Vaxtalækkanir

Vaxtalækkanir eru framundan. Töluverðar.

Ástæður: Gjaldmiðillinn að styrkjast, aukinn fjármálastöðugleiki og minni óvissa.

Í Rússlandi.

Að sögn rússneska seðlabankans. 

(Vestræna útskýringin er sú að rússneski seðlabankinn sé að lækka vexti til að sporna við kreppu.)

Aðrir hafa bent á að iðnaðarframleiðsla sé líka á uppleið í Rússlandi. Vestrænir blaðamenn í Rússlandi telja að líf almennings sé að mestu eðlilegt og birta myndir af troðfullum verslunum og fólki í rólegheitunum að kaupa í matinn eða kippa nokkrum Carlsberg-bjórum með heim.

Maður spyr sig: Af hverju að kafsigla evrópskum neytendum í orkureikningum og verðbólgu þegar áhrifin eru nákvæmlega engin?

Af hverju að smjaðra fyrir prinsum og furstum og betla meiri olíu frá þeim svo þeir hafi efni á nýjum bandarískum vopnum til að beita gegn eigin þegnum og nágrönnum sínum?

Til að refsa Pútín? Honum gæti ekki verið meira sama. Hann er umkringdur kaupendum að ódýrri orku og hráefnum.

Er áætlun Evrópubúa sú að láta úkraínska hermenn stúta sér í bílförmum með vestræn vopn í hendi? Telja þeir í alvöru að allar þessar viðskiptaþvinganir skipti máli og muni stöðva átökin?

Kannski óheimilar spurningar. Ég þarf kannski að snúa mér aftur að meginstefinu:

• Engir nýnasistar í Úkraínu sem starfa undir verndarvæng yfirvalda
• Engin morð á saklausum borgurum í austurhluta Úkraínu seinasta áratug eða þar um bil
• Engin vafasöm vensl milli yfirvalda og ólígarka Úkraínu og Bandaríkjamanna með áhrif innan bandarískra stjórnmála
• Pútín er manna verstur og að auki brjálaður og taugaveiklaður
• Ekkert að sjá hérna, nema rússneska hermenn

Afsakið óhlýðnina. 

Athugasemdir

[Kristinn Bjarnason (IP-tala skráð) 2.5.2022 kl. 16:18]

Geir, þú ert búinn að standa þig ótrúlega vel í að koma með skynsamar ábendingar um hvað er að gerast raunverulega í kring um okkur og ekki biðjast afsökunar á því. Stjórnmálamenn hafa siglt með okkur að feigðarósi undanfarin ár án teljandi mótspyrnu. Þetta Úkraínu stríð er allt hið undarlegasta mál.  Rússar eru þvingaðir út í horn og eiga ekkert annað eftir en að slá frá sér en þá eru þeir orðnir sökudólgarnir með valdasýki sem eru að reyna að koma upp gömlu sovétríkjunum til heimsyfirráða.

Þetta hljómar allt mjög hlægilega en gamanið er farið að kárna. Vesturlönd bera keim af stjórnleysi og frekjukasti. Það eru settar trylltar viðskiptaþvinganir á Rússa með þeim afleiðingum að hagur vænkast verulega hjá Rússum en kaupmáttur hrynur á vesturlöndum. Mér finnst eins og brennuvargar hafi komist yfir eldspýtur.

[Geir Ágústsson, 2.5.2022 kl. 19:29]

Kristinn,

Það er maðkur í mysunni. Nú vil ég ekki einu sinni meina að ég sé að koma með skynsamar ábendingar, bara væflast aðeins frá þrönga einstiginu sem fjölmiðlar og yfirvöld (atvinnuveitendur fjölmiðla, að því er virðist) benda á. Finnst Pútín vera harðneskjulegur einræðisherra sem virðist mannslíf lítils en Úkraína vera forarpyttur spillingar og gróðrarstía ofbeldis og haturs sem bitnar á hluta þegna landsins. Og svo koma dýrðlingarnir frá Evrópu og þykjast vita hver er vondi kallinn - þeir sömu og studdu slátranir á almennum borgurum í Írak, lögðu Afganistan í rúst og velja og hafna hver má verða ríkur og hver ekki. Kínverjar kannski, Afríkumenn ekki.

En takk fyrir hrósið.

[Theódór Norðkvist, 3.5.2022 kl. 13:01]

Hef enga skoðun á vaxtalækkunum, en ég er búinn að finna fleiri nasista fyrir þig. Astrid Lindgren, Ingvar Kamprad (stofnanda IKEA) og Ingmar Bergman leikstjóra.

https://www.svt.se/nyheter/utrikes/folkkara-kanda-svenskar-anklagas-for-att-vara-nazister-i-rysk-propaganda 

Byggt á áreiðanlegum heimildum frá Moskvu. Býst við loftárásum rússneska hersins hér á Skáni á hverri stundu, því ég er ekki viss um að Pútín viti að þessir nasistar eru dauðir.

[Geir Ágústsson, 3.5.2022 kl. 13:05]

Theodór,

Hefur þetta fólk látið ljósmynda sig fyrir framan nasistafána og kyssandi myndir af Hitler og talað fyrir "hreinsunum" af "óhreinum" í Úkraínu?

Gæti verið, en vil bara vera viss.

[Theódór Norðkvist, 3.5.2022 kl. 13:40]

Heldurðu ennþá að það sé meira mark takandi á heimildum frá Kreml, en þessari sem ég var að vitna í?

