbúningur fyrir að byrja aftur að sprauta fólk með mRNA svokölluðum bóluefnum. Í þessari frétt er fjallað um rannsókn sem á einhvern undraverðan hátt sýnir algjöra andstæðu gríðarlegs fjölda annarra rannsókna, sem er sú að mRNA svokölluðu bóluefnin séu örugg (ekki endilega að þau séu gagnleg, en örugg). Og það eftir litla 10 daga frá útgáfu þeirrar rannsóknar. Það mætti halda að blaðamenn séu að fylgjast með, en eru auðvitað bara að fá ábendingar um „réttar“ rannsóknir.

Ég tek ekki þátt í þessu bulli. Ég borga nokkurn veginn alla mína skatta til að forðast fangelsi en ég er farinn að banna læknum að sprauta börnin mín, merki engar myndir af mér með fánum og merkjum, lít á fréttir (að undanskildum íþróttafréttum og kannski veðurfréttum) sem afþreyingu frekar en upplýsingar, huga í engu að kolefnisfótspori mínu og finnst orðið „kvár“ ekki eiga að fá stig í orðaleikjum.

Hið opinbera veit að fátt er varanlegra en tímabundið neyðarástand. Veira, Úkraína, Ísrael. Hið eina raunverulega neyðarástand fyrir Íslendinga eru eldsumbrot en allir sjóðir eru tómir. Nýir skattar taka við. Öll neyðarástöndin halda áfram. Forgangsröðun er engin. Áfram gakk!

Komandi tímar kalla á útgjöld

Athugasemdir

[Ásgrímur Hartmannsson, 23.2.2024 kl. 21:10]

Hvar væru útlend hryðjuverkasamtök komin ef ekki væri fyrir öruggan stuðning íslenska ríisins?

Allir útigangsmenn landsins hljóta að vera stoltir.

[Guðmundur Ásgeirsson, 24.2.2024 kl. 00:25]

"Ekkert er varanlegra en tímabundnar björgunaraðgerðir yfirvalda" - nema þegar bönkum er bjargað á kostnað almennings. Slíkar björgunaraðgerðir verða tímabundnar þar til tekst að koma því sem bjargað var aftur úr almannaeigu í hendur einkaaðila. Þetta er að gerast núna.

[Geir Ágústsson, 24.2.2024 kl. 07:37]

Guðmundur,

Þessi svokallaða bankastarfsemi undir verndarvæng seðlabanka er auðvitað bara ein stór svikamylla. Sem betur fer eru að myndast raunverulegir valkostir við banka víða sem munu keyra viðskiptalíkan bankanna endanlega í þrot. En stundum þarf svolitla kreppu til að hraða hlutunum.

Persónulega finnst mér ekki að stjórnmálamenn eigi að koma nálægt rekstri banka. En þeir eiga heldur ekki að standa í vegi fyrir nýsköpun á sviði peninganotkunar. Núna gera þeir bæði.