Hærri skatthlutföll = minni skattheimta?

Þegar horft er framhjá tekjum vegna sölu eigna er afkoma ríkissjóðs á fyrri helmingi þessa árs 2,8 milljörðum undir tekjuáætlun fjárlaga. Tekjur vegna skatta og tryggingagjalda eru einnig undir markmiði fjárlaga.

 Það kann að koma einhverjum á óvart að hækkandi skatthlutföll leiði til minnkandi skattheimtu.

 Dæmi:

Samkvæmt bráðabirgðatölum frá í október er nú spáð um 4 milljarða króna halla en það er tæpum milljarði meira en áætlað var fyrir nokkrum vikum.

Þetta stafar einkum af minnkandi tekjum af söluskatti, tollum og öðrum veltusköttum, jafnframt því sem innheimtan sjálf hefur gengið verr upp á síðkastið sem er ákveðin vísbending um vaxandi greiðsluerfiðleika fyrirtækja.

 Þessi lýsing er tekin úr Tímanum, 11. nóvember 1988, þegar linnulausar skattahækkandi þáverandi fjármálaráðherra (Ólafs Ragnars Grímssonar) í þáverandi vinstristjórn virtust engum árangri ætla skila. Ólafur réðist á hallarekstur ríkissjóðs í dalandi hagkerfi með skattheimtu á alla línuna, og viti menn: Vont varð verra!

Vinstrimenn í dag virðast ekki hafa lært neitt af þessu. Skattmann er mættur aftur!

Eignasala heldur ríkissjóði uppi

Athugasemdir

[Haraldur Hansson, 19.8.2010 kl. 11:43]

Það hljómar svo "rétt" að með því að hækka skatta aukist tekjur ríkissjóðs. En það bara virkar ekki þannig.

Það eina sem getur aukið tekjur ríkisins er aukin verðmætasköpun í samfélaginu. Versti óvinur verðmætasköpunar er atvinnuleysi. Eitt af því sem getur aukið atvinnuleysi eru hærri skattar á atvinnurekstur.

Það er fróðlegt að skoða Hauser's Law í þessu samhengi.

[Geir Ágústsson, 19.8.2010 kl. 12:30]

Athyglisvert.

Annað sem mér þótti athyglisvert á sínum tíma var: "Eitt af því sem efnahagslegt frelsi virðist ekki leiða til er að auka hlutdeild þeirra 10% fátækustu af heildarkökunni. Sú skipting virðist býsna þrá [svipað hlutfall, sama hvort sem mikið eða lítið efnahagslegt frelsi sé til staðar], og e.t.v. mætti hugsa með sér að það sé ósköp lítið hægt að gera til að auka hlutdeild þeirra fátækustu af heildarkökunni. Kannski að sóknin eftir efnahagslegri jafnstöðu sé hlaup inn í blindgötu."

http://blogg.frjalshyggja.is/archives/2005/09/efnahagslegt_fr.php

[Haraldur Hansson, 20.8.2010 kl. 02:13]

Þetta er áhugaverð tölfræði. En hér er önnur pæling:

Í skýrslu Rannsóknarnefndar Alþingis eru nokkrir embættismenn sakaðir um vanrækslu og/eða afglöp í embætti. Menn bera af sér sakir, allir nema einn. Geir H. Haarde játaði að það hefðu verið "mistök í efnahagsstjórn" að lækka skatta á þenslutímum.

Með lækkun skatta er hægt að örva hagkerfið, eins og Rannsóknarnefndin bendir á. Það er óæskilegt á þenslutímum, þótt ekki sé þar með sagt að það hafi áhrif á tekjuöflun ríkisins.

ALLIR voru sammála niðurstöðu Rannsóknarnefndar. Samfylkingin og Vinstri græn tóku undir gagnrýnina, sem Geri samsinnti.

Svo kemur það skrýtna.

Á sama hátt er hægt að kæla hagkerfið með hækkun skatta. Að gera það á samdráttartímum eru sömu "mistök í efnahagsstjórn" þótt með öðrum formerkjum sé.

Nú eru samdráttartímar og á síðast ári hækkaði ríkisstjórnin skatta á miðju ári og svo aftur um áramót. Svo kom skýrsla Rannsóknarnefndar og allir komu auga á mistökin og gagnrýndu þau. Samt heldur ríkisstjórnin áfram að boða enn meiri skattahækkanir. Enn meiri mistök! Og stærir sig af því.

Það er ekki heil brú í þessu.

[Geir Ágústsson, 20.8.2010 kl. 08:07]

Ég ætla að leyfa mér að andmæla því að skattalækkanir séu einhvern tímann slæmar (á meðan þær valda ekki hallarekstri og skuldasöfnun hjá ríkissjóði, sem ætti þá að lækka útgjöld sín frekar en fresta skattalækkunum).

Þetta viðhorf mitt útskýri ég betur hér og segi m.a.:  "Skattalækkanir á tímum stöðugs peningamagns hafa engin áhrif á almennt verðlag. Ríkið eyðir minna, og almenningur eyðir meira. Færri kúlupennar eru keyptir í Stjórnarráðið, á meðan fleiri foreldrar hafa efni á að senda börn sín í sumarbúðir. Færri ráðherrar fara á fínar ráðstefnur í útlöndum, en fleiri Íslendingar komast í sumarbústað í fríinu sínu."

En hitt er rétt, að samkvæmt "viðteknum" skoðunum í anda Keynes, þá voru skattalækkanir þess tíma "mistök" og skattahækkanirnar í dag líka.  Þeir sem gagnrýndu skattalækkanir þess tíma, en framkvæma svo skattahækkanir í dag, eru í augljósri mótsögn við sjálfa sig. Og það er vert að benda á.

[Sigurður Haraldsson, 20.8.2010 kl. 09:06]

Sælir með sama áframhaldi stefnum við beina leið á hausinn!

[Jon (IP-tala skráð) 21.8.2010 kl. 23:22]

Sæll.

Ég er alveg sammála þér.

Vandinn er auðvitað sá að Sjálfstæðisflokkurinn er ekki hægri flokkur heldur miðjuflokkur, þess vegna fannst honum kannski í lagi að þenja ríkið út um þriðjung að raungildi frá 1999-2007 (ef ég man rétt) og að bjarga illa reknum bönkum sem voru alltof stórir. Við þurfum að fá nýja þingmenn fyrir flokkinn, þeir sem nú sitja á þingi þora ekki að opna munninn þó það sé þeirra starf. Í hvert skipti sem stjórnarliðar opna munninn gefa þeir á sér höggstað en ekkert heyrist frá stjórnarandstöðunni?!