Svo lögin séu uppfyllt, já?

„Það vantar hundruð leikskólakennara til starfa svo lög um leikskóla séu uppfyllt“ segir formaður Félags stjórnenda leikskóla. 

Þetta eru athyglisverð ummæli.

Formaðurinn segir ekki að það vanti hundruð leikskólakennara til að reka leikskólana, sjá um börnin eða tala við foreldrana. Það vantar hundruð til að uppfylla lögin. Og þetta tvennt er ekki endilega það sama. 

Tæknilega þýðir þetta að það vantar hundruð manns með þá menntun og þau réttindi sem lögin krefjast svo fólk geti starfað á leikskóla, a.m.k. til lengri tíma.

Eflaust væri hægt að moka allskonar fólki inn í leikskólana svo ekki þurfi að senda börn heim. Þá gæti Gunna, 18 ára menntaskólanemi, e.t.v. tekið síðdegisvakt eftir að skóla lýkur, en Siggi, 25 ára háskólanemi, tekið morgunvaktina á þeim dögum þar sem hann er ekki í fyrirlestrum. Heimavinnandi mæður gætu tekið miðjan daginn á meðan þeirra eigin börn eru á öðrum leikskóla eða í skóla. Öll vinna yrði vitaskuld unnin undir handleiðslu þrautþjálfaðra leikskólakennara sem væru alltaf til staðar fyrir börnin og þekkja þau út og inn, en sjálf vinnan - að leika við börnin, fóðra þau, skeina þeim og sinna þeim, færi fram af her fólks með allskonar bakgrunn.

En nei, þetta eru ekki fyrirmæli laganna. Lögin segja að leikskólakennari í dag skuli vera öðruvísi menntaður og þjálfaður en sá fyrir 20 árum. Hann þarf að hafa háskólapróf og kunna á króka og kima skrifræðisins hjá hinu opinbera. 

Auðvitað var það alla tíð markmið leikskólakennara að skapa skort á starfsfólki á leikskólum með því að bæta rækilega í lagaskyldur á menntun, þjálfun og réttindi. Það er eina leið opinberra starfsmanna til að bæta kjör sín. Fórnarlömbin hlaðast hins vegar upp - börn sem fá ekki vist og foreldrar sem komast ekki í vinnuna.

Væri kannski ráð að endurskoða lögin svo leikskóla megi manna?

Vantar hundruð leikskólakennara

Athugasemdir

[Halldór Egill Guðnason, 16.9.2016 kl. 14:12]

Þessi vitleysa endar sennilega með því að það vera fleiri leikskólakennarar á barnaheimilumum en börnin. Í dag eru 3-5 börn á hvern starfsmann, skv því sem lesa má af fréttum, undanfarna daga. Hefði haldið að það væri í flestum tilfellum nóg, en svo virðist alls ekki vera, samkvæmt lögunum. Góðar stundir, með kveðju að sunnan.