Öll þessi tilgangslausu hagsmunasamtök

Ég rakst á áhugaverðan pistil frá hinu danska félagi bifreiðaeigenda þar sem bent er á hvernig mörg dönsk sveitarfélög eru að reyna brúa hallarekstur sinn með því að snarhækka bílastæðagjöld og auka við gjaldskyldu. Slíkt er ólöglegt samkvæmt dönskum lögum og sveitarfélög með svona áform gerð afturreka.

Þetta kalla ég raunverulega hagsmunagæslu fyrir hönd félagsmanna!

Nú er mikið kvartað undan endalausum ágangi Reykjavíkur í vasa bifreiðaeigenda. Gjaldsvæði eru stækkuð, tímabil gjaldskyldu lengd og gjöldin hækkuð. Eru engin lög á Íslandi sem taka fyrir hendurnar á sveitarfélögum þegar þau beita sér svona? Þegar þau rukka þjónustugjöld án þess að veita þjónustu? Þegar þau segjast vera að bæta bílastæðanýtingu en eru í raun bara að reyna fjármagna óráðsíu?

Sennilega ekki. Því þá væru auðvitað íslensk hagsmunasamtök bifreiðaeigenda, neytenda, heimila og miðbæjarbúa búin að spyrna við fótum, ekki satt?

Eða hvað? 

Ég renndi hratt yfir heimasíður tveggja hagsmunasamtaka: Neytendasamtakanna og Hagsmunasamtaka heimilanna. Þar er sumt nothæft en flest ekki. Hvergi rekst ég á gagnrýni á skattheimtu á neytendur og heimilisfólk sem stóran útgjaldalið sem yfirvöld gætu alveg lækkað. Hvergi er talað um bankaskatta sem byrði á lántakendum. Hvergi eru yfirvöld gagnrýnd fyrir að framleiða verðbólgu, en þeim mun meira þegar þau reyna að ná henni niður. Mikið er atast í fyrirtækjum í bullandi samkeppnisumhverfi. Það er djúpt á samanburði á verðum og þjónustu. Þegar þau halda málþing þá er passað vel upp á að ekkert mótvægi skapist við áróður þeirra. 

Og vitaskuld ná þessi samtök engum árangri í raun, að því er mér sýnist.

Persónulega finnst mér að svona samtök eigi að reyna verjast atlögunni að neytendum og heimilum með því að ráðast á ræturnar: Ræða skattana, íþyngjandi regluverkið og samkeppnishindranir hins opinbera. 

Skoða orsakir, ekki afleiðingar.

Grafa upp ræturnar, en ekki bara klippa laufblöðin.

Væru það ekki fín hagsmunasamtök?

Leiðrétting: Hagsmunasamtök heimilanna hafa svo sannarlega staðið vaktina sé ég eftir ábendingu og nánari eftirgrennslan. Ég dreg til baka allar fullyrðingar um að svo sé ekki. Vonandi skilja forsvarsmenn hins vegar þann punkt að það blasi ekki endilega við eftir stutta heimasókn á heimasíðu samtakanna.

Athugasemdir

[Guðjón E. Hreinberg, 8.10.2023 kl. 14:58]

Það er engin samræða á landinu okkar um ranglög og rányrkjuskatta; eða rekjanleg stjórnlagabrot hvað það varðar. Sem er sorglegt, því ef Elítan kemst upp með að tala endalaust til okkar og aldrei við okkur, þá er það því við ræðum ekki saman.

[Ásgrímur Hartmannsson, 8.10.2023 kl. 16:59]

Þessi "hagsmunasamtök" okkar eru bara það sem er kallað "controlled opposition" þarna úti.

Gervi.

[Guðmundur Ásgeirsson, 9.10.2023 kl. 18:05]

Sæll Geir.

Ég má til með að leiðrétta þig aðeins.

Hagsmunasamtök heimilanna hafa gagnrýnt framleiðslu stjórnvalda (og banka) á verðbólgu af mikilli hörku. Við vorum búin að reyna að hrópa aðvörðunarorðin til stjórnvalda í þrjú ár áður en verðbólgan fór yfir markmið, en því miður hlustuðu þau ekki og leyfðu þessu að gerast.

Samtökin hafa líka gagnrýnt bankana harðlega fyrir að skila lækkun bankaskattsins ekki til neytenda með bættum viðskiptakjörum.

Svo er spurning hvað er hægt að ætlast til mikils af sjálfboðaliðasamtökum sem búa ekki yfir miklu fjármagni? Það er ekki auðvelt að halda slíkri starfsemi úti og þegar fjárráð og mannskapur eru takmörkuð auðlind er nauðsynlegt að forgangsraða verkum. Því miður er ekki hægt að gera allt sem maður myndi kannski vilja, en að því sögðu er öllum sem vilja leggja baráttunni lið með einhverjum hætti tekið fagnandi.

Ásgrímur.

Það er ekkert "gervi" við Hagsmunasamtök heimilanna. Þau fáu sem bera starfsemi þeirra uppi af mikilli óeigingirni eru bara venjulegt fólk eins og ég og þú sem berst fyrir góðum málstað í þágu almennings. Við erum svo sannarlega "opposition", en ekki "controlled" í neinum annarlegum skilningi eins og þú virðist vera að vísa til. Stjórn samtakanna er einfaldlega í höndum lýðræðislega kjörinna fulltrúa félagsmanna og aðild að samtökunum er öllum frjáls sem vilja taka þátt.

[Geir Ágústsson, 9.10.2023 kl. 19:23]

Sæll Guðmundur,

Ég bætti við leiðréttingu við færsluna eftir þína athugasemd og biðst afsökunar á ósanngjarnri umfjöllun. 

Ég sé enga ástæðu fyrir sömu leiðréttingu í formi Neytendasamtakanna. 

[Guðmundur Ásgeirsson, 9.10.2023 kl. 20:08]

Þakka þér fyrir Geir.

Það er svosem alveg rétt að Hagsmunasamtök heimilanna hafa ekki verið mikið að fjalla um skattamál almennt, því fókusinn er ekki beinlínis þar heldur á húsnæðismál og neytendavernd í tengslum við fjárhagslegar skuldbindingar vegna húsnæðis (svo sem lánasamninga og leigusamninga). Helsta tengingin á því við skattamál eru gjöld sem eru lögð á húsnæði og húsnæðiskaup. Það eru fyrst og fremst fasteignaskattar og stimpilgjöld og í báðum tilvikum hafa samtökin tekið skýra afstöðu. Við höfum alltaf verið á móti stimpilgjöldum á íbúðarhúsnæði til eigin nota, því húsaskjól er mannréttindi og þau á ekki að skattleggja. Við höfum líka verið á móti beintengingu fasteignaskatta við húsnæðisverð því sá gjaldstofn hefur hækkað langt umfram almennt verðlag, launaþróun og slíka mælikvarða. Þá má nefna vaxtabætur sem eru hluti af skattkerfinu en við berjumst fyrir því að húsnæðislánakjör séu viðráðanleg fyrir alla svo að niðurgreiðslur á vöxtum verði óþarfar.