Það skal niðurgreitt sem er í tísku

Stjórnmálamenn elska að skreyta sig með stolnum fjöðrum. Þeir finna lyktina af því sem er í tísku og drífa sig svo að eyða fé skattgreiðenda í það. Þannig má uppskera atkvæði og vinsældir á kostnað annarra.

Stundum þýðir þetta að hið opinbera dælir skattfé í samkeppnisrekstur við einkaaðila sem þurfa bæði að borga alla skatta og kaupa aðföng og þjónustu á markaðsverði. 

Ef fé skattgreiðenda tapast gengur stjórnmálamaðurinn óskaddaður frá því og sendir öðrum reikninginn. Fyrir einkaaðila þýðir tap gjaldþrot og fé leitar í eitthvað annað og arðbærara.

Það má vel vera að á Íslandi sé stjórnarskrá og almenn stemming fyrir því að lögin gangi jafnt yfir alla, en í raun er það svo að fyrir hið opinbera gilda ein lög og það innheimtir skatta eins og því sýnist á meðan önnur lög gilda fyrir aðra.

Sú forréttindastaða sem hið opinbera nýtur gleður þá sem styðja stjórnvöld hverju sinni og eru hlynntir því hvernig það togar í alla spotta og stjórnar samfélaginu. Komi hins vegar til stjórnarskipta súrnar aðdáun þeirra sem studdu fráfarandi stjórnvöld og allt í einu er hið opinbera að traðka á samfélaginu í stað þess að stýra því í rétta átt.

Væri ekki einfaldlega best fyrir alla að minnka ríkisvaldið og færa stjórn samfélagsins í auknum mæli til borgaranna, sem geta kosið daglega hvern þeir styðja og hvern ekki?

Klasar skekkja samkeppnina

Athugasemdir

[Grímur (IP-tala skráð) 15.11.2018 kl. 17:57]

Þú ert greinilega að tala um Samfylkinguna

sem vill stjórna hvað þú borðar - Sykurskattur (vörugjöld á sykur og sætuefni) verði lagður á en það mun færa ríkissjóði um 1 milljarð króna

og því "góða fólkið" tímir aldrei að gefa sjálft í safnanir þá er samviskan friðuð með því láta starfsmannafélagið blæða  - til þróunaraðstoðar er lagt til að 400 mkr. renni í neyðarhjálp UNICEF fyrir börn í Jemen

[Geir Ágústsson, 15.11.2018 kl. 18:49]

Það er bara alls ekki Samfylkingin sem gerist sek um forræðishyggju og viljann til að taka fyrir hendurnar á markaðinum og jafnvel traðka á einkafyrirtækjum. Slíkt á við um alla flokka, þó í mismiklum mæli.

Sjálfstæðisflokkurinn vill traðka á frjálsum trúfélögum með því að niðurgreiða eitt þeirra meira en önnur (þessi blessaði samningur ríkisins og Þjóðkirkjunnar, þar sem ríkið málaði sig út í horn).

Hann vill líka blása fé skattgreiðenda í opinbera lista- og menningarstarfsemi sem dregur fólk frá frjálsu framtaki hér.

VG vill auðvitað hafa ríkið sem mest hvar sem er, og Samfylkingin síðan hún breyttist í sósíalistaflokk við seinustu formannsskipti.

Aðrir flokkar eru svo einhvers staðar á þessu rófi.

[Grímur (IP-tala skráð) 15.11.2018 kl. 21:52]

Margir af þeim sem ég þekki kjósa ekki eða skila auðu og svo pirra þeir sig endalaust yfir lélegum stjórnmálmönnum sem geri aldrei neitt.

Þetta er svo sem skiljanlegt því það er ekkert pólitískt liftróf til í dag það eru allir flokkar gráir og virðast ekki hafa neina sannfæringu í neinum málflokki.

Ég vitnaði í Samfylkinguna hér að ofan en á fundi þeirra í morgun þar sem þeir voru að kynna sínar tillögur í fjárlögum voru þau álíka sannfærandi og auglýsing frá bönkunum þar sem bankarnir segjast setja þína hagsmuni í efsta sæti.