Bólan er að fæðast

Blaðamaður skrifar:

Ýmsir hafa spáð því að framundan sé verðbóla á fasteignamarkaði. Miðað við vísitölu íbúðaverðs á höfuðborgarsvæðinu sem Þjóðskrá heldur utan um er ekki að sjá að mikil hækkun sé að eiga sér stað á fasteignaverði. Síðustu 12 mánuðina hefur vísitalan hækkað um 5,25%, en það er mjög svipað og verðbólgan. Það er því ekki að sjá að nein raunverðshækkun sé að eiga sér stað á húsnæði.

Með "ýmsum" er meðal annarra átt við Heiðar Guðjónsson, fjárfesti, og Viðskiptablaðið - sjá nánar hér.

Blaðamaður fer ekki nánar út í forsendur þess að ýmsir eru að spá hér nýrri bólu á fasteignamarkaðinum. Það eru trúverðugar forsendur sem ég sé ekki ástæðu til að draga í efa þótt tölfræðin sé e.t.v. ekki byrjuð að sýna miklar hækkanir á fasteignaverði.

Og það er oft kjarni málsins: Menn einblína oft of mikið á tölurnar og gleyma forsendunum, því sem liggur að baki og við hverju má búast. Blaðamaður gerir vel með því að nefna verðbólguspá "ýmissa" aðila, en hann ætti að vara sig á að drukkna í tölfræði. Forsendur bólu á fasteignamarkaði eru til staðar, fjölmargir aðilar (t.d. bankarnir) eru búnir að stofna deildir eða dótturfyrirtæki sem eiga að koma fé úr lausu formi og í fasteignir, gjaldeyrishöftin fara ekki í tíð þessarar ríkisstjórnar og verðbólgubálið geysar áfram. 

Bólan er að fæðast. Hún er e.t.v. bara rauður blettur í bili, en fyllist af grefti á næstu vikum og mánuðum.

20% meiri velta á fasteignamarkaði

Athugasemdir

[Haraldur Rafn Ingvason, 8.7.2012 kl. 13:34]

...og hverjir eiga að kaupa til að standa undir bólunni - unga fólkið?

[Geir Ágústsson, 8.7.2012 kl. 16:27]

Nú vil ég alls ekki meina að neinn "eigi" að kaupa og þaðan af síður "standa undir" bólum. En fasteignakaup virðast vera ein fárra opinna flóttaleiða úr íslensku krónunni á Íslandi (t.d. fyrir þá sem eiga sparnað í íslenskum krónum, eða þéna vel í íslenskum krónum) og jafnvel sniðug sem flóttaleið.