Óvissa í samfélaginu og hætt við allt

Hlöðuballi Mærudaga sem fram átti að fara á Húsavík um helgina hefur verið aflýst. Þetta kemur fram í tilkynningu Hestamannafélagsins Grana. Ástæðan er að sögn óvissa í samfélaginu. 

Ekki takmarkanir yfirvalda. Ekki áhyggjufullir borgarar sem óttast innstreymi veiruberandi aðkomumanna. Nei, óvissa í samfélaginu. 

Fleiri gerast nú sóttvarnarlæknar en áður og það væri allt í lagi ef í því fælist heilbrigð gagnrýni á fyrirmælin úr Reykjavík, aðrar nálganir en lokanir, t.d. hraðpróf, nú eða bara sú góða ábending að unga fólkið sem er að smitast er lítið að veikjast.

Og fyrir utan að allur hamagangurinn í kringum bóluefnin ætti að hafa skilað sér í einhverjum ávinningi fyrir þá sem tóku áhættuna af sprautunni.

En nei, óvissa í samfélaginu og öllu pakkað saman. Og í hræddu samfélagi þar sem menn klaga nágranna sína fyrir svokölluð sóttvarnarbrot og hrópa á ókunnuga um að fylgja fyrirmælum yfirvalda þá er hætt við að verslunarmannahelgin sé búin áður en hún byrjaði. Aftur.

Hlöðuballi Mærudaga aflýst

Athugasemdir

[Ásgrímur Hartmannsson, 23.7.2021 kl. 08:56]

Hrætt samfélag þar sem menn klaga nágranna sína fyrir svokölluð sóttvarnarbrot og hrópa á ókunnuga um að fylgja fyrirmælum yfirvalda er lélegt samfélag sem á algerlega skilið að deyja.

[Þorsteinn Siglaugsson, 23.7.2021 kl. 16:32]

Þær varnir sem stóðu til boða hafa þegar verið hafðar uppi. Þeir sem veikjast eða deyja úr þessari tilteknu pest héðan í frá munu veikjast eða deyja, hvort sem það tekur skemmri eða lengri tíma.

Allar "aðgerðir" héðan í frá hafa því ekki það markmið að hindra að fólk veikist eða deyi. Eina markmiðið sem hægt er að koma auga á er það markmið að viðhalda faraldrinum sem lengst. Slíkt hefur grafalvarlegar afleiðingar.