Forseti COP28 fjárfestir áfram í jarðefnaeldsneyti

Fyrirsögnin er er fengin frá frétt RÚV og vakti athygli mína. Ekki af því það kemur mér á nokkurn hátt á óvart að Arabarnir ætli sér að halda sínu striki og draga olíu og gas úr jörðu sem rennur svo út eins og heitar lummur til allra heimshorna, þar á meðal Evrópu. Ekki af því mér finnist skrýtið að forseti COP28, sem um leið er forstjóri olíufélags, tilheyri kjaftaklúbbi sem tali um eitt á meðan raunveruleikinn þýði eitthvað annað. Ekki af því ég sjái eitthvað óvænt í mótsögn í orðum og gjörðum.

Nei, fyrirsögnin vakti athygli mína af því hún er sett fram í hneykslunartón sem um leið bendir til veruleikafirringar blaðamanns og fjölmiðils.

Sjálf fréttin styður slíka túlkun:

Sultan al Jaber, stjórnandi ríkisolíufélags Sameinuðu arabísku furstadæmanna, ætlar að halda áfram að fjárfesta í olíu- og gasframleiðslu. Örfáir dagar eru síðan hann var forseti loftslagsráðstefnu Sameinuðu þjóðanna, COP28, þar sem hann fagnaði samningi um samdrátt í framleiðslu jarðefnaeldsneytis. ... 

Hann segir fyrirtæki sitt ætla að halda áfram að vera „ábyrgur og áreiðanlegur birgðasali lág-kolefnis orku,“ og heimurinn þurfi á slíkri orku að halda fyrir lægsta mögulega verð. Hann fullyrðir að kolvatnsefni ríkisolíufélagsins gefi frá sér minna kolefni þar sem það sé sótt á skilvirkari hátt og lekinn út frá því minni en annars staðar.

Það sem blaðamaður telur vera mótsögn forstjórans er í raun viðskiptavit. Hann sér að Evrópumenn og Bandaríkjamenn eru búnir að lofa því að opna ekki fleiri olíu- og gaslindir. Hvað þýðir það? Jú, að hans framleiðsla verður í aukinni eftirspurn. Hann veit alveg að olía og gas verður uppistaðan í orkuöflun mannskyns í einhverja áratugi í viðbót. Ef þessi hráefni fá að vera áfram í jörðinni í Evrópu þá þurfa þau að koma upp úr henni hjá honum.

Kannski RÚV hefði átt að orða fyrirsögnina öðruvísi en halda að öðru leyti texta fréttarinnar óbreyttum. Ein heppileg fyrirsögn gæti verið:

Við létum plata okkur! Núna þurfum við að fara með betlistafinn til Arabanna

Eða:

Vesturlönd skrifa enn og aftur undir lífskjaraskerðingu til styrktar arabískum prinsum

Nú fer reyndar að styttast í að Vesturlönd þurfi að snúa af þessari braut. Þetta tekur tíma. Nýir stjórnmálamenn þurfa að taka við af þeim sem hafa selt sálina til kolefniskirkjunnar. Forstjóraskipti þurfa að eiga sér stað hjá fyrirtæjum sem hafa eytt svimandi fjárhæðum í gagnlausar kolefnisaðgerðir. Almenningur má samt alveg fara að vakna og koma einhverju af stað: Hætta að borga fyrir svokallaða kolefnisjöfnun, byrja að kaupa plaströr á svarta markaðinum og mótmæla stighækkandi kostnaði við sorphirðu, til að byrja með.

Nema þér þyki svona vænt um arabísku prinsana. Þú um það.

Athugasemdir

[Ragnhildur Kolka, 17.12.2023 kl. 13:06]

Það eru ekki bara oliufurstarnir sem átta sig á stöðunni. Sildarverksmiðurnar, kannski lika álverin😇, birgja sig nú upp af díselstöðvum. 

[Guðmundur Ásgeirsson, 17.12.2023 kl. 16:34]

OPEC ríkin hafa samráð um framleiðslustýringu á jarðefnaeldsneyti sem væri líklega kolólöglegt ef það félli undir vestræn samkeppnislög. Með því að stýra framboðinu geta þau í raun stýrt heimsmarkaðsverðinu.

Það er sennileg kenning að þau muni halda áfram að stýra sinni framleiðslu þannig að verð á olíu muni verða samkeppnishæft við aðra (þ.m.t. grænni) orkugjafa, eins lengi og þau geta haldið það út. Flest þessara ríkja hafa í raun litla sem enga aðra valkosti til að viðhalda stöðu sinni í heimshagkerfinu.

[Geir Ágústsson, 17.12.2023 kl. 17:32]

Ragnhildur,

Þeir sem hafa lent í orkuskorti bregðast auðvitað við eða loka sjoppunni og flytja. Kannski var glapræði fyrir fiskimjölsverksmiðjurnar að veðja svona getu Íslendinga til að framleiða og dreifa raforku. Það gæti tekið langan tíma að laga það orðspor.

[Geir Ágústsson, 17.12.2023 kl. 17:45]

Guðmundur,

Hérna er um algjört sjálfskaparvíti að ræða þegar Vesturlönd tala um að vilja ekki fjárfesta í olíu og gasi í Afríku og víðar.

Rakst annars á þessa mjög fróðlegu grein, ef ekki væri bara fyrir fyrstu efnisgreinar hennar:

Why banning financing for fossil fuel projects in Africa isn't a climate solution (theconversation.com)

[Guðmundur Ásgeirsson, 17.12.2023 kl. 18:01]

Það er líka hluti af vandamálinu að ekki sé nægum fjármunum varið í þróun annarra og mögulega betri orkugjafa, vegna þess hvað stórir hagsmunir liggja að baki því að slíkir valkostir leysi ekki olíuna af hólmi.

[Geir Ágústsson, 18.12.2023 kl. 07:54]

Guðmundur,

Það er mjög fróðlegt að skoða fyrirsagnirnar hér til að sjá hvað er að gerast þegar kemur að valkostum við jarðefnaeldsneyti (og vind og sól):

Nuclear Power News | OilPrice.com