Ertu með einhverjar (ófalsaðar) heimildir fyrir þessu sem þú nefnir? Annars hef ég margoft sagt að það er sjálfsagt mál að rannsaka nýnasisma í Úkraínu sem annars staðar EFTIR AÐ ÞESSARI NASISTAÁRÁS PÚTÍNS HEFUR VERIÐ HRUNDIÐ og búið að gera upptækar eignir ólígarkanna og láta andvirði þeirra renna til uppbyggingar úr rústunum sem rús(t)sneski herinn skildi eftir sig.

Ef það myndi kvikna í húsinu þínu, þá yrði tæplega það fyrsta sem þú myndir gera að stofna nefnd til að rannsaka upptök eldsins og síðan þegar húsið væri brennt til ösku myndir þú fara að huga að slökkvistarfi.

Þú myndir væntanlega byrja á að slökkva eldinn og bjarga fjölskyldu þinni. Sömuleiðis verður að slökkva elda þessarar hryðjuverkaárásar og svo má athuga með eftirmálana. Þó ætti fyrsta verkið eftir á, að vera að leysa upp hryðjuverkasamtökin sem kallast The Russian Federation og byrja á hernum.

[Theódór Norðkvist, 3.5.2022 kl. 13:41]

Fyrsta málsgrein - leiðrétting:

Heldurðu ennþá að það sé meira mark takandi á öðrum heimildum frá Kreml, en þessari sem ég var að vitna í?

[Geir Ágústsson, 3.5.2022 kl. 20:16]

Theódór,

Undanfari viðburða skiptir máli til að setja viðburði í samhengi. Ekki til að afsaka gjörðir eins né neins, ekki til að klæða púka í englabúninga, ekki til að gera góða kalla að vondum og öfugt, heldur til að skilja, og þegar er búið að skilja vandamálið er hægt að leysa það.

En "einhver" vill ekki að við skiljum ástandið í Úkraínu seinustu mörgu ár og þar með leysa það. Miklu frekar er eins og ákveðin öfl vilji að Úkraína sé í proxy-stríði við Rússland um langa hríð, á kostnað óbreyttra borgara og óreyndra hermanna.

Öllum var skítsama um þá Þjóðverja sem lokuðust inni í Sovétríkjunum sálugu við lok seinni heimsstyrjaldar. Öllum er skítsama um óbreytta borgara sem er verið að mylja í duft í Jemen. Öllum er sama um hvíta bændur í Suður-Afríku. Öllum er sama um innfædda í Ástralíu. Öllum er sama um múslíma í vesturhluta Kína.

Og öllum er sama um voðaverk nýnasista í Úkraínu seinustu 8 ár.

Ef yfirvöld í Mexíkó væru að leika sér að því að þjarma að enskumælandi fólki með rætur til Bandaríkjanna þá væri búið að fletja Mexíkó til jarðar.

En að veita svolitla vissu fyrir því að rússneskumælandi íbúar í austurhluta Úkraínu séu ekki beittir ofbeldi og drepnir með pyntingum: Ómögulegt.

Er innrás rússneska hersins svarið? Nei, og ákvörðun sem kostar mannslíf, þjáningar og hörmungar. Hefði verið hægt að feta annan farveg? Já, örugglega, en mig grunar að það hafi markvisst verið unnið að því að koma á nákvæmlega þessari innrás og gera að einu átökunum í heiminum sem skipta máli.

[Theódór Norðkvist, 3.5.2022 kl. 23:44]

Ég er í sjálfu sér ekkert ósammála þér hvað það varðar að setja viðburði í samhengi. Eina sem ég set spurningarmerki við er tímapunkturinn.

Það er t.d. oft talað um að Versalasamningurinn hafi haft sitt að segja þegar rætt er um hvað kom seinni heimsstyrjöldinni af stað og valdatöku Hitlers. Margir hafa talið það af hinu illa að láta þjóðir og heri þeirra borga fyrir þá eyðileggingu sem þeir ollu, þó ég efist um það.

Ég hef samt aldrei litið á þannig umræður sem réttlætingu á voðaverkum Hitlers. Ég er heldur ekki viss um að umræður af því tagi hafi verið ofarlega í huga fólks, þegar Evrópa og í raun allur heimurinn logaði stafnanna á milli í eldum seinni heimsstyrjaldarinnar.

Ég er ekki sammála þér að öllum sé sama um öll þessi tilvik voðaverka sem þú nefnir og þau verðskulda að fá meiri athygli. Vandamálið er að BNA og ESB hafa meiri rétt til að ráða málum í sínum heimshlutum en í fjarlægum heimsálfum eins og Asíu og Afríku.

Athugaðu svo vel að lokum eitt.

Öll afskipti af svona átökum krefjast hervalds og gríðarlega sterks hervalds. Svo spila viðskiptahagsmunir auðvitað inn í. BNA er með stærsta her í heimi, en ekki einu sinni þeir gætu staðið í styrjöldum / átökum á fjórum eða fimm vígstöðvum.

Ég er samt viss um að vegna nærveru flota BNA í Austurlöndum, hefur Kína ekki lagt í að gleypa Tævan. Þeir fylgjast vel með hörmungunum í Úkraínu og ef ef Vesturlönd renna á rassinn í því máli, þá munu Kínverjar án efa ráðast á Tævan og treysta á aumingjaskap Vesturlanda.

Nógu mikið hefur verið drullað yfir BNA fyrir að láta til skarar skríða þegar þeir hafa gert það og þar á meðal þú, t.d. í Írak, Afganistan og Líbýu. Nú allt í einu ertu farinn að gagnrýna BNA fyrir að skipta sér ekki af. Ég er ekki að segja að allt sem BNA gerði í þessum löndum hafi verið rétt, en hugsaðu út í þetta.