Ríkisstjórnin brennir lánsfé

Morgunblaðið tekur vægt á ríkisstjórninni með hófstilltri fyrirsögn, "Útgjöld hækka um 9 milljarða". Raunin er sú að skuldasöfnun ríkissjóðs vex um 9 milljarða frá fyrri skuldasöfnun. Þetta eru skuldir sem bera vexti. Fyrstu gjalddögum á afborgunum hefur verið frestað fram yfir næstu kosningar eins mikið og hægt er. Þetta gerir ríkisstjórninni kleift að ausa út lánsfé og þagga niður í óánægjuröddum, og velta skuldavandanum yfir á herðar næstu ríkisstjórnar. Núverandi ríkisstjórn veit að hún fær flengingu í næstu kosningum og þarf því ekki að hafa áhyggjur af eigin skuldasöfnun.

Hegðun þingmanna minnir töluvert á hegðun eyðslufíkilsins sem byggir upp dýran lífsstíl á meðan öll kreditkort eru opin, og neitar að skera niður þegar lánalínur lokast. Ríkið stendur í allskyns óþarfa sem er börnin okkar þurfa að greiða vexti af þegar þau fara á vinnumarkaðinn eftir 10, 20 og 30 ár. Þennan óþarfa þarf að leggja niður eða selja út úr ríkisrekstrinum og af herðum skattgreiðenda. SUS hefur bent á þetta í sínum niðurskurðartillögum (sem bera hið skemmtilega heiti "klippum kortið"). 

Þeir sem streitast á móti því að ríkið minnki útgjöld sín í takt við tekjur (án skattahækkana) eru veruleikafirrtir, svo vægt sé til orða tekið. 

Útgjöld hækka um 9 milljarða

Athugasemdir

[Helgi (IP-tala skráð) 17.12.2010 kl. 19:13]

Sæll.

Ég held að þetta sé alveg rétt hjá þér. Það er hörmung að fygjast með því hvernig stjórnmálamenn fara með opinbert fé. Ég held að þessi kreppa sýni það líka glögglega að þetta svokallaða blandaða hagkerfi virkar ekki. Stjórnmálamenn og stofnanir ríkisins eiga að hafa sem allra minnst með fjármuni og frelsi einstaklingsins að gera. Stjórnmálamenn ausa almanna fé í alls kyns vitleysu. Í götunni hjá mér t.d.  eru kannski 50 m á milli hraðahindrana.

Mér blöskrar einnig þegar skorið er duglega niður á LSH en nánast ekkert í í heilbrigðisráðuneytinu. Ögmundur skar 10% niður hjá LSH en 1% í heilbrigðisráðuneytinu ef ég man rétt. Ætli eitthvað svipað verði ekki uppi á teningnum hjá sveitarfélögunum í vor þegar skorið verður niður í grunnskólunum, stjórnunarbatteríin verða sjálfsagt látin alveg vera á meðan kennarar missa vinnuna. Vissulega þarf að skera niður en menn skera ekki endalaust niður í t.d. heilbrigðiskerfinu af lýðfræðilegum ástæðum. Ætli tæknigreinarnar verði ekki látnar mæta afgangi á háskólastiginu svo hægt sé að kenna afar þarfar og gagnlegar greinar eins og kynjafræði? Það væri eftir vinstri sinnuðum yfirvöldum.