Þetta með pappírsrörin

Við gerum allskonar furðulega hluti í nafni umhverfisverndar: Blöndum lífolíum í bensín og þrýstum þannig á að regnskógum sé skipt út með pálmatrjám, setjum mismunandi rusl í mismunandi tunnur og siglum sumu af því til útlanda á risastórum olíuknúnum skipum, skerum sífellt niður á umbúðir fyrir matvæli og stuðlum þannig að því að matur rennur út áður en hann nær til neytandans og flæmum iðnað og framleiðslu frá ríkjum þar sem orkuframleiðsla er snyrtileg til ríkja þar sem hún er skítug.

Fyrir mér er pappírsrörið holdgervingur allrar þessarar vitleysu. Í stað þess að nýta ódýrt og gott hráefni úr iðrum jarðar til að búa til endingagóða og notendavæna vöru - plaströrið - erum við að fella tré og framleiða allskyns lím og önnur efni til að búa til mun síðri vöru - pappírsrörið. 

Ég þoli ekki þessa ömurlegu útrýmingu á plaströrinu og hef fyrir því margar ástæður:

• Ég á litla dóttur sem getur allt í einu ekki lengur hjálpað sér sjálf við að setja rör í fernu og það angrar hana í hvert skipti. Sjálfur þarf ég stundum að nota hníf eða skæri til að búa til holu sem ég get svo þrætt rörinu niður í (sérstaklega á þessar ílöngu fernur sem bestu drykkirnir eru seldir í).
• Rörið endist ekki nógu lengi til að hægt sé að ná seinustu sopunum úr fernunni. Það stuðlar að matarsóun.
• Nú hef ég lagt það í vana minn að setja rusl í ruslafötur sem atvinnumenn tæma og koma innihaldinu í ábyrg ferli (eða á skip til Svíþjóðar). Plastmengun hafsins er því hvorki meiri né minni við að gera líf fernuneytenda ömurlegt.
• Þetta er ein stór sýndarmennska knúin áfram af ótta við álit örlítils hóps öfgasinna. Það vill enginn vera sé eini sem er ekki búinn að skipta góðum plaströrum út fyrir pappírsruslið, er það nokkuð?
• Uppáhaldið mitt er að sjá pappírsrör pakkað inn í plastumbúðir. Enda umbúðirnar síður í sjónum en rörið?
• Enginn hefur fyrir því að sýna fram á að pappírsrör séu á einhvern hátt skárri fyrir umhverfið en plaströrin. Við trúum því einfaldlega. Eða réttara sagt: Látum mata okkur af þeirri forsendu.

Senn líður að því að ég finn alþjóðlegan kaupmann sem selur plaströr í miklu magni og panta lífstíðarbirgðir af þessu frábæra þarfaþingi áður en vestræna vitleysan nær til allra heimshorna.

Athugasemdir

[Magnús Skúlason (IP-tala skráð) 22.8.2022 kl. 16:55]

Nú er ég sammála

[Pétur Örn Björnsson (IP-tala skráð) 22.8.2022 kl. 17:15]

Held að allt fólk með þokkalega greind geti tekið undir þessi orð þín.  

[Guðmundur Ásgeirsson, 22.8.2022 kl. 17:25]

Koma þessi papparör ekki ennþá í plastumbúðum?

[Geir Ágústsson, 22.8.2022 kl. 18:07]

Pétur,

Þetta kemur greind ekkert við. Það er einfaldlega til fólk sem hatar samfélagið sem það býr í. Telur það vera að mismuna, tortíma umhverfinu, kúga minnimáttar, svipta einstaklinga tækifærum, troða skoðunum upp á fólk og vera misnotað af fólki með valdaþræði. Telur svo lækninguna vera þá að mismuna, tortíma, kúga, svipta, troða og misnota.

Þetta er greint fólk, vittu til! En það er svo greint að það telur að hlutskipti sitt í lífinu eigi að vera betra en þessara tossa á aftasta bekk sem eru allt í einu orðnir moldríkir forstjórar. Þá skal knésetja með notkun ríkisvaldsins!

Guðmundur,

Yfirleitt já! Og þessar umbúðir eru léttar og gegnsæjar og miklu líklegri en sjálf rörin til að fjúka út í burskann og lenda ofan í sjó.

[Pétur Örn Björnsson (IP-tala skráð) 22.8.2022 kl. 19:01]

Þetta eru asnar, Geir.

[Ásgrímur Hartmannsson, 22.8.2022 kl. 19:34]

Einn kunningi minn pantaði plaströr af Ali.  Þau eru löng, og hann getur þá klyppt þau í tvennt, svo hver sending endist 2x lengur.