Horft í gegnum nálarauga

Hún er þröng sú heimsmynd sem hagsmunafélög ákveðinna hópa hafa að leiðarljósi í ályktanaskrifum sínum. Skrifað er út frá þröngum hagsmunum meðlimanna, og öllu öðru sópað til hliðar.

Ágætt dæmi sést hér í ályktun Starfsmannafélags Reykjavíkurborgar. Þar segir meðal annars (og hafa skal í huga við lestur að það eru skattgreiðendur sem borga brúsann):

... unnið verði í nánu samráði við starfsmenn og stéttarfélög að finna aðrar leiðir en launaskerðingu og uppsagnir til að hagræða í rekstri.

 Eins og hverjar? Núna þurfa allir að skera niður, bæði einstaklingar og fyrirtæki. Nema hið opinbera ætli sér að vera eini vaxandi útgjaldaliður einstaklinga og fyrirtækja, þá þarf það að skera niður. Laun eru einn af stóru útgjaldaliðum hins opinbera. Því þarf að skera niður þar.

Margar stofnanir eru undirmannaðar vegna niðurskurðar um leið hafa verkefni aukist og víða gengið á kjör starfsmanna.

Hið sama er hægt að segja um nánast öll fyrirtæki landsins. Í hverju fellst þessi "undirmönnun"? Hverjir aðrir en ósvífnir opinberir starfsmenn leyfa sér að skjóta svona á atvinnurekanda sinn á opinberum vettvangi? Miklu nær væri að einkavæða þessar undirmönnuðu stofnanir, eða a.m.k. bjóða út rekstur þeirra, og sjá hvort ekki takist bæði að skera niður og sinna umsömdum verkefnum, án þess að starfsmenn séu kvartandi í fjölmiðla yfir kjörum sínum - nokkuð sem nánast öllum öðrum en meðlimum BSRB dytti ekki í hug að gera.

... en þar er því beint til stjórnar félagsins og stjórnar BSRB að þær beiti sér fyrir því að skoðað sé í fullri alvöru að afnema verðtryggingu. 

 Þetta er frumleg tillaga hjá stéttarfélagi því gjarnan eru þær launahækkanir sem stéttarfélögum tekst að "semja um" byggðar á nákvæmlega því að verðtryggja kaupmátt meðlima sinna hið minnsta! Hver ætli samningsgrundvöllur BSRB yrði í fjarveru "verðtryggingar"?

Einu sinni sem oftar vil ég vitna í hinn snjalla Henry Hazlitt sem sagði um "atvinnusköpun" hins opinbera svo frægt varð á sínum tíma (feitletrun mín):

 Therefore, for every public job created by the bridge project a private job has been destroyed somewhere else. We can see the men employed on the bridge. We can watch them at work. The employment argument of the government spenders becomes vivid, and probably for most people convincing. But there are other things that we do not see, because, alas, they have never been permitted to come into existence. They are the jobs destroyed by the $10 million taken from the taxpayers. All that has happened, at best, is that there has been a diversion of jobs because of the project. More bridge builders; fewer automobile workers, television technicians, clothing workers, farmers.

Meðlimir BSRB - er Henry Hazlitt til á ykkar bókasafni?

Segja stofnanir borgarinnar undirmannaðar

Athugasemdir

[Borgarstarfsmaður (IP-tala skráð) 9.3.2010 kl. 11:55]

Ágæti samfélagssérfræðingur. 

Þessi skattgreiðandi hefur sem borgarstarfsmaður ekki fengið krónuleiðréttingu á laun í rúm 3 ár.  Á sama tíma hefur orðið bankahrun með sínum áhrifum á almennt verðlag og innfluttar vörur / matvæli.  Auk þess hefur Reykjavíkurborg hækkað álögur sínar á borgarbúa og opinberar álögur einnig.  

 Á sama tíma vinn ég á stað sem er undirmannaður og verið er að hagræða vinnutíma (lestu lengja) til að skera niður sem samsvarar greiðslu á einum matartíma, (30 mín.) á dag en áhersla var lögð á að hækka laun undir 156.750.- í síðustu kjarasamningum í júlí 2009 (og minni á að þeir eru lágmarkssamningar).

 Ég lokum vil benda þér á að fæstir starfsmenn innan SRB eru í BSRB. 

[Geir Ágústsson, 9.3.2010 kl. 12:21]

Sæll borgarstarfsmaður,

Ég þakka innlitið og ábendingar þínar. 

Það eru sjálfsagt til margar leiðir til að skera niður í rekstri. Hið opinbera fer oft út í flatan niðurskurð og tilflutning á verkefnum sem lítur vel út á pappír en virkar ekki endilega í framkvæmd, enda eru það stjórnmálamenn á fínum skrifstofum að ákveða hvernig best sé að hagræða í daglegum rekstri fjarri þeim. 

Ég vil frábiðja mér allar kröfur á aukið fé úr vösum skattgreiðenda, af ástæðum sem Henry Hazlitt hér að ofan útskýrir svo ágætlega.