Lögreglan einkavædd

Íslensk yfirvöld hugleiða nú að kaupa stolin gögn fyrir reiðufé til að hafa uppi á meintum lögbrjótum. Gott og vel. Lögbrot þarf að upplýsa hvort sem lög eru góð og gild, bjánaleg, kjánaleg, gagnslaus, öllum til ama eða eitthvað allt annað.

Meintir lögbrjótar komust framhjá íslenskum yfirvöldum á sínum tíma. Verði gögnin til þess að ná í skottið á þeim er hérna komið fyrsta dæmið sem ég þekki til um einkavæðingu löggæslu á Íslandi. Einkaaðili lagðist í rannsóknir og gróf upp sönnunargögn og býður þau til sölu. Ríkisvaldið kaupir. Séu gögnin í raun sönnun á sekt er upplagt að rúlla þeim beint fyrir dómstóla og fá glæpamenn dæmda fyrir lögbrot.

Næst á dagskrá hlýtur að vera að leggja niður hluta af lögreglunni, t.d. hluta af efnahagsbrotadeildinni, og gefa út verðskrá fyrir sönnunargögn er leiða til handtöku glæpamanna. Þann fyrirvara þarf samt að hafa að þeir sem leggja fram sönnunargögn þurfi að greiða fyrir úrvinnslu á þeim en fái í staðinn hluta af fyrirhuguðum sektargreiðslum í vasann ef um lögbrot er að ræða.

Fangelsisdómum mætti í auknum mæli snúa yfir í sektargreiðslur til að auka fjárstreymið og hvetja menn til að koma fram með sönnunargögn. Um leið sparast útgjöld vegna fangelsisrekstrar, ofan á sparnaðinn vegna minnkandi lögreglu.

Þetta eru svo sannarlega nýir og spennandi tímar í löggæslu á Íslandi!

Bjarni: Ekkert skattaskjól hjá mér

Athugasemdir

[Haukur Kristinsson (IP-tala skráð) 10.2.2015 kl. 20:45]

Mikið er þetta langsótt hjá þér Geir. Þetta köllum við á þýsku "Klugscheisserei". Þjóðverjar og fleiri þjóðir hafa fest kaup á svona "stolnum" upplýsingar og fengið milljarða í kassann. Skattsvikarar stóðu í biðröðum til að játa brot sín og losna undan refsingu.

Þetta verða engir nýir og spennandi tímar á skerinu, í svona málum erum við ætíð aftarlega á merinni og eftir öðrum þjóðum.

[Geir Ágústsson, 11.2.2015 kl. 07:26]

Það má vona! Það má vona að ríkisvaldið sjái að hérna gilda sömu lögmál og annars staðar - að ef hvatar eru miklir (að þéna vel á vel unninni vinnu) þá nýta menn krafta sína betur en ef hvatar eru litlir (að fá föst laun + yfirvinnutíma fyrir að mæta í vinnuna).

En ég játa að þetta er langsótt. En hví ekki? Af hverju ekki að bjóða út lögbrotarannsóknir og öflun sönnunargagna í brotamálum út til verktaka? Nú er svo mikið lagt úr útboðum í hinu og þessu; framkvæmdum og þess háttar. Undantekning samt gert þegar skilvirkni og samkeppni eiga kannski hvergi betur við.